Sangomang Mamutus Perkara

SANGOMANG MAMUTUS PERKARA

Hong lewun maharaja tege ije putir je bahalap toto, baya hong ije katika tuan putir rahat haban paham. Ie maringkong awi puna dia belai koman, pire-pire andau ie manyarenan kahaban te. Maharaja mahin dia katawan buku sabab kahaban tuan putir te, sampai dia belai koman. Ia mahin dia katawan narai tatamban akan panyakit tuan putir te.

Sampai ije katika dumah saudagar mimbit kapal hai, palus tende intu talian maharaja. Tara hining putir basa saudagar dumah bara lewu kejau, mimbit kare ramon dagange, kare balut panginan. Saudagar te tege kea mimbit pundang baya dia iye bajual pundang te, madu akan balut saudagar ih.

Tuan putir manyuhu ayang ayue musuk muneh pundang saudagar awi tege kapaham belai putir handak koman amon balut pundang laok. Pire-pire kali ayang putir misek handak laku bagi pundang puna dia saudagar hakon mambagie. Lalau kea je kaukih saudagar te.

Hong hanjewu andau kamean tuan putir hiu-hiut ewau pundang laok saudagar, putir menyengok bara saran basengok istana, puna toto metoh rahat saudagar mekei pundang hunjon sapau kapale. Salenga lembut belai tuan putir handak koman, ie palus manduan bari, manyuap bari sambil manyingut ewau pundang je hiu-hiut te nah. Lepah kea ije kapiring bari tuan putir, babalut ewau pundang te. Hapus andau baganti alem, tuan putir batiruh bakalis awi besuh.

Hanjewu andau tinai, saudagar haluli mekei pundang kilau male. Hiut-hiut tinai ewau pundang te sampai urung tuan putir melai istana. Lembut tinai belai tuan putir handak koman, ie palus manduan bari sambil manyengok nampayah kapal saudagar, hakabuah riwut, ewau pundang puna nampaor. Besuh bangai tuan putir koman bari balut ewau pundang saudagar.

Pire-pire andau saudagar mekei pundang hunjun sapau kapal, kilau te kea belai tuan putir koman, palus tuan putir barigas keleh bara kahabae. Sampai pinding saudagar basa tuan putir keleh bara kahaban awi mangkeme ewau pundang saudagar je iekeie hunjun kapal.

Balawa andau saudagar lumpat akan istana, balaku ganti rugi dengan maharaja, awi tuan putir keleh bara kahabae manyingut ewau pundange. Dia ure-ureh palakun saudagar, ie balaku ganti rugi saribu kati garantong, amon induit wayah toh labih-kurang 1 M dia isu-isut duit te.

Mahining auh saudagar te maharaja pehe atei, hong kueh itah mangau garantong kakaren te, ewen dia ulih mamutus perkara te. Kare mantir adat, kare panasehat kerajaan mahin dia ulih marimae perkara te. Palus tara ingat maharaja tege akee Sagomang, te ewen mantehau Sangomang dumah akan istana uka umba maniruk tuntang mamutus perkara te.

Sangomang sampai kea akan istana maharaja, palus ie mahining narai buku-sabab saudagar balaku ganti rugi ewau pundang dengan saribu kati garantong.

Hanjulo bewei Sangomang marima perkara te, palus ie hamauh : “Ceh! perkara korik bewei ih amon kilau te!” “Ayo, keton handiai mumpong kare garantong je galis, bahalap auhe je aton hong istana toh, kareh keton manto garantong, saudagar mahining bara kapal kanih, je kueh auh je bahalap te kareh jete je intih awi saudagar!”

Ye oloh are manduan garantong je bahalap auh hiaue, lambak te saudagar mentai intu kapal, sene-seneh amon kareh oloh manto garantong.

“En saudagar siap ikau mintih auh garantong je bahalap auhe?” kuan Sangomang. “Yoh, aku siap hetoh!” koan saudagar.

Nampara oloh are, manto garantong, manumun aba-aba bara Sangomang. Puna ging-gong sinde auh garantong galis je puna bahalap. “En, auhe, saudagar, bahalap?” “Bahalap auhe garantong kau, ye jekau akangku!” kuan saudagar.

“Sinde tinai saudagar, siap-siap ikau manyenehe.” Kuan Sangomang. “Yoh, siap!” kuan saudagar.

Nampara tinai oloh are manto garantong te, puna ging-gong sinde auhe tewa-tewah auhe. “En, saudagar, bahalap auhe?” pisek Sangomang. “Bahalap, ye kau!” kuan saudagar.

“Jadi, ih!” Puas ikau manyeneh auh garantong te?” auh pisek Sangomang. “Puas, puna bahalap auhe!” kuan saudagar tombah. “Jadi, ih, koan Sangomang, “Impas ih keton. Tuan putir manyingut ewau pundang je ngekeim nah, ikau manyeneh tewah garantong bara istana toh!” kuan Sangomang. “Yoh, toto.” kuan saudagar. Tinai auh Sangomang : “En rugi pundang je ngekeim nah, awi tuan putir manyingut ewau pundangm?” “Dia.” kuan tombah saudagar. “Ye, amon kilau te perkara toh hapus, ikau dia rugi, jadi dia perlu maharaja manganti ewau pundangm dengan garantong, ikau jari manyeneh auh tewah garantong je bahalap auhe bara kapalmu kanih, mahin dia mamparugi karajaan toh.

Mahining auh Sangomang kilau te sama mandam oloh are, hengan awi kapintar Sangomang mamutus perkara te. Saudagar palus balaku maaf tuntang paramisi buli awi ie mahamen angate.

PETEH PENYANG :

1.      Belum ela lalau bukih, bisit dengan oloh beken, awi panatau dia bakae imbit matei.

2.      Keleh sinta sama arep, mambagi berkat rajaki akan oloh beken je puna toto patut ie manarimae.

3.     Ela itah balaku ganti rugi amon puna dia marugi itah. Awi puna tau goreng pundang itah, papui balasan, tau manampa belai kuman kula babuhan itah.

4.   Ela lalau bakoho kilau saudagar te, mikeh kareh tau molitik ramon panatau oloh beken. Tege  auh Hatalla, ela mipen ramon oloh.

5.      Keleh pintar tuntang harati, belom bujur buah, indu karajin oloh are.

HADANGAN EWEN NDUE PALANDOK HASAHOKAN

Sinde andau ije kongan hadangan hasupa dengan ije kongan palandok. Sana ewen ndue hasupa, te koan palandok dengan hadangan : “Oi ule, tahi kue hambilang”. Koan hadangan tombah : “Yoh, toto auhm, toh harun kue hasupa, keleh kue busi-busik hetoh hasahokan lakau baho toh”. Te koan palandok tinai : “Buah auhm ule, tapi angatku dia baka olihm manggau aku. Kalah ikau awiku, basa bitim labih hai bara aku.” “Dia tantu aku kalah awim. Ela mite aku hai bitingku, dia baka ikau tahan awiku”, koan hadangan. Hamaoh tinai palandok : “Ceh! dia baka olihm malawan aku. Dia olihm sondau aku, amon aku manyahokan arepku, aku toh pintar.” Koan hadangan kea : “Ayo koe mite ampie, eweh manang atawa kalah. Toh eweh helo manyahokan?” Koan palanduk : “Mana koan ih le, aku atawa ikau helo, uras tau.” Koan hadangan : “Terai! Ikau ih helo manyahokan, ule”. Koan palandok : “Ayo, aku barangai je helo. Tapi ikau mentai hetoh mangambutep matam. Dia olih ikau manampayah aku. Aku haguet manyahokan arepku.” “Ayo. Jeleng”, koan hadangan.

Palus palandok haguet mananjong akan hete-hete, manggau rowut hungkap atawa sengkong baner. Tapi bahali ie manyahokan arepe hete. Te ie sampai penda batang mantawa. Hete are dawen mantawa je jari baduroh marak tingen. “Toh ie”, koan palanduk. Palus ie manyahokan penda dawen mantawa te marak tingen.

Ombet katahie, te hadangan manampara manggau palandok. Akan hete-hete ie manggau, tapi jaton sondau. Te hadangan sondau akal. Ie hadari lulang-luli, kules-kamba, mahunje kare ruwot lakau hete. Awi kakinjape hadari lulang-luli te karenga ie dia tarahunjeng palandok, ije basahokan penda dawen mantawa marak ruwot tingen. Sana palandok mite isu-isut hindai ie dia tara hunjeng hadangan, te ie dia bahanyi manahan hindai. Salenga ie marawus mendeng tuntang manangkajok bara hete hayak hamauh : “Hakarang, ule! Kalah aku. Karenga aku dia buah hunjengm.” “Te ie, pea hureh koangku endau, ule?” koan hadangan. Koan palandok tumbah : “Toto, tingkat toh aku kalah. Tapi ayo, ikau tinai manyahokan arepm. Angatku dia tahi aku manggau ikau, te ikau sondau awiku.” Koan hadangan : “Ayo, coba ih manggau aku, angatku dia baka olihm sondau aku.” Te koan palanduk : “Ayo, sahokan ndai, arepm jeleng!” Sama panas kea ampie palandok te.

Maka hadangan palus haguet mananjong manggau ekae manyahokan. Te ie sondau kaleka pasah oloh ije jari bakeho. “Toh ie, bahalap toto”, koan huang hadangan. Palus hadangan mampeter arepe hong kaleka pasah te. Ie menter mantangah. Paie epa-epat te impendenge sama kilau ampin jihin pasah je reje-rejek. Kalote ie manahan arepe uka paie ela gue-guet tuntang harajur bujur.

Ombet katahie te palandok nampara manggau hadangan. Akan hete-hete ie manggau, tapi jaton sondau. Te ie sampai kaleka pasah je jari bakeho solake. Maka ie mite jihin pasah te kilau pain hadangan. Tapi ie hengan, mbuhen ampie babilem. Te koan huange : “Pasah toh toto bakeho, puna toto babilem ampie te, jete buringe”. Kalote ie mindah bara hete manggau hong eka beken. Kules-kamba, kapurung-kaparang ie manggau akan hete-hete, tapi jaton kea sondau. Hengan toto angate hayak manirok huang arepe, hong kueh kea eka hadangan te manyahokan arepe. Marak ateie balasut, awi dia olih sondau, te ie haguet tinai manggaue. Maka ie sampai keleka pasah te tinai. Ie manampayah kangambo tuntang hakaliling, jaton ie mite en-en, baya epat jihi babilem te ih. Ie mananture epat jihie te hayak manirok huang arepe : “Amon toto jetoh jihin pasah, mbuhen ampie bulu-bulu tuntang lawie te tunji-tunjik ampie”. Koan huange tinai : “Je bulu-bulu te mikeh lomote atawa kulat. Tinai je tunji-tunjik te mikeh jete awan apui. Basa amon jete pain hadangan, mbuhen dia gue-guet, tinai mbuhen paie tau akan ngambo.” Limbah ie bapikir kalote, ie haguet tinai manggau hadangan te akan hete-hete.

Peda belai manggau kules-kamba jaton kea sondau. Maka tepa ie sampai tinai kaleka pasah te je helo nah. “Ah”, koan huang palandok, “amon kalotoh kalah kea aku toh, jaton ulih aku manggau ie.” Te ie mantehau hai auhe : “Oi ule, kueh ikau?!” Hemben te kea epat jihi te nah balongkang tuntang hadangan salenge hingkat mendeng tokep palandok. “Hakarang! Kai, ikau nah ule? Inahaku jihin pasah bakeho!” “En, pea hureh auhku nah?”, koan hadangan. “Toto, kalah aku”, koan palandok, ie mahamen ampie baue. Bara katika te palandok terai leca-lecak auhe tinai.

PETEH PENYANG :
1. Keleh belom ela bajuho (sombong / tekabur), Ela leca-lecak kilau ampien palandok, ela rajin manawah oloh beken. Ela manara arep labih bara oloh beken, oloh je bajuho akan imparandah.

2. Keleh itah randah atei, kareh akan impahai, tuntang gitan bara taloh gawin itah, dia baya auh pander bewei. Isut bapander, are taloh gawi je bahalap.

3. Sapinta-pintar tupai hantarap, tau kea manjato; Sapinta-pintar palandok kalah kea awi hadangan. Pintar itah tege tinai je pintar tuntang harati bara itah.

4. Keleh tara horumat akan Tuhan Hatalla.

BAJANG EWEN NDUE KALAMBUEI HALANJA HADARI

Sinde andau ije kongan bajang hasondau dengan ije kongan kalambuei into saran sungei. Bajang manawah kalambuei hayak hamauh : “Lalehan karimetm manggayar, bilak dia miar, ule!” Tombah kalambuei : “Ela mite aku barimet, ule, dia baka aku kalah awim.” Koan bajang : “Amon toto auhm, has kue halanja hadari.” Koan kalambuei : “Amon kalote auhm, ule, tau kea kue halanja, tapi aku balaku entai, andau jewu kue halanja.” Tombah bajang : “Has ih amon kilau te kanahuangm, andau jewu kue halanja.” Ewen ndue hajanji hasondau into saran sungei te kea.

Hemben te kea kalambuei mamumpong kare kolae, mansanan tawah bajang te tuntang mamakat kolae maretei arep ewen hapus saran sungei te.

Amon jari hanjewu, bajang dumah palus mimbit kalambuei halanja. Sana jari tatap, bajang nampara hadari. Ombet katahie hadari, ie mado kalambuei usang balihi, te ie mantehau : “Oi ule, kueh ikau?” “Toh aku, ule”. kuan kalambuei ije hila baue. “Kai, ie jari helo bara aku, lalehan kalambue toh balias bara aku.!” koan bajang.

Te bajang mampalias darie tinai, tuntang mantehau kalambuei. “Oi, ule, kueh ikau?” Tombah tinai kalambuei ije hila baue. “Toh aku, ule!” “Akai, lalehan kalias je kalambuei toh?” koan bajang. Manyangit haream bajang hadari, intehaue, magun tombah kalambuei ije hila baue.

Kalote hante-hante, sampai bajang te uyuh toto, dia olih ie hadari hindai. “Kueh ikau, ule?” koan bajang mantehau kalambuei. Kalambuei hila baue kea tombah, “toh aku, ule.” Koan bajang : “Kalah aku, ule, dia olihku hadari hindai”. Tombah kalambuei : “Ie te ule, ikau je manawah aku. Ela mite aku rangkah ampie, ikau kea ije kalah. Gkgkgkgkkkk… tatawen kalambuei.. herahe…

PETEH PENYANG :
1. Meto satua, olon kalunen uras tege bagie, tege je panjang hai tege je korik, tege je balias, tege je barimet, tege je tatau tege je pehe belom, tuntang kakai tinai

2. Ela manawah oloh beken, ela mambaka, mahina oloh awi dia kilau arep. Ela kea bahiri amon oloh tege kalabien bara itah, itah tege panengan Hatalla je beken je akan kalabien itah.

3. Keleh pintar tuntang harati. Ela maandal ekang kagancang, hapan kea akal pikir je maharagapan akan kahalap taloh handiai.

KELEP HASOBAT DENGAN BURUNG PUNGAU

Kelep ewen ndue burung pungau te jari tahi nyeloe into saran danau. Hong sinde katika dumah pandang hai, sampai danau te teah toto. Kuan kelep dengan pungau te : “O sobat, ampie aku dia tau melai hetoh hindai, kilen kea tirokm denganku, aku ije susah toto hetoh, karana sasar jaton taloh kinangku. Keleh jaka ikau manggau sungei, eka kue toh tau melai sanang tinai.”

Tumbah pungau te : “Dia memen ih, sobat, aku katawan bewei danau hai ije handalem, are kulat, lomot ranen aton hete. Tinai, amon ikau toto nahuang bindah akan danau te ije kuangku, pahias bewei aku mimbit ikau kante.” Kuan kelep tombah : “Kilen kakejaue bara hetoh danau te, ije koam?” - “Dia ie kejau”, tombah pungau tinai, “tikas mahalau ije kabukit tuntang ije kalewu”.

“Has”, koan kelep. “Keleh ikau masi aku; tapi kilen ampin akal kue, mangat bagulong tau sampai kanih?” - “Tawangku ih akal bahalap”. auh pungau tinai, “keleh itah mamelek kayu ije kapating, maka pontonge ikau mamangkite, pontonge silae aku. Limbah te aku handak tarawang hayak ikau. Tapi ingat bewei : amon itah mahalau lewun oloh, tinai ewen mantehau bara ngiwa, te ela samasinde ikau hamauh bele ikau manjato.” “Iyoh”, koan kelep, palus mamangkit pontong kayu te nah.

Hanjulo bewei bukit gantong jari ihalau ewen, tapi sana ewen tambuan lewun oloh te, maka kawan anak oloh hete mangkariak akan ngambo hayak hamauh :

“Te keton ite, pungau hasobat dengan kelep!” “Pungau hasobat dengan kelep, ite kanih!!” Auh tangkariak kawan anak olon te tara hining awi kelep. Amon kelep mahining auh te, ie handak hamauh dengan pungau : “Hiningm, pungau, ewen manahiu kue toh!” Tapi sana ie marakang nyamae, balalu ie manjato akan petak tuntang palus induan awi anak oloh te. Pungau kabuate sampai eka danau te. Pasi kelep akan indu usik kawan anak olon bewei, awi ie dia manomon peteh pungau.

Peteh Penyang :
1. Amon oloh bakas maningak, kawan kula, kakawalan maningak itah, keleh hining bua-buah, ela iyoh, iyoh kelep, tapi dia manumon.

2. Amon tege oloh marahas, hababaka arep, keleh suni ih, ela hatatumba, awi tau mawi itah talingau kahimat itah ije mambatang.

3. Keleh pintar tuntang harati mangat dia akan ureh baka tuntang inawah oloh beken.

GANDANG BURUNG

Sinde katika ije biti oloh tatau mawi pesta hai. Pesta te telo bulan katahie, handau hamalem harajur bararami. Tarong pesta te tayap lakau lewu hakaliling. Jadi tara hining kea awi burung katuging. Palus ie manatap arepe haguet akan lewu oloh tatau te.

Benteng jalanae te ie hasundau dengan burung ampit. Hoi, sanger, handak akan kueh ikau? kuan ampit. “Burrr”, katuging tingkep. “Kilen, sanger, dia ikau mahining tarong gawin sadagar, jari telo bulan toh ie pesta bararami sukup simpan karamie handau hamalem? Jalanangku toh handak mite karami te. tumbah katuging. Koan ampit : “Tawangku kea saritae, maka buah ikau manalih, kilen toh, jaka aku omba, sanger?” “Bahalap! Tapi keleh kue mawi gandang akan imbit manalih gawin sadagar te”, koan katuging. Palus ewen ndue marasuk auh gandang ewen ndue : “Katuging, katuging! Caririt, caririt” “Hau, rami auhe”, kuan ewen ndue.

Palus ewen ndue miar tuntang hasundau dengan burung Kuntul. Sama kilau burung ampit nah kea. Burung kuntul misek jalanan ewen, palus omba. “Has, itah marasok gandang helo”. kuan katuging. Manjadi : “Katuging, katuging! Caririt, caririt! Taktul katunguttunguttt” Hanjak ewen telo, rami auh gandange.

Palus ewen telo miar, hasundau tinai dengan burung Kak. Kak mantehau ewen, maka ewen te sama saritae kilau awang helo nah kea. Palus Kak omba. Gandang manjadi : “Katuging, katuging! Caririt, caririt! Taktul katunguttunguttt! gak, gak! “Lalehan karamie, kuan ewen epat.

Palus ewen epat miar. Ewen hasondau tinai dengan burung Tabuan. Kalote kea Tabuan misek jalanan ewen, sama kilau awang helo nah. Tabuan kea omba ewen. Helo bara haguet, ewen marasok gandange : “Katuging, katuging! Caririt, caririt! Taktul katunguttunguttt! Gak, gak! Mmm.!” Toh maka sukup karamie gandang itah”, koan Katuging.

Te ewen lime haguet sampai lewun sadagar te. Toto kea, hining bara kejau auh letus kare karami te. Ewen mite kahalap lewu te malendang mahiang, hamalem sama kilau handau. Ewen lime te lulang-luli tarawang tambuan lewu te. Ombet katahie ewen tingkep hong batang kayu ije gantong likut huma. Hete ewen lime bagandang : “Katuging, katuging! Caririt, caririt! Taktul katunguttunguttt! Gak, gak! Hmmm!”

Hau, lalehan karami auh burung te”, koan oloh are. Barature oloh are manyeneh hayak hengan. Tengak tanggera oloh are manggau eka burung te mahiau. Ombet katahie gitan ewen lime kongan burung into tarok kayu. “Te, kanih ie, ayo, sipet-sipet! Panting-panting!”, koan kare anak oloh awang bangang. “Rami auhe mahiau, ela mangapehe maur burung te”, koan awang bakas.

Dia pire katahie bagandang ewen lime te. Hapus gandang, ewen tarawang manggau panginae lakau te. Limbah te ewen bagandang tinai sambil tarawang tambuan lewu. “Katuging, katuging! Caririt, caririt! Taktul katunguttunguttt! Gak, gak! Hmmm!”…. “Katuging, katuging! Caririt, caririt! Taktul katunguttunguttt! Gak, gak! Hmmm!.... “Katuging, katuging! Caririt, caririt! Taktul katunguttunguttt! Gak, gak! Hmmm!” Merau surak oloh are mahining karami auh burung te. Palus ewen lime tarawang sama buli ekae dengan atei hanjak.

PETEH PENYANG :
1. Kalunen patut pakat genep biti, genep ungkup lewu, hinje huang kahanjak.
2. Meto satua, kawan burung tau pakat kea, awi Hatalla jari manjadian taloh handiai bahalap.
3. Elau maur manderoh, mampatei burung satua barangai, ewen handak kea belom, tuntang ewen tau umba mamparami kalunen, awi auh hiau burung te puna bahalap : “Katuging, katuging! Caririt, caririt! Taktul katunguttunguttt! Gak, gak! Hmmm!” Tuntang are auh burung je beken tinai.
4. Amon tege mahaga burung, haga bua-buah, mangat auhe bahalap, mampangat atei itah.

Sangahau dengan Palanduk basurah....

Hong sinde andau palanduk hasundau dengan sangahau. "Hau... narai kabar nger?" kuan sangahau dengan palanduk. "Dia ulih aku barima, je arae kanulen kau!" kuan palanduk. "Boh! kilen nah sanger.?" kuan sangahau. "Kanampie je dia, amon bitik je jaton kasalae, mahalau tandipah olon kalunen, nyama-nyamah ih ewen kau mamicik... mampatei kawan bitik". Kuan palanduk.

"Ela ikau mahengae sanger!" Kuan sangahau.... ela je bitik, manih je ikau tau akan balut ewen olon kalunen..... hamputan ikei sangahau toh, je dia tau ewen kalunen kumae, mahin catok ewen kulok ikei.... amon ikei tabarung je bagare olon kalunen kau....!!"

"Hakarang indang.!!" kuan palanduk. "Badai ih arae...kare pagar jambatan je diague-guet mahin nejep mangkih ewen amon ewen mahalau pahandas kare pagar jambatan, kabun pambulan oloh.!!" Kuan palanduk...

Puna dia ulih huange olon kalunen kau, amon dia mangaraen taloh je inyundaue .... kuangku madue... kuan sangahau..