Rabu, 06 November 2013


BAWI KUWU TUMBANG RAKUMPIT

Hung katika huran melai sungei rungan tege ije lewu into Tumbang sungei Rakumpit aton ije kabali baluh belum dengan due biti anak ewen, ije bawi, ije hatue. Kabali baluh toh oloh basewut tuntang are panatau tuntang oloh je manyang ewen.

Anak bawi te inggare Bawi Kuwu awi oloh bakas due te dia manyuhu anake balua huma, cara inguwu (dipingit) genep handau hamalem. Bawi Kuwu te i’ayang awi “ayang” (dayang-dayang) maharagu ie, tuntang gawi beken yete manjawet amak tuntang kare lontong palundu. Amon manumon kesah Bawi Kuwu te puna apik manjawet. Tarung sarita Bawi Kuwu je putir bahalap jaton tandinge tuntang apik manjawet sampai akan kanih kate.

Bawi Kuwu puna sampai kabujange, are puluh nyelo ie jari inguwu, tege angat huang kea handak balua manampayah karamin lewu, manampayah taluh handiai dia tau awi ingahana oloh bakase tuntang injaga ayang ayue te.

Hung sinde katika, metoh oloh bakas Bawi Kuwu tulak akan tana, manyengok kare kabun pambulan, tana nyelo ewen, salenga Bawi Kuwu mangkeme biti berenge balasut bakarah juju-juan angat atei handak mandui sahewu into sungei Rungan. Niat atei dia kasampaian awi ngahana ayang-ayang awi jete peteh bapae-indue dia tau balua bara huma.

Bawi Kuwu puna dia undur angat niat handak mandui melai sungei Rungan, tapi magun ie ingahana awi ayang te.

Metoh ayang - ayang te laya, benye-benyem Bawi Kuwu mantuhus arepe bara huma, palus ie muhun akan lanting talian saran sungei Rungan.

Hindai sampet sahewu Bawi Kuwu te, salenga lampang ije kungan “bajai” (buaya) hai, palus manyambar Bawi Kuwu. Hakarang indang, hakarang apang, Bawi Kuwu dia ulih mawat arepe, ie palus namput bajai akan penda danom eka bajai te nyarangan.

Kawan ayang je melai huma rami deroh mangau Bawi Kuwu je lilap bara huma. Geger gampar ewen mangumbang manggau Bawi Kuwu hanyak angat kikeh ewen pasti buah sangit oloh bakas Bawi Kuwu amon katawan Bawi Kuwu je hadari bara huma.

Sana andau halemei oloh bakas Bawi Kuwu duma bara pasah tana, mahining sarita basa Bawi Kuwu hadari bara huma tuntang dia ewen katawan kakueh dari Bawi Kuwu je palus benyem lilap. Narai taluh ati lepah uras kawan ayang te buah sangit awi oloh bakas Bawi Kuwu.

Limbah te, oloh bakas Bawi Kuwu marawei kare bakas lewu tuntang je tege pangatawae tau manenung oloh layang. Uras oloh te intehau uka tau mandohop tuntang mawi gawi hai manumon adat tuntang kapercaya metoh te.

Telo andau telo alem ewen mawi gawi kilau manenung hung kueh eka Bawi Kuwu en ie magun belom en kanampie. Salenga hung alem te nyahan (pahari hatue) Bawi Kuwu manupi hasundau dengan “Patahu” je mansanan basa betaue Bawi Kuwu magon belum huang kanain bajai je manelen Bawi Kuwu nah. Kuan Patahu mameteh dengae ela sama-sinde mampatei bajai te amon bajai te lampang. Kute auh peteh Patahu dengan nyahan Bawi Kuwu. Palus ie takisik bara nupie.

Nyahan Bawi Kuwu manyarita nupie akan indu bapae, palus oloh bakas te mantehau “Pangareran” oloh je tau mantehau tuntang mampalampang bajai te. Sana Pangareran mawi taluh gawi mantehau bajai te, dia ati katahie bajai te palus mampalampang arep hunjung bilun danum sungei Rungan. Bajai te dumah palus kusu-kusur misung arepe akan hunjun petak, kilau tu je rentah manumon auh Pangareran te.

Sana mite bajai hai je manelen Bawi Kuwu te jari lantu-lantung hunjun petak masi arepe. Nyahan Bawi Kuwu dia ulih manyarenan angat kasingite dengan bajai te. “Ikau tuh je manelen betauku! “Pateiku ikau”!! Kuae, hayak manangkajuk manjijit lunju. Haranan kasangit je paham te palus ie kalapean peteh Patahu je ela mampatei bajai te. Ie manduan lunju palus manepe maniruk hapus bitin bajai hai te, kare kanain bajai te uras lepah sempak buah lunju, sampai bajai te matei.

Sana bajai hai te matei, oloh palus manyila kanain bajai je matei, narai taloh ati, Bawi Kuwu je hung rombak kanain bajai te matei kea buah lunju nyahae nah.

Oloh are paham manyasal awi Bawi Kuwu matei huang rombak kanai bajai, mani-manih je oloh bakas Bawi Kuwu paham kapehen atei ewen. Lepah kesah.

PETEH PENYANG :

1. Wayah toh dia jaman Bawi Kuwu, je are bawi bahalap santar buah kuwu (ngurung/dipingit) awi oloh bakas.

2. Oloh bakas puna patut halajur mamparendeng kawan anak jaria, baya ela lalau malabien sampai anak jarian itah dia tau balua huma, jatun mangasene tundah-jalahae, kawan pahari, jaton kawal.

3. Anak tabela bawi hatue, harus hining tingak ajar oloh bakas, ela malawan manumon katekang atei. Amon oloh bakas maningak, mangahana awi ewen sayang dengan keton.

4. Hormat bapam tuntang indum, mangat ikau batuah marajaki tuntang panjang umurm hong petak toh. Awi oloh bakas Hatalla je gitan itah.

5. Ela awi kasangit je ngalabien itah mawi taluh gawi je dia hapan pikir akal, sampai talingau kare peteh. Keleh hapan kasabar mangat sadingen untek itah bapikir.