DISKOMUNIKASI

BELAJAR BAHASA DAERAH di mana kita tinggal itu PENTING.

(Kisah Nyata)

Ada seorang dokter yg baru ditugaskan di suatu desa, ia berasal dari suku lain yg belum mengerti bahasa daerah itu.

Suatu hari ada seorang ibu yang sakit datang kepada dokter tersebut untuk berobat.

Si dokter bertanya kepada si pasien, "ibu sakit apa? Apa keluhan ibu?"
Pasien menjawab, "saya sakit, "pehe hapus biti bereng" (ibu menjawab dalam bahasa daerah yg artinya "sakit seluruh tubuh")

Dokter tidak mengerti, kembali bertanya, "ibu sakit apa?" pasien juga kembali menjawab "saya sakit, "pehe hapus biti bereng"! (dengan nada semakin keras)

Dokter tetap tidak mengerti, berulang kali pertanyaan yg sama dan jawaban yg sama. Akhirnya dokter berkata : "susah ngomong dengan orang di kampung ini!"

Si pasien pun menjawab, dengan hati kesal, "tidak ada yg "susah" di kampung ini dokter!" "Orang kampung ini, punya TV yg "lir-lar", punya radio yg "ngir-ngar", banyak kapal yang "maju - miar" (maksudnya TV yg gambarnya "lir-lar / bercahaya, radio yang suaranya ngir-ngar / suara keras, dan kapalnya bernama "maju - miar").

Akhirnya si pasien pulang dengan kesal dan batal berobat, sementara dokter bingung sendiri.

Hahahaaaaaa.........

Indu Sangumang Umba Manggetem Parei

INDU SANGUMANG MAJA PASAH TANA

Metuh jaman huran tege kesah, ije tambi karu-karus mambesei. Ie te mambesei kabuate. Ampin tambi te asi-asi, baju pakayae risai rewei asi-asi tutu.

Katika sasadang ambu andau, tambi je mambesei te, mahalau i je tana oloh. Balalu tambi tuh, tende intu batang talian oloh je tempun tana te.

Sana tambi te mahuruk jukunge, ie palus lumpat, manyengok oloh tempun tana. Ie manampayah pasah oloh, ampie benyem, balalu tambi te mangahau oloh hung tana te : “ Oiii…. tege kah oloh intu tana tuh…?” kuan tambi te. Salenga tege tumbah bara bentuk tana. “Oiii…. tege ih, ikei tuh rahat manggetem parei. Ka hetuh!” Auh tumbah te.

Ye, palus tambi te, mangguang auh oloh je tumbah nah.
Sana sampai bentuk tana, puna tutu, metuh oloh tempun tana rahat manggetem parei. “Oi … esu…! tau aku umba manggetem.?” kuan tambi te. “Tau bewei tambi, narai kasalae!” kuan oloh tempun tana. “Yoh, are tarima kasih ih. Aku tuh umba manggetem, dia kareh manduan upah, baya awi aku balau kanai, barangai amun aku ulih umba sinde kuman dengan ketun tuh.” kuan tambi te asi-asi.

“Amun kilau te, tambi, nauh ih tambi mentai intu pasah ih, dia usah umba ikei manggetem. Kareh itah kuman intu pasah kanih haya-hayak. Tambi dia usah manguli, umba manggetem parei tuh.” kuan oloh tempun tana.

“Dia, esu…. aku dia tau kuman amun aku dia bagawi, barangai ih aku isut mandohop manggetem.” kuan tambi te. “Yoh, ih, amun kilau te kanahuang tambi.” kuan oloh tempun tana.

Ye, kajariae, tambi te umba kea manggetem parei. Haranan kabakas tambi te barangkah, ie baya dinun ije palundu ih parei je ingeteme. 

Pas bentuk andau, katika malayan bara gawi, oloh tempun tana, mimbit tambi te akan pasah. “Ayu tambi, itah akan pasah helu, malayan tuntang kuman helu, bari panginan jari simpan intu pasah kanih.” kuan oloh tempun tana te.

Sana sampai intu pasah, ewen uras kuman, sambil kea oloh tempun pasah misek, bara kueh asal tuntang jalanan tambi te. Ye tambi te mansanan, basa ie bara lewu ije kejau, jalanae halisang, awi balau kanai, ie tende intu tana tuh.

Sana limbah kuman, tambi je umba manggetem parei te, balaku paramisi buli, kuae : “Ooo… esu… aku handak paramisi buli helu, awi aku handak manuntung jalanangku akan ngaju tinai. Aku are manyewut tarima kasih, tagal kajenta-kajurah ketun, kea hakun mimbit aku manggetem parei, aluh pandinungku isut bewei, tuntang ketun jari mampakanan aku.”

“Dia narai ih tambi, puna itah belum patut hakadohop. Ikei hanjak tagal tambi tau dumah maja intu pasah tana ikei tuh.” kuan oloh tempun tana.

“Mudahan kare tuah rajaki ketun bakarinah.!” kuan tambi te, palus ie muhun akan talian. Balalu tambi te lilap, dia katawan tintu darie.
Oloh tempun pasah tana, tajongon manampayah tambi te palus lilap. Balalu ewen mariksa palundu je hapan tambi te manampunan parei je ingeteme nah.

Oloh tempun tana, tarewen sabanen, sakalinya palundu te uras kuntep bintap amas. Harun ewen tempun tana te barerndeng, palus manyewut tambi je umba manggetem te “indu Sangumang”, je namunan arepe kilau oloh je ampie bakas ongko, asi-asi, tapi manenga rajaki akan oloh je bahalap ateie.

Oloh tempun tana te, manjadi oloh je tatau sanang tagal kare amas je nenga indu Sangumang akan ewen nah.

Peteh Penyang :

1. Itah belum patut mahurmat, marege oloh beken, mahin tinai amun oloh te bakas ongko, asi-asi.

2. Oloh je manyarungan, mampakanan oloh beken dia akan rugi, malah mandahang kare tuah rajakie.

3. Amsal 11:24-25 “Ada yang menyebar harta, tetapi bertambah kaya, ada yang menghemat secara luar biasa, namun selalu berkekurangan. -- Siapa banyak memberi berkat, diberi kelimpahan, siapa memberi minum, ia sendiri akan diberi minum.”

Sangumang Vs Maharaja

SANGUMANG batanding misi malawan MAHARAJA 

Huang sinde andau te Sangumang mimbit laok kambulat ije katusuk mananjung mahalau baun istana maharaja. Tara tampayah ih awi maharaja. Haw! haw! lalehan karen laokm Sangumang, bara kueh ikau dinue ken? kuan pisek maharaja. Oh, dinungku misi ma, kuan Sangumang. Haw, narai ampie umpae? “Oo, umpan sayat enyak bawui.” kuan Sangumang tumbah maharaja, “Haw iye kau, tau aku cuba jewu,” kuan maharaja.

En ikau misi kealah jewu kuan maharaja dg Sangumang. Misi kea ma, kuan Sangumang. En kue batanding jewu, eweh paling karee dinun?! Ayo kuan Sangumang. Sip te! kua maharaja, hayak kue jewulah?! Takan ih ikau helo, kuan Sangumang. Aku tau sayup, awi bawui je pateiku jewu 3 jari kakapal enyake, tau sayup kea aku maharague. Yoh ih kuan maharaja.

 Hung hanjewu andau te maharaja sene-senah bara baun human Sangumang, manyelek en jadikah Sangumang  mampatei bawui ah. Salenga tara hininge : "Koek! Koek! Koek... ngek-ngek. Ooooooeeeek!!!!!!! Ye te! kuan maharaja jari ndai Sangumang mampatei bawui ah. Toh gilir ayungku. Aku harus mampatei bawui labih hai bara ayun Sangumang, 4 jari kakapal enyake!!!!

Maharaja mahiris enyak bawui je pateie, tampunae ije keba. Toh aku mamisi batanding dengan Sangumang eweh je paling kare dinu. Pasti Sangumang kalah! Kuan maharaja huang ateie. Te maharaja tolak ndai mamisi, palus mamasang umpan enyak bawui (kakapal 4 jari) nah, palus malabuh pisie akan danau.

Sakalinya Sangumang nah, lecak ih mampatei bawui kau, je tarahining maharaja koekkoekkoek! nah awi mukul Sangumang hapan uwei rombak bawui te, ihate mampaharap maharaja. padahal dia ie pampatei bawui, ihat mampaharap/mananjaru maharaja.
Limbah te, Sangumang tulak palus mimpa intu rewa, manangkilik maharaja, malabuh pisie. Sangumang pura-pura kea malabuh pisie, pura-pura majar laok, "te ye!!" hai tuh...! Ceh-ceh...!! baliwus laok te, Sangumang pura-pura mangeleng kuluke. Hung silan kanih maharaja malabuh pisie umpan enyak bawui.

Te Sangumang palus maneser, manangkiri enyak bawui hapan tetek bua botong, palus ie manyintak isin pisi maharaja. "harujut pisin maharaja" Te, Ye! kana! kuan maharaja, palus manyintak : Kayah balapas lauk hai te, sana manampayah, boh ... lehae je bua botong, sala duan umpan aku tuh kuan itung maharaja." Pasang tinai umpan enyak bawui, sampai dinun lauk hai! kuan huang maharaja.Dia maharaja katawae je manutuk tuntang manangkiri umpan enyak bawui dengan bua botong te Sangumang.

Singkat kata-singkat cerita : lepah 1 keba enyak bawui maharaja, 1 kongan mahin jatun dinun laok. Buli maharaja ka istana parak kutum-kramuhu baue. "dia tapalawan kea ake ku Sangumang kau mamisi" kuae hung ateie.......???????!!!!!!!

Sangumang kea buli akan huma palus mampakasak enyak bawui je ije keba, tangkiri dengan bua botong.

Peteh Penyang :

1.      Keleh sakula tutu-tutu nakara tau manjadi oloh je pintar tuntang harati, dia purah impahumung oloh.

2.      Ela kea kilau Sangumang je marapus/mananjaru maharaja, pasie, itah badosa amun marapus-marugi oloh beken.

3.      Keleh belum bujur buah, kuman bara pangulih itah je imberkat Hatalla. (Mazmur 128 : 2 : “Ikau kareh kuman bara hasil gawim, belom tatau sanang tuntang mangat.”)

Tarantang Sawang dengan Tarantang Talali

TARANTANG SAWANG dengan TARANTANG TALALI Mampatei Ijin Kambe Hai

(sumber : Berkat Saha)

Tege due hampahari, je inggare Tarantang Sawang (tambakas) dan Tarantang Talali (andie), ewen te anak nule. Hung ije katika ewen ndue handak tulak malan, hung tana likut lewu, t

ana ewen te kejau tutu, janda-jandau tanjung pai.

Hayak tampalawei andau, Tarantang Sawang dengan Tarantang Talali tulak akan tana. Pas kea ewen ndue sampai puduk pasah andau jari halemei. Ewen ndue lumpat pasah, palus malekak kare puat, marasih pasah te. Metuh ewen ndue handak barapi manjuhu, ewen ndue manggau ‘kambapi’ (korek api) sakalinya kambapi ewen ndue balihi, mawi dia tau barapi.

Tarantang Sawang palus hamauh dengan andie Tarantang Talali, “Oi.. andiku Tarantang Talali, aku barima handak buli helu akan lewu, manduan kambapi (korek api) akan kue, awi dia tau barapi kue, amun aku dia buli manduae. Ikau mentai melai pasah tuh ih, Ela kakue-kueh.” Kuan Tarantang Sawang dengan andie. “Yoh… aka… “ kuan Tarantang Talali tumbah. Ye, Tarantang Sawang balalu tulak buli akan lewu, batisa Tarantang Talali kabuate melai pasah te.

Andau jajuan kaput, Tarantang Talali melai pasah parak kaput pijem. Angat ungi-ungin, kabuat melai pasah te. Lembut kea kikeh Tarantang Talali. Jajuan ambu alem Tarantang Sawang palus hindai dumah.

Haranan kikeh Tarantang Talali, palus atun tiruke mantehau kakae Tarantang Sawang palus ie hamauh : “Oiii…. aka ku Tarantang Sawang……. Maram Burung dia tara tinu……. Kembang Behas dia tara Rapi…. Awi manduan Korek Api…!” Salenga tege auh tumbah : “BAAA……. KUUMMMM…!!!”

“Auh narai te….?” kuan atei Tarantang Talali. tapi magun tinai ie mantehau kakae :
“Oiii…. aka ku Tarantang Sawang……. Maram Burung dia tara tinu……. Kembang Behas dia tara Rapi…. Awi manduan Korek Api…!” Salenga tege auh tumbah tinai: “BAAA……. KUUMMMM…!!!” (sakalinya je tumbah te IJIN KAMBE HAI ).

Rik… rak… kare batang kayu bapelek Ijin Kambe Hai mangguang Pasah Tarantang Talali, sambil hamauh kueh oloe je mantehau te nah..?

Narai jajuan manjadi kikeh Tarantang Talali mahining Ijin Kambe Hai, mangguang pasah. Balalu Tarantang Talali mambalun arepe hapan amak tilam, manyahukan bara Ijin Kambe Hai.

“Kueh iye…? tege angat ewaue hetuh.” Kuan Ijin te. Jajuan ngarekot Tarantang Talali rombak tilam. “Tuh ye!! tege ewaue.” kuan Ijin te. Sundau Ijin Kambe Hai, Tarantang Talali je manyahukan arepe.

Narai taluh ati….. lepah misak-mindit, kinan-enta awi Ijin Kambe Hai, Tarantang Talali te. Lepah biti bereng Tarantang Talali, ie matei awi Ijin Kambe Hai, jatun batisa. Ijin Kambe Hai balalu buhau akan himba limbah besuh kuman Tarantang Talali.

Kajariae dumah kea Tarantang Sawang bara lewu nah. “Oii…. andi….. aku Tarantang Sawang jari dumah.!” Jatun auh tumbah. Palus Tarantang Sawang tame kan pasah, manggau andie jatun ati. Ie manyingah hapus pasah, uras daha ih. Balalu tarewen Tarantang Sawang manampayah je kilau te.

“Aduh…! Matei kea andiku Tarantang Talali, puna awi iji kambe hai andi ku tuh” kuan Tarantang Sawang, Parak kapusang angat, Tarantang Sawang manyingah hapus pasah, sampai akan penda pasah mikeh tege sundau pisak bitin andie. Puna tutu kea, sakalinya batisa ije tunjuk Tarantang Talali awi manjatu manselat bila pasah ewen, dia Ijin Kambe Hai payahe.

Palus Tarantang Sawang mimbit tunjuk andi te, ie namuei manggau tabib je tege mina “Danum Kaharingan Belum”. Kajariae, ie sundau kea.

Balalu Tarantang Sawang manampara mampahantis danum kaharingan belum, manumun peteh tabib te, sambil hamauh : “kipas…..kipass……. belum lengen andiku Tarantang Talali.” Salenga lembut “penang” lengen Tarantang Talali. Haluli tinai Tarantang Sawang mampahantis danum kaharingan belum sambil hamauh : “kipas…. kipass…. belum bitin andiku Tarantang Talali.” Salenga lembut bitin Tarantang Talali. Kute… hante-hante sampai lepah uras lembut, pai-lengee, biti-bereng Tarantang Talali.

Limbah te Tarantang Sawang mampahantis danum kaharingan belum melai nyaman Tarantang Talali, salenga tege tahaseng Tarantang Talali. Palus ie tarewen kilau misik bara tiruh, ie hamauh : “Boh.!! kilen aku tapatiruh lalau katahie..?” Kuan Tarantang Talali. “ Narai kare tiruh.!” kuan Tarantang Sawang, “ikau nah matei awi Ijin Kambe hai, baya batisa tunjukm ih, ye aku manggau Danum Kaharingan Belum hapa mambelum ikau tuh. “Oh… yoh..! harun aku bingate… awi aku mantehau aka… kuangku : “Oiii…. aka ku Tarantang Sawang……. Maram Burung dia tara tinu……. Kembang Behas dia tara Rapi…. Awi manduan Korek Api…!” Salenga tege auh tumbah : “BAAA……. KUUMMMM…!!!” (je tumbah te Ijin Kambe hai) ie mangguang aku palus mampatei aku.

“Dia men andi, kue mambaleh bunu sinde tuh. “Ayo…. asa kare pisau… mandau….lunju… kare pakihu… narai bewei je atun melai pasah tuh….. “sampai kiri-kirip, banyihi… malarap bulu..!!” Kuan Tarantang Sawang dengan andie.

Ye ewen ndue ma-asa kare pisau - mandau - lunju sampai banyihi. Limbah te Tarantang Sawang hamauh dengan andie. Ayo… andi… ikau hamauh kilau mantehau aku nah, uka Ijin Kambe Hai dumah manalih pasah tuh, amun iye jari tame pasah, te kue manejep .. mamunu Ijin te.

Nampara ih Tarantang Talali hamauh : “Oiii…. aka ku Tarantang Sawang……. Maram Burung dia tara tinu……. Kembang Behas dia tara Rapi…. Awi manduan Korek Api…!” Tege auh tumbah : “BAAA……. KUUMMMM…!!!” ye te andi, dumah Ijin Kambe hai, ayu tehau tinai kuan Tarantang Sawang. Narai taluh ati, puna Ijin kambe Hai te dumah manalih pasah ewen ndue, sana tame Ijin te, te ewen ndue mamunu, manejep Ijin Kambe Hai te, sampai matei.

Te ye…! Matei ndai ijin je menta ikau nah. “Ayu andi… kue maraga, maluntuh akae ijin kau. Awi Ijin kau dia ie kabut, jetuh bapa Ijin Kambe Hai pasti tege sawae tuntang anake.

Ye, ewen ndue maluntuh isin Ijin Kambe hai te, ije ka kawah (rinjing je hai).

Pea kahureh, dumah kea Ijin je bawi tuntang anake. mahalau pasah ewen ndue. Ijin te misek. “Oiii… ketun olon kalunen..en ketun tege payah kabalingku, apang anakku tuh..?“ “Yoh… puna tege …. haw… palus kapasah helu…. kuman mihup tege balut mangat hetuh…!!” Kuan ewen ndue dengan Ijin te. Ye, indu ijin dengan anake tame akan pasah, palus nyarungan ewen luntuh isin ijin je ije kakawah nah (dia indu ijin te katawan jete isin banae).

Rami, puna lip-lap sinde indu ijin dengan anake kuman. “mangat tutu balut ketun !” Kuan ijin dengan ewen ndue. “Yoh, dinun ikei mandup endau.” kuan Tarantang Sawang dengan Tarantang Talali.

Metuh anak ijin te kuman, salenga takarope, tunjuk luntuh ijin te… “Boh,,, lehae nah indang, kilau tunjuk apangku ampie tu..” kuan anak ijin. “ela-lalau habut..!!” nyurup-nyurup bei, meam je mangat tuh.!” kuan indu ijin.

Dia, pire-pire, tasumput tinai bawak matan ijin je buah luntuh nah. “ Haw… indang…. lehae, je kilau matan apangku tuh.?” kuan anak ijin. “Ela habut anak..!” Kuman-kuman ih mangat tutu angate. ayu kinan palepah.

Puna dia tara tukas je panginan ijin, lepah ije kawah te, sampai besuh bangai indu ijin dengan anake, sampai ewen ndue tapatiruh kabesuhan. Narai taluh ati, metuh indu ijin dengan anake batiruh, te Tarantang Sawang dengan Tarantang Talali, mamunu, manejep mampatei indu ijin dengan anake te.

Sana jari matei Ijin kambe hai, je hatue, je bawi tuntang dengan anake, te Tarantang Sawang dengan Tarantang Talali salawah atei huange. Ewen kajaria belum mangat awi kacangkale bagawi, tuntang lewu ewen puna landang jatun Ijin Kambe Hai je bahanyi manderuh oloh lewu te.

LEPAH KESAH

Peteh Penyang :
1. Amon itah manguan tanjung jalanan, keleh mariksa helu taluh bahata itah, ela sampai lihi-lihia. Taluh je kurik haliai, kilau kambapi puna baguna, awi te keleh titip tarah, bele purung parang manganan katika, malah tau manyasat itah.

2. Melai kabuat puna dia mangat, tapi amun puna kabuat ela kikeh lalau manjadi. Keleh Balakudoa, manyarah akan Hatala Pangkahai Tuhan.

3. Amun itah bujur buah jatun bara kasalan, tege ih ampin jalan tuntang pasin Hatalla mandohop itah.

4. Bahanyi awi tutu, mamut, menteng ureh awi mabela kabujur tuntang katetek.

5. Cangkal bagawi, belum pintar harati tau manyanang pambelum itah, tuntang baguna akan tundah pahari.

Bajai Moroi -- Bawi Kuwu Tumbang Rakumpit

BAJAI BARA MOROI handak Manalih BAWI KUWU TUMBANG RAKUMPIT

(Sansana tuh bara : DURSAM, oloh bara sungei Moroi)

Hung jaman huran tege ije bajai, bara Sungei Moroi (anak sungei Kapuas) handak mangguang Bawi Kuwu Tumbang Rakumpit, awi tarung saritan oloh tahiu kahalap Bawi Kuwu te.

Bajai tuh, handak ie masuh sungei Kapuas, palus akan tumbang Sungei Kahayan, limbah te murik sungei Kahayan, palus tame sungei Rungan, kuan itung Bajai, “lalau kakejauku, awi maliut.” “keleh aku manduan jalan “metas” ih, manyuru jalan hunjun petak.”

Ye, Bajai te, manatap kare bahatae. Ie bahata uju katangkal isin tampahas, akan panginae huang jalanan tamueie.

Bajai te manampara tanjung teteie bara sungei Moroi, mahantas manyuru jalan hunjun petak, dimpah ruak, lumpat datah, manukat bukit, muhun luau, uras inyuru, awi puna hajat niat manyundau Bawi Kuwu je batarung basewut te.

Metuh Bajai sampai hila likut lewu “Dahuyan Tambuk” (benteng sungei Kahayan), ie hasundau dengan ije kungan Palanduk. Palus kea Palanduk te, maningak Bajai. “Haw… narai jalanam “nger”? kuan Palanduk misek. “Aku tuh bara sungei Moroi kanih handak manyundau Bawi Kuwu Tumbang Rakumpit, awi tarung saritan oloh, puna ie Bawi Kuwu je bahalap.” kuan tumbah Bajai.

“Ooo….. magun kejau jalanam kau nger”! kuan Palanduk. Haw… ie lah..?” en narai je kanih je rana-ranang… dia je sungei Kahayan lah?” pisek Bajai. “Ampie tampayahmu ih nger.…. je tukep, awi ikau jari heka…. magun kejau sungei Kahayan, mahin tinai amun ikau dimpah akan sungei Rungan.!!” kuan Palanduk mananjaru Bajai. “Narai bahatam nger.?” kuan Palanduk misek. “Aku tuh bahata uju katangkal isin tampahas, tuh due katangkal ih tisae.” kuan tampahas. “Heh’…. amun bahata due katangkal kau, terai nger… dia bakae ikau ulih manyampai sungei Rungan….. baya-baya ikau sangkarah melai hunjun pasir kau ih…. mimbit pampateimu ih.!!” kuan Palanduk. Keleh ikau mules buli akan Moroi kanih ih.” kuan Palanduk . “Haw…! iye kah..?” kuan Bajai. “Amon kilau te keleh aku mules ih.” kuan Bajai tinai.

Metuh Bajai handak mules akan hila Moroi, palus leta-letar nyahu kilat, ujan papak panggar, andau manyaluh taluh handiai, ye salenga Bajai saluh jadi batu, Palanduk jadi batu, tangkal isin tampahas jadi batu, uras saluh jadi batu.

Manumun kesah oloh, intu likut lewu “Dahuyan Tambuk”, tege je bagare “Batu Palanduk”, Batu Bajai”, “Batu Tampahas”.

Lepah Kesah.

Peteh Penyang :

1. Amun manguan jalanan, tamuei, tuntang kare hajat niat, keleh tutu-tutu barima, maitung bujur buah, bele sasat huang benteng jalanan.

2. Ela kilau Palanduk je mananjaru, maningkes oloh, pasin oloh mambalang kare hajat niate.

3. Ela murah percaya pander saritan oloh, awi huang pambelom tuh are je tau manaripi tuntang maningkes itah, je tau mambalang kare taluh gawi tuntang jalanan itah.

4. Sahelu bara manampa jalanan, keleh itah balakudoa, manyarah taluh handiai akan Hatalla Pangkahai Tuhan, uka ingejau bara kare calaka tuntang bahaya.

Nule Andi inyasah Sapundu

NULE ANDI dengan SAPUNDU

(Sumber : Deddy Shera )

Katika huran tege ije lewu inaripi awi peres panyakit je paham tutu, mawi are oloh lewu te haban palus matei. Bakas tabela, bawi hatue uras buah. Belahe are kea oloh lewu je buhau malihi lewu te mahakan peres panyakit te, batisa ije biti anak bawi, je magun belum (indue-bapae matei kea, awi peres panyakit te), anak bawi te magun batahan melai lewu te.

Anak bawi je batahan melai lewu te, inggare “Nule Andi”. Ie puna tutu paham pehe ateie, awi oloh bakase jari nihau, tuntang tundah kulae, kea papire biti oloh lewu te buhau bara lewu malhi ie kabua-buate.

Parak kapusang angat atei, Nule Andi mananjung mangumbang lewu je benyem tunis. Metuh ie mananjung, Nule Andi mahalau ije Hampatung Sapundu je atun melai saran jalan. Awi Nule Andi mangkeme angat ungi-ungin, balalu lembut huang ate Nule Andi, handak manangkenya hampatung sapundu te. Itung huang Nule Andi, hampatung sapundu tuh barangai akan indu kawale.

Palus Nule Andi hamauh dengan hampatung sapundu te, “Oii sapundu…jaka ikau tuh belum, manjadian arepm belum indu kawalku melai lewu tuh..?” kuan Nule Andi, kute hante-hante ie manangkenya hampatung sapundu te.

Haranan kaheka biti bereng parak kapusang atei - itung pikiran, kajaria Nule Andi tapatiruh tukep upun hampatung sapundu te.

Huang tiruh Nule Andi, ie salenga manupi hasundau dengan hampatung Sapundu te. Melai lewu nupi ampin sapundu te bakaike-ikeh, baue-matae papa ampie, bitie panjang hai habulu, silue sama silun kangkamiak, taringe hai sama kahain pisang salendang, bawak matae randa-randang tuntang hai lini-lining, jelae panjang, mansuluh sampai petak.

Kuan sapundu dengan Nule Andi intu lewu nupi : “iiiiii man…….”!! Kauju andau, kauju alem, aku kareh manalih ikau Nule Andi.” Auh sapundu te kute sampai hantelu kali.

Nule Andi palus tarewen sabanen, mikeh sampai haketer hagenjeh, palus ie marawus hingkat, buhau hadari, manyahukan arepe intu huang ije balanai hai.

Awi kikeh Nule Andi, ie dia bahanyi balua bara rombak balanai jete. Gagenep alem bitin hampatung sapundu te hagerek, sambil hamauh “aku handak manalih ikau Nule Andi .”!! Auh te dia ndai je nupi, tapi puna tutu-tutu, hayak hampatung te nampara belum, puna handak manguang Nule Andi. Nampayah kilau te, Nule Andi jajuan paham kikehe, dengan hampatung sapundu te.

Sapundu te genep andau nampara basaluh, isu-isut saluh lenge-pai, biti bereng, baue-matae. Tampan biti bereng bau-matee sama kilau huang nupin Nule Andi, je ampie bakaike-ikeh.

Singkat Kesah…………….Huang Andau jw kauju, Sapundu te tutu belum, palus ie manggerek bitie... palus hamauh ………….. “iiiiii man…!!!” “Alem kareh aku mangguang ikau Nule Andi"!!

Mahining auh te Nule Andi jajuan manjadi angat kikehe. Haranan kapaham kikeh Nule Andi, ie palus buhau mandari arepe bara lewu te.

Nule Andi hadari bantap baning manyalamat arepe, dia ie katawan kakueh tintu jalanane.

Metuh andau jari kaput sapundu te puna tutu-tutu belum. Palus manyasah Nule Andi je buhau nah.

Nule Andi hadari manyalamat arepe, sambil kea ie hamauh balaku dohop. “Dohop…..dohop…!!! sapundu belum manyasah aku….!!!” kuan Nule Andi parak hadari.

Ije ale-alem Nule Andi hadari, sapundu te tatap manyasah ie, sampai andau hanjewu.

Ampin asin Hatalla ngambu, tepa kea Nule Andi hasundau dengan oloh je metuh rahat malan-manana.

‘Narai mawi ikau nah pahari?” kuan oloh are te misek Nule Andi . “Dohop, dohop, aku tuh nyasah awi hampatung sapundu je belum, ie handak mampatei aku” kuan Nule Andi mansanan akan oloh are.

Oloh are je malan handak manugal te, palus manajim kare tugal, manatap kare pisau lunju hapa mampatei sapundu je mangguang Nule Andi .

Dia pire-pire, meha-mehas tuntang nyaha-nyahai auh intu himba kanih. Pandumah sapundu te hining oloh are, rik-rak kare edan tuntang pelek-peleka kare batang kayu balihang nampuh awi sapundu je mangguang Nule Andi.

Sana sapundu sampai, tukep oloh are je mentai pandumahe, palus kea oloh are te mamunu sapundu, belahe hapan tugal, belahe hapan liunju, belahe hapan kare pisau manejep sapundu te. Oloh are hakadohop mangarubut sapundu je panjang hai te.

Kajariae matei kea sapundu je mangguang Nule Andi nah.
Limbah te Nule Andi balalu umba oloh lewu je jari mandohop ie nah. Ie belum dengan uluh melai lewu te sampai ie kawin, tuntang manak manjaria hung hete.

Pambelum Nule Andi melai lewu te ampie puna bahalap tuntang ie belum sanang mangat tuntang akan karajin oloh are.

Peteh Penyang :

1. Hung pambelum itah tege kajake-kasusah, kare peres panyakit je tau manaripi pambelum itah. Keleh itah sabar, tuntang manyarah jete akan Hatala Pangkahai Tuhan.

2. Dia uras kare kanuhuang tuntang kaharap itah tau manjadi manumun kahandak itah.

3. Keleh itah barendeng tuntang ela ureh-baka dengan taluh handiai, kuasa kakaput tau maningkes itah.

4. Amun itah bujur buah, tege ih ampin pasin Hatalla ngambu, huang kajake-kasusah itah.

5. Belum kabuat puna dia bahalap tuntang dia mangat. Keleh belum pakat oloh are, awi jete je tau manyanang itah. Penyang hinje simpei, handep hapakat, belum sanang mangat hung kabulat atei.

Putir Busu & Bawi Sandah (Versi II)

Putir Busu Manyaok Laok

Sinde andau Putir Busu inyuhu indange manggau laok into sungei likut lewu. “Oo… Busu.. has ikau nangkajee, manyaok laok hung sungei likut lewu kau, akan balut itah halemei tuh.!” Kuan indang Putir Busu. “Yoh… mai” kuan Putir Busu, oloh bawi je puna panumun tuntang randah ateie. Ye Putir Busu balalu tulak akan sungei likut lewu mimbit soak.

Sana sampai saran sungei, Putir Busu palus manyaok laok. Are tutu ampin dinun Putir Busu. Sasar tahi, sasar rami ampin laok kau, jajuan kejau kea tanjung, tetei Putir Busu, jajauan kejau bara lewu. Andau jari kaput Putir Busu dia tau buli, awi dia gitan ndai jalan je inetei nah.

Salenga tenge ije tambi maningak Putir Busu. “Oi …eweh je manyaok sampai kaput tuh nah?” “Aku, Putir Busu mbi! Kuan Putir Busu tumbah. Lehae... esu… kilen ikau manyaok sampai kaput kilau tuh?” “Awi … karami ampin laok tuh nah, tambi..” kuan Putir Busu.

“Amun kilau te, ikau bamalem hung pasahku ih.” Kuan tambi te. “Jewu ih ikau buli awi jari kaput pijem, dia gitan kare jalan.” “Yoh… mbi!” kuan Putir Busu.

Melai into pasah tambi te Putir Busu palus marasih-manyiri laok je dinue nah, balalu mananak laok te. Laok jari masak, Putir Busu dengan tambi te kuman. Limbah kuman ewen ndue basasurah hanjulu, limbah te palus batiruh. Sana adau sawah Putir Busu dengan tambi misik.

Putir Busu handak paramisi buli dengan tambi. Sahelu bara Putir Busu buli, tambi manenga ije pundut tuntang ie mameteh dengan Putir Busu, kuae, “Ikau buli kan humam manyuru jalan tuh lurus bewei. Amun ikau sundau kambang bahalap tapi je cacat, ela ikau mutike. Intih kambang je paris bahalap. “ “yoh tambi.!” Kuan tumbah Putir Busu.

Ye, Putir Busu buli mahuru jalan je jari insanan tambi te. Hung benteng jalan Putir Busu manampayah tege ije kambang paris bahalap, palus ie mamutik kambang te. Salenga tere-tereng oloh hatue bakena balinga into balikat Putir Busu. Palus hamauh : “Aku tuh kambang je mutikmu. Aku tuh Pangeran, bara lewu Maharaja, puna jari tara surat, eweh je mamutik kambang te ie akan kabalingku.”

Putir Busu tajongon, manampayah oloh hatue bakena balinga, pangeran tinai. Palus ie manarima pangeran te. Sana sampai into huma Putir Busu dengan pangeran mukei pundut je nenga tambi nah, sakalinya kuntep amas-hintan-salaka, kare galang tisin rantai, batu je barega. Hanjak ewen ndue, manjadi akan katatau kasanange. Ewen ndue mandohop kare anak nule tuntang kare oloh je pehe belum.

Katatau Putir Busu tuntang ie je sundau pangeran nah, tara hining awi Bawi Sandah. Ye, ie misek dengan Putir Busu narai buku-sabab, hurui-paretei mawi ie tatau sanang, tuntang dinun pangeran. Paksa kea Putir Busu mansanan akan Bawi sandah.

Tagal kakuhu tuntang kajuhu Bawi Sandah, basa ie dia nahuang kalah bara Putir Busu, ie gulung manalih likut lewu mimbit saok tuntang manyundau tambi je manenga pundut te nah.

Tutu kea laok dinun, tuntang hasundau kea dengan tambi te, je mimbit kea Bawi sandah bamalem hung pasahe.

Melai pasah Bawi Sandah, parak bitak-bilai, kutum karamuhu auh baue, ie mampakasak laok parak kare rutik ih, dia ie marasihe. “lala-lalau kea je tambi tuh….!! En puna pakasak akae harue ie tau manenga pundut te..??!!” kuan atei Bawi Sandah. Balut puna masak kea. Ewen ndue kuman, limbah te batiruh.

Hung anda hanjewu. Puna kilau kaharap Bawi Sandah, tambi manenga pundut, tuntang peteh je sama kilau akan Putir Busu.

Bawi Sandah dia sampet paramisi dengan tambi, palus bis!! Tulak buli mahuru jalan je inintu te.

Puna ie sundau kea dengan kambang bahalap, tapi dia paris tuntang dia tinduh. Bawi Sandah palus mutik kambang te, salenga saluh manjadi oloh bakas ongko. Kuan oloh bakas te : “Puna jari tara surat, ikau je mamutik kambang te, akan indu sawangku.”

Bawi Sandah dia ulih mahila, ie manumun kea, palus ewen ndue mukei pundut je nenga tambi nah. Hakarang …! Huang pundut te, sakalinya sarangan bajanyi. Narai taluh ati, Lepah kembang muau, baun-matan Bawi Sandah buah pepet kawan bajanyi. Bawi Sandah hadari bantap-baning manyalamat arepe.

Dia tara hila kea Bawi sandah haban tuntang pehe manyarenan limbah buah rubuh bajanyi te. Puna ampin upah oloh je sakakar (bakuhu), tuntang bajuhu, dia tau mahaga bawak kutak tuntang karandah ateie.

Peteh Penyang :

1. Keleh itah kilau Putir Busu je mahian pai-lenge, randah atei tuntang bujur buah.

2. Ela kilau Bawi Sandah je bahiri, bakuhu, bajuhu tagal ramu panatau oloh beken.

3. Keleh itah basyukur dengan je atun into itah. Amun handak manggau kalabie nah, keleh manintu jalan je bujur buah.

4. Itah keleh mahining peteh penyang, tingak ajar je bahalap hayak manumun jete.

5. “Pahari handiai je inyinta, keleh manantuani hal toh bua-buah! Buah gagenep oloh bajeleng mahining tapi barangkah hakotak tuntang barangkah balait.-- Oloh je balait dia tau malalus taloh bahalap je manyanang atei Hatalla. -- Tagal te, kanan kare hadat je papa tuntang dia bahalap. Keleh manarima hapan karandah atei auh je inawur awi Hatalla hong atei keton, basa auh te aton bara kaabas hapan manyalamat keton.” (Yakobus 1 : 19-21)

Abunawas Maja Lewun Maharaja

ABUNAWAS MAJA LEWUN MAHARAJA

Sinde andau Abunawas handak maja lewun maharaja, awi mahining tarung sarita oloh, lewun maharaja te sasar rami.

Ye, Abunawas manatap kare bahatae, manabe kare oloh lewu, mansanan arepe basa ie handak maja lewun majaraja.

Kuan Abunawas dengan oloh lewu : “Oii ketun je atun, aku handak halisang, jalanangku maja lewun maharaja, awi tarung sarita, wayah tuh lewun maharaja puna sasar rami. Tuh aku mimbit kare bua pisang, rambai, dahuyan sepsimpan kare bua, akan tambang amaku maharaja.” “Yoh, babuah ih ingauan jalanam.” kuan oloh lewu. “Ela talingau lah, mimbit tambang (oleh-oleh) kea bara lewu maharaja, ikei mentai pandumahmu kareh.” kuan oloh lewu te tinai. “Yoh…..dia men ih, musti aku mimbit tambang akan ketun.” kuan Abunawas.

Abunawas palus tulak malihi lewu humae manalih lewun maharaja. Sana sampai lewun maharaja, Abunawas puna hanjak manampayah ampin karami lewu te. Abunawas tanjung tunja mangumbang lewu, sasadang kala’u kanai, sambil kea kuman bua je bahatae akan tambang maharaja. Haranan katahie Abunawas mangumbang lewu manampayah karami, lepah kea bua, pisang, rambai, dahuyan tuntang bua je beken.

Harue Abunawas, tarewen. “Boh kai kalayaku tuh nah, dia ndai je aku maja marusik amaku maharaja, lepah sama sinde bua tambang tuh.”  kuan Abunawas. Nauh, dia usah mimbit tambang, aku tatap maja marusik ama.” kuan Abunawas. Tapi alem jari gantung.

Abunawas manegah baun tunggang istana maharaja.... “dir...dar..!! sinde auh tegah te. “Oo... ma!!! Oo... ma!! dar….dar…darr !!!! aku Abunawas handak maja marusik ikau..!! Aku dumah bara lewu kejau..!! Kombak kariak Abunawas mantehau maharaja.

Tepa kea takisik maharaja metuh rahat manupi bahalap. “Eweh arae je maja gantung alem kilau tuh??!!” Manegah baun tunggang dia bahadat sama sinde.??!!” kuan maharaja. Parak kasangit atei maharaja muap baun tunggang huma. Sana nampayah, tere-tereng Abunawas intu baun bantunggang huma.

Narai taluh ati, “pik! pak!” kapek tampeleng maharaja intu kuluk Abunawas. “kurang ajar ikau tuh, dia bahadat maja gantung alem, manegah atep dir dar sinde.”! Ayu buli kanih ikau!!! manderuh tiruh kare nupiku ih..!!” kuan maharaja malait Abunawas.

Abunawas suntup mahamen balalu buli akan lewu humae.

Sana andau sawah, oloh lewu mahining Abunawas jari dumah bara lewun maharaja. Ewen handak mahing auh saritan Abunawas, kea handak balaku tambang (oleh-oleh) bara lewun maharaja.

“Narai kabar Abunawas?” pisek oloh lewu. “Bahalap ih” kuan Abunawas. “Yoh, ikei tuh handak menuntut janjim, mimbit tambang bara lewun maharaja nah.” kuan ewen. “Tege” kuan Abunawas.

Ayu ketun uras mendeng mambaris arep ketun, kareh aku manenga akan ketun narai je inenga maharaja akungku male.” kuan Abunawas. Ye, oloh are sama matur arepe, mendeng babaris.

Abunawas bara hila saran baris te, palus “pik! pak! auh kapek tampeleng Abunawas, uras genep biti buah kapek tampeleng. “Boh!!! narai je kilau tuh nah Abunawas??” kuan oloh are misek heran.

“Boh.... je tuh ih je inenga amaku maharaja male. Ye kapek tampeleng tuh, ketun balakue, aku manenga akan ketun.”  Oloh are sama mandam. jetuh dia kare tambang, tapi mawi takuluk kembang kuan oloh te.

Lalau kea je Abunawas.

Peteh Penyang :

1. Keleh malalus gawi, tanjung jalanan, kare itung huang bujur buah, uka sampai kanahuang.

2. Ela laya tagal karamin dunia tuh, tau mambalang kare hajat niat, kare rencana tuntang cita-cita, awi tau manyasat-mangampehe arep kabuat.

3. Amun maja marusik oloh paya-payah waktu-katika, ela metuh oloh batiruh, manderuh kare tiruh kantuk, istirahat oloh.

4. Ela itah mambaleh kapehen itah akan oloh beken. Kinjap oloh awi kajake-kasusah ayue palus ie mawi kasusah kapehe akan oloh beken kea. Kuae : “mangat sama kemee” Ela kilau te. itah oloh je baagama harus sinta sama arep, tuntang sabar manyarah taluh handiai akan Hatalla Pangkahai Tuhan.