Putir Busu dengan Saluang

PUTIR BUSU DENGAN SALUANG

Katika huran tege ije oloh bawi bahalap bungas je inggare arae Putir Busu. Ie oloh je pamasi tuntang rajin mandohop oloh, tuntang ie manyayang kare metu satua.

Hung sinde andau Putir Busu nyuhu indange tulak akan lewu dipah uka mamili undus hapa ewen mampakasak kare balut panginan. Metoh Putir Busu tulak akan jukung hung benteng jalan ie manampayah tege laok saluang kiti-kitik melai hunjun petak. Saluang te handak matei keang kamahau awi lasut andau. Putir Busu masi dengan saluang te palus ie maraup saluang te hapan lukape, ie mimbit akan batang talian balalu maliwus saluang te akan danum. Narai kahanjak saluang sana buah danum palus kiti-kitik barigas.

Salenga saluang te tau bapander, kuae : “Oo Putir Busu aku manyewut tarima kasih tagal ikau jari mawat aku, mimbit aku akan danum je puna eka ikei melai. Aku jari barigas, aku dia akan kalapean pandohopm. Amon ikau jake sasat, tehau ih aku, aku dumah mandohop ikau.” “Yoh saluang, puna itah patut belom hakadohop.” kuan tumbah Putir Busu dengan saluang.

Putir Busu manuntung jalanae, malekak huruk jukung balalu mambesei akan dipah manalih lewu eka oloh tege manjual undus.

Sana jari sampai dipah, Putir Busu mamili undus ije kasa (botol sarangan undus) manumun duit je aton. Limbah te Putir Busu handak mules akan lewu humae hung dipah. Ampin taluh marapus kea batusuh ih je kasan undus akan danum, awi Putir Busu handak manjatu akan danum bara hunjun jukung je tantiling. Putir Busu ulih mawat arepe tapi undus uras lepah tatusuh akan danum.

Putir Busu manangis lungu-lungui awi kanampie ie tau manduan undus bara danum, aluh undus lampang melai hunjun bilun danum, tapi nyendok uras kuntep danum ih. Putir Busu masi arep malungui manangis, ie handak buli dia bahanyi, mikeh indange sangit dengae. “Matei aku toh awi indangku awi manusuh undus, marak jaton duit tau mamili undus tinai.” kuan atei Putir Busu.

Metoh kapusang atei Putir Busu, ie tara ingat dengan auh saluang nah. Palus ie mantehau saluang je puji ie mandohop nah. Salenga dumah kusu-kusur saluang te, kiti-kitik saran jukung Putir Busu. “Narai mawi ikau manangis nah Putir Busu?” kuan saluang misek. “Ye undus je miliku bara dipah uras batusuh akan danum, nampingku manduae, handak buli aku dia bahanyi dengan indangku.” kuan Putir Busu. “Oh … tenang Putir Busu, entai helu, aku mantehau kare kula babuhangku.” kuan saluang. Ye saluang masuh manalih kula babuhae, mimbit ewen murik handak mandohop Putir Busu.

Dia pire-pire katahie, hining auh bara hila ngawa mandasai sinde, bara kapayap, sambil ampie je cip-cup nangkajuk hasalanja murik. Ampin saluang murik, puna hagas sinde. Sana sampai jukung Putir Busu, bara kitik sinde kawan saluang je ise ribu toh kakare. Palus, kawan saluang te minyop undus je batusuh hunjun bilun danum. Genep kungan minyop undus, palus kawan saluang manusuh (mamutae) akan huang kasa sarangan undus. Dia pire katahie kuntep ih kasan undus Putir Busu, uras lepah bara danum jari tasuang haluli akan kasa.

Saluang hamauh dengan Putir Busu : “Jari ndai Putir Busu, uras undusm je batusuh te jari nyuang ikei akan kasam.”  Narai kahanjak Putir Busu manampayah kilau te. Putir Busu manyewut are tarima kasih akan kawan saluang. Kute ampin asin Hatalla mahalau saluang je puji indohop awi Putir Busu, wayah saluang mamaleh mandohop Putir Busu.

Putir busu buli akan huma, dengan kahanjak tuntang ie manyarita akan indange taluh manyangkume te tuntang pandohop saluang dengae. Genep wayah saluang murik te Putir Busu muhun akan sungei manampayah kawan saluang malambai dengan kahanjak haliai. Awi ie mangenang pandohop saluang nah.

PETEH PENYANG :

1. Keleh itah kilau Putir Busu je manjadi oloh je panyanyang dengan kare meto satua, ela mambarangai. Ela manalua tuntang kakanan sinde. Amon tege laok puna akan balut keleh kumae toto-toto ela jakah-jakaha, mananya intu petak.

2. Ela mampatei metu satua amon jete akan kabangang itah ih.

3. Tege meto satua je harus ihaga bua-buah, Meto satua je dilindungi pemerintah tuntang je langka.

4. Ela manekap lauk hapan Strum Listrik, ela hapan kare racun, awi mampalumat kare laok, lepah sampai kare bunyate. Pasi anak eson itah jeha dia puji manampayah tuntang mangkeme kare sepsimpan kare macam lauk. Kilau wayah toh jari sasar bahali mamisi intu sungei manggau pantik baung, are  sungei rusak tuntang laok lepah lumat.

Kesah "Sambung Maut dengan Palanduk"

KESAH SAMBUNG MAUT

Hung jaman huran tege oloh hatue ije panjang hai. Tuntang ie puna oloh pangaji (sakti) toto, oloh matei tau ie mambelom haluli, oloh bapelek pai lenge, tulang karak-karaka tau iye manyambung manangkalulie. Awi te iye inggare oloh “Sambung Maut”.

Sambung Maut belum kabuate, ie oloh ije biti je randah atei tuntang rajin mandohop oloh je jake saat. Hung sinde katika metoh Sambung Maut manampa jalanae mananjung akan saran himba, salenga ie manampayah ije kungan palanduk ngodon manduk manure. Balalu Sambung Maut misek palanduk te : “oi palanduk, mbuhen ikau je ngodon kilau kau?” Palus tumbah palanduk te “Hakayah mbuhen amaku Sambung Maut dia katawan, item kanih oloh are rami ampie mangguang taluh je korik hayak mantakis hapan pain ewen!” sambil kea palanduk maninjuk ije eka oloh je rami te. “Oh, oloh je rami te main ball!” kuan Sambung Maut tumbah. Hamauh tinai palanduk : “Dia ulih aku barima ampin kahumung je bagare kalunen kau, kahakue-hakue hadari ngaju-ngawa, kijak ihik dengan satua je korik te. Ampie lague palanduk Hengan dengan oloh je main ball te. “Nauh ih kuan Sambung Maut, puna je bagare kalunen kau, ela je kilaukau, limbah mamani mahin imbing ewen parae… hehehe…” “Yoh.. kuan palanduk, “ye aku toh nyamah maringkong mamikir ampin ewen.” “Kanduem hapae, kuan Sambung Maut palus manuntung jalanae, malihi palanduk.

Pire-pire andau tinai Sambung Maut manguan jalanae manintu ije talaga handak malaok. Salenga tara gitae palanduk munduk manure manampayah talaga te, sampai dia habirep sinde. Sambung Maut manukep palanduk palus misek : “ Kilen ikau je munduk manure ngodon saran talaga toh nah ake palanduk?” “Hakayah..!! ama.. manarewen aku ikau.” Narai awim hetoh nah?” Yete ma… gitam kanih.!” “Oo… “Dengen” kanih je kuam kau, mbuhen tenah.?” Kuan Sambung Maut. “Yoh ma…pehe kulokku marima ampin ewen, kahumu-humunge ewen kau, hakon hanangui mate-matei, umbet maneser sampai haketer hagenjeh badarem.” kuan palanduk. Tumbah kea Sambung Maut, “punae arae je dengen, puna badenge-dengen ih ewen, puna gawin ewen je hanangui, maneser tenah.” Tumbah tinai palanduk “Awi te mahi-mahie aku maringkong maniruk gawin ewen te.” palus ie buhau malihi Sambung Maut.

Hung ije katika tinai, Sambung Maut hasundau dengan palanduk je bahut nah. Palanduk te metoh munduk manure, mangodon intu saran tana olon je harun manusul. Sambung Maut manukep palanduk palus hamauh dengae.. “Ye!! palanduk..!! rise aku mite ikau cara ngodon manure kilau toh.!!” “Akayah ama Sambung Maut manarewen aku ih.” kuan palanduk. Hamauh tinai Sambung Maut “Mbuhen ikau cara marima ampin oloh?” Pea andau ikau maniruk arepm kabuat?”

“Item kanih ma…. !” palanduk maninjuk ije kungan “apot” metuh marumbak petak. “Hengan aku, kuan palanduk “kueh ie puna babilem ampie kilau buring, kuman mihup, mamani uras huang rombak petak te ih.” “Hakayah akeku palanduk… pahengan arepm.. punae ih je apot kau mananjung mahin mangkawang, “kuan Sambung Maut.” Haranan te aku nyamah maringkong, dia lepah pikirku marima ampin apot kau, badai ih je mameh.” kuan palanduk, palus buhau.

Kute kea andau ije beken, Sambung Maut hasundau tinai dengan palanduk metuh munduk manure. Sinde toh ampin baun palanduk dia bara bahut, ie kumi rium ampin baue. Balalu Sambung Maut manukep palanduk palus misek : “Narai mawi ikau nah ake palanduk je kumi rium?” Bahut kelu-kelut sambil kambareot lingkaum?” Akai mama Sambung Maut gitam ampin meto jikau cir-cir mahit mahin manggatang pai silae!” palanduk maninjuk asu je rahat mahit. Nduem hapae tenah… arae je asu marak hadari mahin tau ie mahit, mambusau arepm mamikir ie.!” kuan Sambung Maut. “Yoh ma… puna mameh je arae asu kau.. mahin karingkongku marima ie.” palanduk palus buhau.

Limbah te hung ije katika metuh Sambung Maut mananjung, tara hininge tege oloh mangombak, balaku dohop. “Dohop… dohop… dohop…!!” Sambung Maut manggau hila auh te. Sana ie manampayah, sakalinya palanduk kua-kuak melai sampiti jarat oloh. “Boh..! kilen ndai mawi ikau nah ake palanduk? Bahut munduk manure, toh kua-kuak kilau bangamat?”

“Aduh… aduh.. dohop ama Sambung Maut…. sinde toh dia baka hureh ama…. dohop ma..!” Kuan palanduk asi-asi marak tangis tatume. “Kueh matam je rajin manantuani oloh nah…. lehan je dia ikau manampayah jarat olon kalunen je ketu-ketung kau?” kuan Sambung Maut. “Tamam auhm bahut, uras oloh uras mameh kuam. Ikau je pintar hayak harati, ampin lecakm te.!!” auh Sambung Maut malait palanduk.

“Ampun… ampun amaku Sambung Maut…. jera aku… dia ndai aku manida meto satua, olon kalonen mameh… ampie aku toh jaton kalabie kea je bara oloh, hemben tau buah jarat kilau toh!” Dohop ama …. dohop….!!” kuan palanduk asi-asi. “Ye te… !! ela jerae… kilen amon aku dia masi ikau..?!!” kuan Sambung Maut. “Ampun ama… dohop aku… engkak jarat bara paingku, jera aku ama…!” kuan palanduk.

Ye Sambung Maut mengkak buhul jarat bara pain palanduk je jiret tasintak sampiti. Narai taluh ati sana jari balekak jarat te, palanduk duka-deko….. dia ulih miar awi pai silae bapelek awi kanyangit sampiti te. Pasi ampin kulam. Ye Sambung Maut masi dengan palanduk palus ie manuntung, manyambung, mampakeleh haluli tinai pain palanduk je bapelek te. Hemben te kea palanduk barigas keleh, tuntang ulih miar mananjung tinai. Tuntang ie puna jera hababaka manyewot oloh mameh.

Katamam kajin Sambung Maut, halajur batarung hemben katika toh. Manumun kesah oloh tege pire-pire biti oloh itah je magun mina “Minyak Sambung Maut” te, hapa mandohop oloh je bapelek, rakai kare tulang pai, lengee.

Peteh Penyang :
1. Ela itah cara mamikir, mahengankare gawin oloh beken, uras olon kalonen tege bagie tuntang katau tuntang kaderoh ayue.

2. Pangulih oloh, beken bara pangulih itah.

3. Keleh itah marima, manirok narai je tau itah malaluse, manumun katau, kapintar tuntang kaharatin itah.

4. Ela itah balecak manyewot oloh mameh, tau itah kabuat labih mameh bara oloh te. Kilau kuan pepatah “nyamam te harimaungm”.

5. Keleh kilau Sambung Maut je rajin mandohop, mawat, masi oloh.

6. Amon oloh jari mandohop, keleh itah manyewut tarima kasih.

Asal Sungei Talampe

KESAH ASAL SUNGEI TALAMPE

Hung wayah huran oloh murik masuh mahapan jukung. Amon jalanan kejau te oloh mahapan jukung je ingajang bentenge eka nganjungen arep bara ujan tuntang mandang, tuntang dayung hapa mandayung. 

 

Mambesei mandayung mangguang ije lewu je jaha-jahai katika huran puna are wayah je hapan. Tau baanda-andau, baminggu-minggu, babula-bulan harun tau sampai. Hung kueh eka kaput hete tende barapi manjuhu tuntang batiruh. Hanyak andau sawah palus manuntung jalanan tinai, kute-hante-hante.

Sinde katika tege ije kabali baluh bara lewu Tumbang Kapuas murik mandayung akan lewu ngaju, manamuei akan hila ngaju, mahimat tau mubah ampin pambelum ewen. Ewen batelo, sawae-banae tuntang ije biti anak hatue harun bujang.

Metuh jalanan panamuei ewen batelo te, ewen jake kaput intu ije teluk, palus bapae te mahuruk jukung intu ije upun batang kayu saran tiwing. Limbah te bapae manduan ije talusung nyating, manukan sumbu akan ewen telo, sambil kea indue manatap kare bari panginan akan ewen.

Marak andau rihe-rihe, tuntang kilat mamancar ewen telo kuman intu jukung te. Limbah jari kuman bapae palus hamauh dengan sawae tuntang anake, “Takan keton ndue batiruh, aku bajaga akan itah.”

Alem sasar ambu, riwut kius kitap angat puna sadingen badarem bulu. Bapae dia tapasarenan kea angat kantuk. Palus ie runtuk tapatiruh kea. Tiruh puna bakalis malis ewen telo te, dia mangatawan tege taloh je manggapi jukung ewen telo te.

Salenga talusung nyating belep nantekas, tampayah uras kaput pijem ewen telo takejet. “Boh, narai mawi itah kaput toh?” kuan bapae. Marak kaput pijem ewen telo mangkeme ewau hanyer je dia kalaluen sinde.

Marak kaput bapae manggayap batu kambapi, palus manukis batu te. “cer-cer-cer” hanyala batu kambapi te manyingah hung kueh eka talusung nyating ewen te, hindai ke sundau eka talusung nyating. Marak kaput pijem manuk jagau intu karungan je imbit ewen melai jukung, cara nampokak. Kila-kilau tege je ikehe.

Angat kikeh ewen telo puna aton, bapae marak kaput pijem manggayap sambil-gantau palus akan ambu koloke. Salenga tara kemee taluh je lunya-lunyai, balemu marak ewau hanyer dia kalaluen.

Kajariae bapae te sundau kea tisan talusung ewen telo nah, balalu ie manukis kambapi manukan talusung palus hanyala manyingau ewen telo.

Tarewen sabanen ewen telo, sakalinya ewen telo dengan jukung ewen melai ije rombak je hai, je kilau huang galembung. Palus bapae manyilak Mandau manepe galembung te, salenga mahantis daha bara galembung te. Manampayah taluh kilau te bapae palus hamauh, “Sasat itah toh, itah melai rombak kanain bajai.!!” Indue tuntang anak palus mikeh mahining auh te.

Bapae jajuan manepe galembung te hapan tapakan Mandau. Ampie lague taloh je manelen ewen telo te babigal, mawi ewen telo huang kanain meto te gulang-galing, sampai belep talusung nyating ewen.

Bapae dia tende manepe kanain meto te, manampayah kilau te anake je magun tabela te umba kea manduan lunju palus manepe galembung te, tepe dia kakira, tapalujur kea tatepe buah jantung atei meto te. Narai taloh ati meto te burak-barik mangaliat manyarenan kapehe, bapae gulung manepe manyila kanain meto te, kajariae ulih kea tembus manampa ije rombak.

Mahalau rombak te ewen telo balua bara kanain meto te. Ewen telo uras salamat. Marak kaput pijem meto jete burak-barik manyarenan kapehee palus matei hung hete.

Hung sawah andau ewen manampayah meto je matei te, sakalinya handipe je hai toto. Handipe je inggare oloh “Handipe Talampe”. Talampe toh je manelen ewen hamalem endau.

Ampie lague talampe te metoh iye balampah manaharep sungei Kapuas, saran tiwing, pas eka ewen telo mahuruk jukung ewen, palus inelen talampe jukung tuntang ewen telo je huang jukung te.

Awi handipe talampe je burak-barik mangaliat tuntang mahampas arepe manyarenan tepen Mandau tuntang lunju nah, ie palus matei hete. Petak je ekae mampar arepe te maruak handalem toto kilau ampin kahai handipe talampe te. Palus Kajariae ruak te manjadi ije sungei je inggare oloh “Sungei Talampe” Sungei je manumbang sungei Kapuas daerah Kecamatan Mantangai wayah toh.

Lepah Kesah

Peteh Penyang :
1. Helo bara nguan jalanan pahalisang keleh balakudoa manyarah akan Hatalla uka impahayak tuntang ingalindung bara calaka bahaya.

2. Amon nguan jalanan pahalisang ela balihi kare puat tuntang bahata, awi dia musti ampi panyundau hung benteng jalanan.

3. Hung kajake kasusah ela bagetu harap tuntang kapercaya, pasti tege jalan balua tuntang Hatalla dia manalua oloh je harap tuntang cangkal.

4. Jaman huran tato-hiang, tambi-bue, indang apang mambesei mandayung mambelom itah... Itah wayah toh mambesei hapan duit..... Has!!! ela kadian tuntang mahamen, keleh cangkal tuntang rajin sakula mangat pintar tuntang harati uka bahasil belom rahian dapit.