KAHIU II

K A H I U II

KESAH JETOH BEKEN BARA KESAH JE SOLAKE,
KESAH HALI-HALIS TAPI BEKEN KATIKA TUNTANG EKA.

Into ije lewu aton ije kabali baluh harun mangabali arep ewen ndue. Ewen due handak kea bajar mambelom arep, maharagu huma serok tuntang mamangun pasah ewen ndue kabuat. Ewen due mampendeng puduk pasah eka ewen ndue melai saran lewu. Genep andau ewen basatiar bausaha manggau akan ongkos balanja ewen ndue. Punae harun bajar mambelom arep kuan oloh bakas nah, daras kea ewen ndue te bapikir, narai ampin riman satiar je patut.

Pire-pire bulan jari mahalau, sawae te nampara mimbit arepe (batihi). Kuan itung atei banae te, “narai gawi je patut je tau mahasil duit je niha kea, akan manatap kabalie maluas tuntang akan pakaian anak ewen ndue kareh”. Ye kajaria banae te mamutus basatiar kabuat malihi sawae melai pasah kabuate.

Sinde andau metoh lewu te benyem, batisa sawae kabuat melai pasah, salenga dumah ije kungan kahiu hatue je hai toto. Kahiu te tame akan huang pasah bawi te, palus manawan bawi te. Bawi te dia ulih malapas arepe bara tekap kahiu je segah. Ela je lengen oloh bawi edan kayu hai mahin tau kahiu te marapake. Bawi te mangkariak, balaku dohop jaton ije biti oloh lewu mahining auh tangkariak bawi te.

Kahiu hatue te mimbit oloh bawi je nawae te akan hunjun tarok kayu hai gantung. Ampie lagu kahiu te maharagu oloh bawi te kilau sawae kabuat. Kahiu manggau kare bua kayu himba akan panginan oloh bawi te. Hung kueh bewei aton oloh manyadai pakaian, kahiu te manakau kare benang bahalai, kare baju pakaian akan oloh bawi te.

Minggu bulan baganti-ganti, oloh lewu tuntang banan bawi te manggau bawi je nihau namput kahiu te, jaton ewen sundau kea. Bawi jete jari maluas anake, tapi ampin taloh marapus anak bawi te pahingen kahiu, tampan baue matae pupus bulu kilau anak kahiu kea.

Hung sinde katika, metoh kahiu hatue te tame akan himba manggau kare bua kayu, ye oloh bawi te manuntung benang bahalai, kare baju pakaian manampa kilau tali palus mansuluhe akan ngiwa, haranan kakare benang pakaian je inuntung te sampai kea akan hunjun petak. Balalu bawi te mampuhun arepe mahapan benang bahalai je inuntunge, tepa kea ie sampai hunjun petak, tapi anake dia iye mimbite, awi tampan baue matae sama kilau kahiu.

Oloh bawi te hadari bantap baning bara parak kayu manyalamat arepe, pas ie sampai hung saran batang danum tege oloh lewu metoh bajukung mambesei. “dohop…. dohop… dohop…!!’ kuan bawi te. Ye oloh je mambesei te tende palus misek narai mawi bawi te hadari marak baue matae pucat kalas kilau hantu ih. Oloh bawi te manyarita basa ie jari namput awi kahiu, tuntang anake je pahingen te lihie melai tarok kayu kanih.

Metoh ewen basurah melai jukung, salenga hining auh melai himba kanih rik-rak auh edan barapak, pelek-peleka, narai taloh ati ewen je hung jukung palus mantuhus arep ewen akan laut batang danom mambesei, “sasat toh kahiu manyak” kuan bawi te.

Pea ka hureh, kahiu te mantajuk anak bawi te melai saran tiwing, palus marapak sapak anake awau te, limbah te kahiu manjakah silan bitin anak awau te akan batang danom, silae tinai imbing kahiu. ( ampie kilau kahiu mambagi anak te silan bitin awau akan indue je buhau nah silan bitin anak te akan kahiu je maharagu indu).

Oloh bawi te salamat bara kahiu tapi anake matei nyapak basila due awi kahiu. Eka hantun anak te kajaria nampa oloh manjadi eka karamat, je ingare oloh “Karamat Japaran” sampai katika toh tege karamat te, uka mangenang anak awau je misak awi kahiu.

PETEH PENYANG :
1. Amon jari mangabali arep (berumah tangga) bua-buah mahaga arep. Basatiar bausaha bujur tarus. Ela manalingau Hatalla, keleh halajur balakudoa, balaku asi tuntang berkat bara Hatalla.

2. Ela malihi, manalua kabalin arep metoh mimbit arepe… Banae te puna mahaga kabalie kilau mahaga ije hintan barega.

3. Aloh kanampi je anak arep puna anak arep ela malihie. aloh tampan bau matae dia manumon kaharap arep.

4. Tingkes atawa kajake kasusah je manaripi pambelom itah puna akan ajar tuntang taladan akan itah uka barendeng, jete kea keleh tau marantep itah dengan Hatalla.

KAHIU I

OLOH BAWI BUAH TAMPUT KAHIU (Kesah Toto)

Puluhan nyelo je jari mahalau, hong ije lewu korik tege oloh hatue dengan sawae belum harue mangabali arepe. Ewen ndue melai ije puduk kabuat, kejau helange bara puduk oloh are. Kare oloh intu lewo te mahin dia sapire. Huma pasah oloh lewu te dia lalau are awi kilau ije dukuh kaleka ih.

Hong sinde andau oloh are hayak andau jari balawa uras his-has maatuh kare taloh gawin ewen genep biti. Kute kea oloh hatue je harun mawi pambelome te, ie handak tulak basatiar, tuntang malihi sawae melai pasah kabuate.

Andau hanjewu je benyem tunis, baya batisa oloh bawi te kabua-buate melai pasah, salenga dumah ije kungan “Kahiu” tame akan huang pasah bawi te. Kahiu te manawan bawi jete. Ie mangombak mantehau oloh are, balaku dohop. “Dohop! Dohop!!” kuae, jaton ije biti oloh mahininge. Kahiu palus manamput bawi te akan parak kayu. Kahiu mimbit oloh bawi te akan tarok lentang gantung hai toto. Bawi te dia ulih mawat arepe, tuntang dia tau muhun akan petak awi haranan kagantung tuntang kahain batang kayu te.

Metoh andau halemei banae buli bara satiar, iye manggau sawae jaton ati. Ie mangumbang hapus lewu tuntang misek oloh. Ije biti mahin dia katawan pandarin sawae te. Alem te kea oloh lewu hapumpung hapakat narai taloh je mawi sawan oloh hatue te tuntang narai tiruk ewen manggaue.

Hung hanjewu andau oloh lewu te mantu garantong mangumbang hapus lewu, pasah dukuh, bahu, tana nyelun oloh, hapus kabun pambulan oloh uras ingumbang. Tinai tame kea akan parak kayu sambil manukyiew, mamantu garantong mantehau bawi te. ewen dia ati sundau.

Oloh bawi te sapunae mahining tuntang manampayah ih oloh are mangau ie, tagal ie melai hujung tarok kayu je gantung tuntang atep kahiu te akae nyamee, ie dia ulih ngombak manumbah.

Hapus andau baganti minggu, babula-bulan oloh lewu tuntang banan bawi te peda manggau oloh bawi je hayang te. Ewen mandawa bawi te jari hayang tuntang matei kuan ewen madue.

Hung hila himba kanih, ampie lague bawi te magun belum melai hunjung tarok lentang, iye jari maluas anake. Puna anake kilau anak kalunen ih awi metoh iye namput kahiu ie jari mimbit arepe. Kahiu hatue te maharagu bawi te kilau sawae kabuat, genep andau ie manggau bua himba akan bawi te. Tuntang kea kahiu hatue te cara manakau benang bahalai oloh lewu akan mangahuwut bawi je nampute nah.

Benang bahalai puna are toto melai sarangan kahiu tar ok kayu. Hung sinde andau metoh kahiu te akan himba kejau manggau kare bua kayu. Oloh bawi te mameteng bahalai je aton, manuntong ije-mije. palus muluh bahalai te akan penda. Haranan kakare benang bahalai je inuntung te sampai kea akan petak, palus bawi te mampuhun arepe mahalau benang bahalai te ewen ndue anake. Tepa kea kajariae ewen ndue hanak sampai petak. Sana sampai petak ie hadari bantap baning buli akan lewu, tepa kea sampai lewu. Oloh areh hengan tuntang hanjak awi bawi te magun belum dengan anake. Bawi te tujah haranan kikeh tuntang kaheka. Sana ie barendeng ie manyarita kahiu je manamput iye nah.

Ije andau tinai oloh lewu are biti manalih sarangan kahiu te, ewen maneweng kayu ekae nyarangan tuntang kahiu te impatei awi oloh are.

PETEH PENYANG :
1. Keleh belom pakat oloh are, ela rajin belom ngabuat, bahali hakadohop, tuntang bahali halaku hatenga, hatalisih. Mangat ke je pakat oloh are.

2. Amon halisang ela lalau katahie malihi lewu huma, kabali-baluh, kawan anak jarian, mikeh kajake kasasat manaripi ewen.

3. Amon itah jake sasat ela bageto kaharap. Imbit huang lakudoa. Aton jalan bara Hatalla tau mandohop itah.

4. Manga-mangat je potok galanggo, dia manyama je bua dango, manga-mangat belom intu parak kayu, dia manyama belum melai lewu.