Palanduk - Bajang Mambasa Surat Kabar

PALANDUK DENGAN BAJANG MAMBASA SURAT KABAR

Hung sinde andau bajang dengan palanduk tame rombak tambuwong. Pire-pire andau-alem jari katahin ewen ndue melai tambuwong, dia ulih balua bara hete. Munduk mendeng saraba rise jaton bara gawi.

Haranan kalepahan akal palanduk palus hamauh dengan bajang : "Terai nger!! keleh kue mambasa surat kabar ih, daripada jaton taluh je iawi kue.!" kuan palanduk dengan bajang.

"Surat Kabar kilen?" kuan pisek bajang. "Boh surat kabar bahut" kuan palanduk. "kueh ati kare surat kabar melai rombak hetu nah!!" kuan bajang. "He' kau nah Surat Kabar!" kuan palanduk, sambil manunjuk dawen suli je rehe-rehet awi bitik.

“Kanampie itah mambasa tulisan melai dawen suli kau uras harinjet ampie?” kuan pisek bajang. “Boh, mangat ih,” “hetuh aku mambasa akan itah.!” kuan palanduk.

Ye palanduk palus manduan ije kalambar dawen suli te, palus ie nampara mambasa :

“Dawen katutara…. dawen katutari….. mambasa datuh….. surat bahari……..”
“Dawen katutara…. dawen katutari….. mambasa datuh….. surat bahari……..”

Kute hante-hante auh bawak kutak je imbasa palanduk akan bajang. Hengan kea bajang. “Tamam ikau ngerlah tau mambasa surat kabar tuh, aluh bara dawen suli. Narai rimae nger?”

Salenga tabuka untek palanduk, palus ie dinun akal balua bara tambuwung te. “Anu sanger….. kutuh rimae auh te : “uka kue tau balua bara tambuwong tuh, ikau munduk helu, kareh aku lumpat hunjun likutm, limbah te ikau mendeng, bara hunjun likutm aku ulih lumpat akan hunjun petak, balua bara rombak tuh. Kareh aku mimbit surat kabar tuh akan oloh, uka oloh tau mandohop mampalua ikau bara hetuh.” Kuan palanduk.

“Haw… patut te nger.!” kuan bajang. Ye bajang munduk, palus palanduk lumpat hunjun bajang, sana bajang mendeng, balalu palanduk manangkajuk akan ngambu. “cipp!! sampai kea tumbang rombak tambuwung te. Palanduk salamat bara tambuwong. “Ayu nger dohop ngabar akan tundah paharingku, uka ewen mawat aku bara tambuwong tuh.!” kuan bajang bara rombak. “Yoh nger ! tuh aku mimbit surat kabar tuh akan mansanan barita tuh!” kuan palanduk.

Palanduk palus buhau, sambil manggerek bulue, ie hamauh : Huuhh…hurehh..! Punae oloh je dia tau mambasa, buah kamamehku.!” kuan palanduk. Sampai andau alem tuh dia itah katawan kanampie kabar bajang hung rombak tambuwong te.

PETEH PENYANG :

1. Keleh itah balajar toto-toto mangat pintar tuntang harati.

2. Raji-rajin mambasa Surat Kabar, mahining Barita hung TV, Radio, ela cara FB dan main game dia katawan jam. Mangat itah katawan kabar barita oloh luar.

3. Amon tege kapintar itah ela hapa mangalintar oloh beken, keleh kapintar itah hapa mandohop mawat oloh.

4. 1 Timoteus 4:12-13 : “Ije biti mahin ela ikau manalua oloh maanggap ikau randah awi ikau magon tabela. Tapi keleh ikau manjadi sonto akan kare oloh percaya hong kotak panderm tuntang hadatm, hong cara ikau masi oloh tuntang percaya dengan Yesus Kristus, tuntang pambelom ayum je tinduh-barasih. -- Pandehan toh, sampai aku dumah kareh, ikau musti toto-toto mambasa Surat Barasih akan kare oloh, tuntang manantiring hayak majar ewen.”

Kesah Palui Akan TB

PALUI AKAN TELAGA BIRU

Hung sinde andau dumah Abunawas mimbit Palui mananjung akan TB…. “Oi Palui umba ikau mananjung akan TB?” Dia aku.!! kuan Palui. “Narai je TB nah?” pisek Palui. Tumbah ih Abunawas, TB te “Telaga Biru.” “Haw!! umba aku amon kan Telaga Biru.” Kuan Palui.
Ye Palui manatap kare ramu, manduan ransel, manduan baju talasan (baju ganti). “Has yo… itah tulak ndai.!! Kuan Palui. Boh.. lehae je basatilah ramum nah Palui?” kuan Abunawas. Ela ridu puna itah harus sadia payung sahelu bara ujan.” kuan Palui.

Sana sampai TB …. Palui palus harikas balua bara mobil, maentang ransel…. handak maengkak baju pakayae.

“Boh…boh…!!! buhen ikau nah Palui?” kuan Abunawas. “Boh… maka aku handak mandui akan Telaga Biru..!” kuan Palui.

“Adu-aduh…. Palui….lui…lui….” Telaga Biru nah… dia je talaga – danau bahijau…. tapi Toko je sep simpan kare taluh jual oloh …!!”

Palui mandam, manure…. “ndawa ku “telaga biru nah danau…!!” Hu…hurehhh!!! Kuan Palui mangayau kuloke…… Gkgkgkgkgkkkkk….

MAKANYA … ela sok tau… keleh rangka-rangkah misek … tau mampahawen arep kabuat.

Basura & Harati tulak Mamantung

KESAH OLOH MAMANTUNG

Tege handi-haka, arae te 'Basura' dengan 'Harati'. Basura te tambakase, andie te inggare Harati. Ewen ndue kilau oloh lewu kea basatiar mamantat gita “pantung” melai himba likut lewu.

Basura tuh oloh je bakuhu (serakah), dia nahuang kalah dengan andie Harati, dia nahuang kalah dengan oloh beken. Gagenep ie mamantat batang pantung, te ie manyalender ngambu-ngiwa, lepah batang pantung te uras awan pahat Basura, nyamah neweng awi mahimat kare gitan pantung te. Awi puna bakuhu mahimat are gitan pantung. Beken tinai ayun Harati, ie baya mangguris ije kajalan ih, sila-silae mambalikat batang pantung. Kahimat Harati, uka batang pantung dia layu halai, tuntang eter gitae tau bunggut mamantat gita pantung te.

Hung sinde katika, metuh ewen ndue manalih himba pantung likut lewu, ewen ndue hambilang madu mangabuat mamantat, mangumbang kare batang pantung. Haranan kaheka biti bereng Harati ie palus tapatiruh melai upun kayu pantung.

Salenga tara hining awi Harati tege auh tangis tatum melai parak himba te. Ie tarewen, takisik palus manampayah arepe aton hung ije huma bahalap. “Boh, kilen aku tuh, je melai hung huma bahalap tu?” Kuan atei Harati. Ndahang tinai intu baun Harati, sepsimpan bari-panginan jari simpan. “Boh… kilen tinai bari-panginan tuh, eweh je mawie tuh?”

Metuh Harati manirok melai atei huange. Salenga aton ije bawi bahalap mendeng melai balikate, palus ie hamauh dengan Harati. “Oii… pahari, has ikau kuman ndai”! Awi ikau endau tahi tujah, musti ikau balau kanaim metuh toh.!”

”Yoh, aku tarewen salenga aton melai eka toh! Narai buku sababe. Aku puna toto tujah tapatiruh awi kahekaan mamantat gitan pantung.”! Kuan Harati. “Eweh ikau tuh?” Pisek Harati dengan oloh bawi bakena te.

“Aku toh Kariau Bawi Pantung!” kuan oloh bawi te. Balalu Harati misek tinai : “Eweh je manangis-manatum endau?” Tumbah ih Kariau Bawi Pantung, “Auh tangis tatum te, ye kakare batang pantung je antat keton olon kalunen, tuntang je ineweng olon kalunen nah.

“Kanampie uka keton dia manangis-manatom?” Pisek Harati. Palus tumbah Kariau Bawi Pantung : “Keton ela ndai mamantat gita pantung, mahin amon keton olon kalunen maneweng ikei.”

“Yoh, amon kilau te je sapatute, kareh aku mansanan auh tuh akan olon kalunen,” kuan Harati.

Ye limbah te Kariau Bawi Pantung manenga ije pundut akan Harati. “Toh inenga ku akam, uka ikau tatau sanang.!” Tuntang ikau buli lewum ih, ela ndai mamantat gita pantung.!” Kuan Kariau Bawi Pantung.

Ye, salenga Harati palus aton hung Lewu human ewen. Harati mukei pundut je inenga Kariau Bawi Pantung, sakalinya uras bintap amas hung pundut te. Balalu misek kakae Basura. “Kilen andi ikau palus lilap, dia katawan tintu darim? Tuntang kea bara kueh kare amas, panatau tuh?” “Anu… aka… aku te.. kilau tujah… palus tapisik melai ije huma hai, bahalap, tuntang sundau dengan Kariau Bawi Pantung.” Ie te je manenga aku amas tuh asal aku dia ndai mamantat gita pantung.

Harati te mangesah akan kakae Basura, gete-getei auh manyundau Harati dengan Kariau Bawi Pantung nah.

Narai taluh ati, hung hanjewu andau, puna oloh je bakuhu, dia kere mentai kareh-jewu, Basura palus harikas tulak akan himba pantung likut lewu. Hajat-huang sundau dengan Kariau Bawi Pantung.

Puna hajat niat tulus manjadi. Basura sundau kea dengan Kariau Bawi Pantung, Baya Kariau Bawi Pantung hubah manjadi ije ijin kambe hai, ie basingi dengan Basura, palus ijin te misak-mindit Basura. Basura matei awi ijin kambe hai te.

Kute auh kesah mampatei Basura, oloh je bakuhu te.
Olon kalunen magun sampai katika toh tege je mamantat gita pantung, awang je katawan kesahe ie manampa gawie balaku asi tuntang paramisi dengan Kariau Bawi Pantung.

PETEH PENYANG :
1. Ela itah manjadi oloh je bakuhu (serakah)
2. Keleh itah bagawi bujur buah, ela marusak kabun pambulan tuntang marusak alam lingkungan.
3. Rajaki tuah uras awi asi sintan Hatalla Pangkahai Tuhan.
4. Taloh gawi je sala tuntang dia bahalap akan manggetem buah je dia bahalap kea.

Indu Balawau dengan indu Pusa

INDU BALAWAU DENGAN INDU PUSA

Indu Balawau dengan indu Pusa jaman huran hasanger. Indu Balawau te manak 12 (duewalas) kungan anake. Haranan kakaren anake, indu Balawau haban maringkong, awi anake paham manoso ie. Tagal kahaban paham dia tapa sarenan, indu Balawau manyuhu kawan anake, mangguang sangere indu Pusa melai intu lewu silae.

Kawan anak balawau tulak bajukung mangguang indu Pusa. Sana sampai lewu silan te kawan anak balawau balaku dengan indu Pusa uka manabib, manantamba indang ewen. Kuan anak Balawau : “Oi.. mina… kuan indang ikei, dohop mina dumah akan huma manantamba indang ikei, awi indang ikei haban paham.” Yoh! aken!” kuan indu Pusa. Ye, indu Pusa tulak kea ije kajukung dengan kawan anak balawau te.

Ampie lague, metuh melai jukung jaton ati tiruk indu Pusa handak menta-kuman anak balawau te.

Sana sampai hung human indu Balawau, indu Pusa palus lumpat akan huma manyundau angere indu Balawau. “Oi.. anger..! narai kahabam nah?” Kuan indu Pusa misek. “Anu.. anger akuu… tuhh… haban awi kakaren anakku manoso aku, sampai ringkong-rihu aku tuh…” kuan indu Balawau tumbah.

“Yoh anger!” kuan indu Pusa, tumbah kea “tawangku tatambae”!

Salenga lembut belai indu Pusa manampayah kawan anak balawau je kapayap sinde. Handak ie mangkarap palus kumae, dia mangat dengan indu Balawau, parak kea sumbu paha-pahai sinde. Ye, atun tiruk indu Pusa manyuhu indu Balawau mampelep sumbu.

“Anu.. anger..!” Bahali angat ku… manyangiang, batabib akam, amon sumbu tuh paha-pahai.!” Dohop pelep helu!” Kuan indu Pusa. Tagal puna handak keleh, barigas, indu Balawau palus mampelep sumbu te. “Blep!!” sumbu belep.

Narai tunggu entai, indu Pusa palus mangkarap anak balawau te ije-mije ie mangaratop kawan anak balawau te.

Iha-ihat ih indu Pusa manyangiang, karungu-rungut auhe, manampa tandak mampaharap indu Balawau…. kuae……

“Tes…. tabules… tentes……”
“Daha….dahas… kasingasss….”
“Bulu….buluss … parasss…”
“Tapalawess…. karessss…”

(tamam tandak angerku indu Pusa tuh kuan indu Balawau)

“Tup…karutup…tupp..!! (auh indu Pusa mangaratup kuluk balawau)

“Hass….. narasss….kinasss…. musss… sangesss….??” Kuan pisek indu Balawau.

“Kumass….pinasss….. mudassss…..sangessss…!” tumbah indu Pusa.

Kute, hante-hante auh indu Pusa, kuman menta anak balawau, sampai indu Balau dia mangatawan anake handak lepah kinan ngaratup sangere indu Pusa. Tepa kajariae batisa ije kungan anak balawau te. Ie buhau hadari mawat arepe bara indu Pusa.

Anak balawau te hadari palus tame ije lawas “pasiung” (humbang hapan oloh mahimun apui melai dampuhan). Gitan indu Pusa je kilau te palus ie manekap pasiung te, maniling akan silan, anak balawau hadari akan puntung silae, inambalik tinai awi indu pusa, hadari tinai anak balau akan puntung silae. Kajaria jake andau sawah. Tagal andau jari balawau indu Pusa hadari buhau mikeh ie katawan awi sangere indu Balawau, basa ie jari kuman kawan anak balawau te.

Ampin taluh masi, anak balawau je tame manyahukan rombak pasiung te, salamat. Ye sampai wayah toh anak balawau magun tege manak manjaria, tapi puna dia tau pakat dengan kawa indu Pusa.

Bara sarita toh aton auh lagu je iajar awi apangku huran, yete lagu “ANAK B’LAWAU KORIK”

kutuh auh syair lagu te :

ANAK B’LAWAU KORIK, UYUH TUH…..
RUNTUK TAPATIRUH TUH … RUNTUK TAPATIRUH TUH…
MISIK WEI… MISIK WEI… MISIK WEI…..

PUSA ATON TUKEP, MUSUH AI….
MIPEN KUMAN ISIN AI…. MIPEN KUMAN ISIN AI…..
DARI WEI…. DARI WEI…. DARI WEI……

SANSANA BATU NGANGA

KESAH BATU NGANGA (Tingak Ajar)

Sinde andau Palui ewen ndue indange tulak akan tana.... pas melai tana ewen ndue manampayah tege sangkalap buntak ije hai toto, kilau kahain manuk jagau. Puna tato sangkalap buntak. Manampayah kilau te indu Palui manyuhu anake Palui manawan sangkalap te. "Ayu anak... tawan sangkalap kau... akan balut itah due..!!"

Ye, Palui mangapung, manawan sangkalap te.. tepa kea dinun. Kuan indang Palui. "Oi anak... pakasak sangkalap kau akan balut kue bentuk andau tuh, pandehan aku mambawau.!" "yoh indang." kuan Palui tumbah.

Sana jari masak sangkalap te, palui ringu-ringuk balengkonge handak kuman. Dia ulih manyarenan belaie... ie palus lip-lap kuman. Jajuan kea je belai kuman Palui kau, sampai lepah ije kungan sangkalap kahai ije kungan jagau.

Dia pire-pire, indang Palui dumah bara bentuk tana, awi andau jari ambu ie akan pasah handak kuman. Puna itung huang handak kuman tangkal sapak sangkalap nah.

Sana lumpat akan pasah, indu Palui misek, "kueh balut sangkalap je pakasakm nah Palui?" Tumbah Palui. "Anu indang ..... lepah ndai, uras kinangku, awi puna mangat toto.!" "Madu belaim kau!! sampai dia manisa akangku, indangm". kuan indang Palui palus buhau.

Indang Palui manyalu, ie buhau bara pasah, palus hadari akan ije eka. Hong hete tege batu nganga. Indang Palui manyahukan arepe intu batu nganga.

Awi kuju-kuhut manamean arepe hung batu nga-nga, bitie tuntang pain indang Palui leket intu batu nganga, baya jungak-jengok kuloke ih je balua, bara batu nganga je raka-rakap te.

Metuh te kea Palui manggau indange je buhau manyalu nah. Tepa kea kajariae ie sundau indange leket hung batu nganga.

"Kilen taluh mawi ikau, nah indang, sampai kilau tuh?" kuan Palui misek indange. "dia aku katawan nah anak, batu toh mahapit aku!" kuan indang Palui.

Palui handak manjijit, mampalua indange bara batu nganga, dia ulih, nyuhu-nyuhu kapehen indange ih... kombak kariak aduh akai sinde.

"Ela anak, ela, keleh ikau mantehau tabib ih, uka tau manangkaruan aku bara batu nganga toh!" kuan indang Palui.

Ye, Palui mangau kare tabib, uka badewa mampaulua indange bara batu nganga te.

Palui sundau ije indu "ampit". palus Palui mimbit ie talih indang je leket intu batu nganga.

Sana sampai, indu ampit kau palus hamauh : "Pit... pit....pripit...pit.... mahapit indang Palui bara batuuuu...... ngangaaaa....."

"aduh-aduh-aduh", kuan indang Palui awi jajuan mahapit batu nganga kau. "Terai anak.. lian tabib kau tau mampatei aku, gau je beken.!" kuan indang Palui.

Ye, Palui manggau tabib beken, sundau dengan ie dengan indu laok balida.

Sana sampai indu balida palus ie hamauh : "da-da-da-daaa...dia balua indang Palui bara batuuu.... ngangaaaaa....!"

"Terai Palui... dia hapan tabib kau!! Gau je beken!! kuan indang Palui.

Palui malian indu ballida, palus mangau tabib beken. Samapai kea ie sundau dengan indu bubut. Ye indu bubut dumah kea.

Sana sampai indu bubut palus hamauh: "but-but-but... lembut kuluk indang Palui bara batuuu.... ngangaaa....!"

Singa jajuan mansuluh balua kuluk indang Palui.

""but-but-but... lembut kuluk indang Palui bara batuuu... nganga....!"

Sasar lembut kuluk biti-bereng indang Palui... tepa lepah biti balua bara batu nganga te.

Kajariae, indang Palui salamat ulih balua bara batu nganga je mahapit ie.

PETEH PENYANG :
1. Ela kuman madu arep kabuat, inga-ingat oloh harian, kuan indangku
2. Kuman ela sampai hai bara takulok, tau akan indu kamameh, kuan apangku.
3. Kuman sasadang ih, ela sampai besuh bangkak bangai. dia bahalap akan karigas, kuan dokter.
4. Ela culas dengan indu-bapa, tundah-kula, eweh bewei.
5. Ela murah percaya kare tabib. Awi are kea je mananjaru. Keleh bulat percaya dengan Tuhan mahapan lakudoa.
6. Hurumat bapam tuntang indum, mangat ikau batuah, marajaki tuntang panjang umur hung petak danum tuh.

KISAH SINGA REWA

SINGA REWA DAN KULIT BUNTAL

Waktu jaman Belanda menguasai Indonesia, beberapa petinggi pemerintah Belanda memasuki Pulau Kalimantan. Mereka mengangkat orang-orang berpengaruh di Kalimantan.

Khususnya di Kalimantan Tengah mereka memberi jabatan, Temanggung, Damang, Dambung dan Singa.

Gelar "Singa" adalah untuk seseorang tokoh Dayak Ngaju yang mempunyai keberanian dan kesaktian, yang disegani lawan maupun kawan.

Suatu hari si tuan Belanda ini mengajak "Singa Rewa" mendayung naik perahu menelusuri sungai Kapuas dan Kahayan.

Sesampai di Lewu (kampung) Mandomai, Belanda bertanya kepada Singa Rewa: "Lewu apa ini Singa Rewa?" Ini lewu "Tanah Merah" (Petak Bahandang) dulu belum beranama "Mandomai". Kemudian mereka masuk Anjir Pulang Pisau. Sesampai di Pulang Pisau. Tuan Belanda Bertanya lagi "Lewu apa ini Singa Rewa?" ini lewu "Hulu Parang!" kata Singa Rewa. "Bukan Singa Rewa!" Belanda menyela. "Ah.. sama saja tuan. Pulang Pisau dan Hulu Parang sama saja.!" Kemudian sampai di Buntoi, Belanda bertanya, "lewu apa ini Singa Rewa?" "Inu lewu air berbuih-buih."

Tuan Belanda bertanya kepada Singa Rewa : "Apa arti nama kamu "Singa Rewa", dijawab "Singa Rewa adalah "Binatang buas di tengah hutan, pohon roboh tidak berdaun"! tuan.

Tiba-tiba perahu mereka menabrak batang pohon yang hanyut di sungai. tuan Belanda kaget dan bertanya : "Apa itu Singa Rewa?" "Tidak apa-apa tuan, kayu sama kayu."

Mereka melanjutkan penyusuran mereka, teringatlah tuan Belanda akan kulit "Buntal" yang sudah kering dalam tasnya, lalu ia keluarkan. Saat itu Singa Rewa tidak memakai baju, lalu di gosok tuan Belanda kulit Buntal itu ke punggung Singa Rewa. "Aduh...aduhh... tuan apa itu tuan?" "tuan menjawab "tidak apa-apa Singa Rewa, kulit sama kulit". Singa Rewa kembali berkata "aduh tuan tidak sama, kulit hidup dengan kulit mati".

Hahahahaaa....... siapa yang tahan dengan kulit buntal yang kasar.