Sangomang Mamutus Perkara

SANGOMANG MAMUTUS PERKARA

Hong lewun maharaja tege ije putir je bahalap toto, baya hong ije katika tuan putir rahat haban paham. Ie maringkong awi puna dia belai koman, pire-pire andau ie manyarenan kahaban te. Maharaja mahin dia katawan buku sabab kahaban tuan putir te, sampai dia belai koman. Ia mahin dia katawan narai tatamban akan panyakit tuan putir te.

Sampai ije katika dumah saudagar mimbit kapal hai, palus tende intu talian maharaja. Tara hining putir basa saudagar dumah bara lewu kejau, mimbit kare ramon dagange, kare balut panginan. Saudagar te tege kea mimbit pundang baya dia iye bajual pundang te, madu akan balut saudagar ih.

Tuan putir manyuhu ayang ayue musuk muneh pundang saudagar awi tege kapaham belai putir handak koman amon balut pundang laok. Pire-pire kali ayang putir misek handak laku bagi pundang puna dia saudagar hakon mambagie. Lalau kea je kaukih saudagar te.

Hong hanjewu andau kamean tuan putir hiu-hiut ewau pundang laok saudagar, putir menyengok bara saran basengok istana, puna toto metoh rahat saudagar mekei pundang hunjon sapau kapale. Salenga lembut belai tuan putir handak koman, ie palus manduan bari, manyuap bari sambil manyingut ewau pundang je hiu-hiut te nah. Lepah kea ije kapiring bari tuan putir, babalut ewau pundang te. Hapus andau baganti alem, tuan putir batiruh bakalis awi besuh.

Hanjewu andau tinai, saudagar haluli mekei pundang kilau male. Hiut-hiut tinai ewau pundang te sampai urung tuan putir melai istana. Lembut tinai belai tuan putir handak koman, ie palus manduan bari sambil manyengok nampayah kapal saudagar, hakabuah riwut, ewau pundang puna nampaor. Besuh bangai tuan putir koman bari balut ewau pundang saudagar.

Pire-pire andau saudagar mekei pundang hunjun sapau kapal, kilau te kea belai tuan putir koman, palus tuan putir barigas keleh bara kahabae. Sampai pinding saudagar basa tuan putir keleh bara kahaban awi mangkeme ewau pundang saudagar je iekeie hunjun kapal.

Balawa andau saudagar lumpat akan istana, balaku ganti rugi dengan maharaja, awi tuan putir keleh bara kahabae manyingut ewau pundange. Dia ure-ureh palakun saudagar, ie balaku ganti rugi saribu kati garantong, amon induit wayah toh labih-kurang 1 M dia isu-isut duit te.

Mahining auh saudagar te maharaja pehe atei, hong kueh itah mangau garantong kakaren te, ewen dia ulih mamutus perkara te. Kare mantir adat, kare panasehat kerajaan mahin dia ulih marimae perkara te. Palus tara ingat maharaja tege akee Sagomang, te ewen mantehau Sangomang dumah akan istana uka umba maniruk tuntang mamutus perkara te.

Sangomang sampai kea akan istana maharaja, palus ie mahining narai buku-sabab saudagar balaku ganti rugi ewau pundang dengan saribu kati garantong.

Hanjulo bewei Sangomang marima perkara te, palus ie hamauh : “Ceh! perkara korik bewei ih amon kilau te!” “Ayo, keton handiai mumpong kare garantong je galis, bahalap auhe je aton hong istana toh, kareh keton manto garantong, saudagar mahining bara kapal kanih, je kueh auh je bahalap te kareh jete je intih awi saudagar!”

Ye oloh are manduan garantong je bahalap auh hiaue, lambak te saudagar mentai intu kapal, sene-seneh amon kareh oloh manto garantong.

“En saudagar siap ikau mintih auh garantong je bahalap auhe?” kuan Sangomang. “Yoh, aku siap hetoh!” koan saudagar.

Nampara oloh are, manto garantong, manumun aba-aba bara Sangomang. Puna ging-gong sinde auh garantong galis je puna bahalap. “En, auhe, saudagar, bahalap?” “Bahalap auhe garantong kau, ye jekau akangku!” kuan saudagar.

“Sinde tinai saudagar, siap-siap ikau manyenehe.” Kuan Sangomang. “Yoh, siap!” kuan saudagar.

Nampara tinai oloh are manto garantong te, puna ging-gong sinde auhe tewa-tewah auhe. “En, saudagar, bahalap auhe?” pisek Sangomang. “Bahalap, ye kau!” kuan saudagar.

“Jadi, ih!” Puas ikau manyeneh auh garantong te?” auh pisek Sangomang. “Puas, puna bahalap auhe!” kuan saudagar tombah. “Jadi, ih, koan Sangomang, “Impas ih keton. Tuan putir manyingut ewau pundang je ngekeim nah, ikau manyeneh tewah garantong bara istana toh!” kuan Sangomang. “Yoh, toto.” kuan saudagar. Tinai auh Sangomang : “En rugi pundang je ngekeim nah, awi tuan putir manyingut ewau pundangm?” “Dia.” kuan tombah saudagar. “Ye, amon kilau te perkara toh hapus, ikau dia rugi, jadi dia perlu maharaja manganti ewau pundangm dengan garantong, ikau jari manyeneh auh tewah garantong je bahalap auhe bara kapalmu kanih, mahin dia mamparugi karajaan toh.

Mahining auh Sangomang kilau te sama mandam oloh are, hengan awi kapintar Sangomang mamutus perkara te. Saudagar palus balaku maaf tuntang paramisi buli awi ie mahamen angate.

PETEH PENYANG :

1.      Belum ela lalau bukih, bisit dengan oloh beken, awi panatau dia bakae imbit matei.

2.      Keleh sinta sama arep, mambagi berkat rajaki akan oloh beken je puna toto patut ie manarimae.

3.     Ela itah balaku ganti rugi amon puna dia marugi itah. Awi puna tau goreng pundang itah, papui balasan, tau manampa belai kuman kula babuhan itah.

4.   Ela lalau bakoho kilau saudagar te, mikeh kareh tau molitik ramon panatau oloh beken. Tege  auh Hatalla, ela mipen ramon oloh.

5.      Keleh pintar tuntang harati, belom bujur buah, indu karajin oloh are.