Palui Marengge Burung

Palui Tarawang

Limbah apang Palui jari tuntung manyirat ije kapayah rengge, apang Palui manyuhu anake Palui tulak manenan rengge puga te, manggau laok akan balut. “Has anak keleh ikau mamuga rengge taheta tuh manggau balut akan itah. Palui tulak kea manekap rengge ije kapayah te, manekap besei, manangking ambang palus muhun akan talian balalu lumpat akan jukung. Palui mambesei manintu ije danau ekae bahut manenan rengge.

Sana jari sampai eka bahut, Palui mangancang rengge bara punting silae akan punting silae. Limbah te ie lumpat akan saran petak, munduk mentai rengge ai. Pire-pire katika ie mambu rengge te, ampie palus jatun buah laok rengge te. Haluli tinai Palui manenan renggee. Sadang kea katahie ie mambu renggee, puna jatun sanggkut kea rengge Palui. Ije kungan mahin dia ati.

“Lalehan ampin rajaki tuh jatun manggapi” kuan atei Palui. Ie munduk manure intu upun lunuk. Salenga “TAP!”, auh bua lunuk manjatu takana takuluk Palui. “Boh!! narai taluh tuh?” kuan Palui tarewen, palus ie mananggera manampayah hunjun kuluke. Sakalinya metuh rahat bua lunuk masak, rami ampin kawan burung manesek bua lunuk. Tege burung tingang, baliang, pampulu, punei, tabuan, uhit, sukup simpan kare macam burung tingkep melai lunuk te. Hanjak atei Palui manampayah karamin burung te.

Balalu Palui maniruk, kanampie manekap kawan burung te. Salenga tara ingat Palui renggee je melai danau nah. “Oo… keleh aku mangguna rengge laokku je atun melai danau te, awi jatun kea sangkut laok, keleh hapaku marengge burung tuh.” Kuan atei Palui. Ye, Palui mangakit renggee, balalu ie manyakei batang lunuk te manenan rengge intu lawin edan lunuk. Rami bir-bur tarawang kawan burung manampayah tege olon manyakei lunuk manenan rengge.

Sana jari tapasang rengge, Palui muhun bara lunuk, balalu ie buli akan lewu. Kuan atei Palui, “tuh kareh je tau akan balut, amon kawan burung te sangkut renggeku.” Ie buli dengan atei sanang.

Sampai hung lewu humae, indang-apang Palui misek kueh kare laok je dinun Palui. Kuan Palui rengge te inenan hung lawin lunuk. Indang-apang Palui balang sangit awi tamam kahimat Palui dinun kawan burung auh kuae.

Limbah jandau kadue tinai, Palui haluli tulak mambesei akan danau mangguang batang lunuk ekae manenan rengge nah, mahimat are burung buah renggee.

Dia sala taksiran Palui, puna hagulak sinde haris rengge, hayak edan lunuk hakibar kilau nampuh riwut. Bara kejau Palui jari manampayah lawin lunuk te. “Te Ye!!” “Sangkut keton”!! kuan Palui, manampayah kambulat sinde rengge buah kawan burung. Dia kalaluen angat atei Palui, ie gulung mahurok jukung, palus mangahap batang lunuk, kuha-kuhap manyakei batang lunuk te.

Palui mambu renggee, mimbit akan hunjun petek. Palui mandam, “kilen apie mimbit burung kalutuh kakaree?” “Handak aku mampateie sayange, handak malihie tengahe, sanyang” kuan atei Palui.

Limbah pire-pire katahie palui dinun akal, ie manduan tali huruk jukunge, palus mameteng pain kawan burung te, ingalunge hapus biti berenge. Kuntep kawan burung melai hapus biti bereng Palui awi uras metenge intu bitie.

Narai taluh ati uras mangipak palapas kawan burung te, kilau tarawang handak maliwus arep ewen. Haranan kakaren burung je imeteng intu bitin Palui, salenga ulih kawan burung te manamput Palui tarawang. Palui hanjak ateie, mangkeme ie tau tarawang. “Aku-akuiii… kamangate je tarawang tuh nah?!” Kuan Palui hanjak. Sasar tahi sasar gantung Palui tarawang namput burung. Kawan burung mimbit Palui mahalau lewu human Palui. “Boh lewu humangku kanih.” “Ayo… imbit aku mahalau hunjun human indang-apangku!” kuan Palui dengan kawan burung. Tapalujur kea kawan burung te mimbit Palui tarawang hunjun humae.

Tara gitan Palui kawan andie metuh busik bangang melai baun huma, nangkariak ih Palui mantehau kawan andie. “Oii.. andie!! tuh aku Palui tarawang.!” Mananggera andi Palui “Oii.. aka lehan kamangat ikau tau tarawang.” Yoh adi!” kuan Palui.

Sasar tahi heka kea Palui melai ngambu, ie manyuhu kawan burung muhun. “Jari, sukup ih, muhun ndai!!” aku handak buli”! kuan Palui dengan kawan burung. Pea kare katawan te, je burung kau, jajuan kawan burung manamput Palui. Palui takikeh awi dia tau muhun. Palus ie manggombak mantehau indange. “Oii… indang… dohop… indang… dohop… aku namput burung!!” Hining indang Palui kombak anake Palui. Palus balua kea indang Palui “lalehan ikau nah anak, kilen ikau je namput burung?” “Aduh indang aku dia tau muhun… dohop indang!” “Boh.. engkak burung kau bara biti berengmu ije-mije!” Kuan indang Palui.

Ye, Palui mengkak burung te ije-mije bara biti berenge. sasar randah kawan burung tarawang manamput Palui, batisa isut melai kahang Palui kawan burung te, Palui palus manjatu pas baun human ewen.

“Lalau ka humung, kapalengm ikau tuh anak, manjarat kawan burung melai hapus bitim. Awi amon burung te manamput ikau kan eka kejau kanampie ampim, tau mampatei arepm ih.! Kuan indang Palui malait Palui.

“Yoh indang ampun. Aku manyasal tuntang jera nguan gawi te.” kuan Palui.

Tisan burung je melai kahang Palui, uras lekak Palui, balalu ewen manyambalih burung te tuntang manyambulut manganan bulue. indang Palui mampakasak burung te akan balut ewen hanak.

Pangulih tisa isut, jukung bahantung awi huruk jukung hapa mameteng kawan burung. Lalau kea Palui marapus arepe. Karenga mimbit umure.

Peteh Penyang :
1. Amon bagawi, basatiar bausaha keleh sabar tuntang sambil balakudoa.
2. Helo bara malalus taluh handiai keleh mikir / itung bujur buah helu, mikeh tau manyasat arep tuntang tau mambahaya arep kabuat.
3. Ela hanjak tatawe awi kahumung, keleh masi arep.
4. Sakula bara guru, sakula bara pangalaman, uka manjadi oloh je pintar tuntang harati

DAMANG BAHANDANG BALAU

(ASAL LEWU TAMBAK BAJAI - KISAH NYATA)

Jaman huran baratus-ratus nyelo je jari mahalau, melai sungei Kapuas tege ije Betang Sungei Pasah (wayah toh manjadi lewu Sungei Pasah). Melai betang te tege pire-pire kabali- baluh, je belum pakat tuntang rakat. Hung Betang te aton kea ije biti oloh Hatue Bakena Balinga, je mamut menteng. Hung sinde katika oloh hatue te tulak balampah (bertapa) manggau ilmu kaji patua akan dinding bereng mandahang kesaktian je jari atun. Metuh ie balampah te iye inyundau oloh gaib je manenga akae ije karis kalok telu, kurik ih karis te. Tapi karis te tau manenga kagancang tuntang kesaktian je paham heran.

Oloh hatue te inggare Bahandang Balau awi ie habalau panjang tuntang balaue te bawarna bahandang. Awi ie oloh je mamut tuntang bailmu gantung ie iangkat oloh manjadi Damang awi te ie inggare “Damang Bahandang Balau”.

Haranan manggau ampin pambelome, Damang Bahandang Balau murik tame sungei Mangkatip, palus bajanda melai ije kaleka. Damang Bahandang Balau tuntang pire-pire biti mamangun lewu hung hete je inggare oloh Lewu Dadahup.

Damang Bahandang Balau te tege ije betaue (andie bawi) je inggare Nyai Mating. Singkat kesah, Nyai Mating imanggul oloh hatue bakena panakan Dambung Derek bara daerah Barito yete asal lewu Dayu. Dan manumon kapakat ungkup babuhan Damang Bahandang Balau manampa pesta ije hai huang pangawin betaue Nyai Mating. Pangawin Nyai Mating te puna rami tutu, uras ungkup babuhan bara lewu ije kejau, kanih-kate uras dumah mamparami pesta pangawin te.

Pesta Pangawin te ilalus uju andau uju alem, genep andau pukul gandang garantung, hayak dengan kangkanong impahiau tarus oloh are rami manari manasai, sampai peda belai. Kute genep andau sampai hamalem oloh are pesta rami-rami.

Hung andau ije kauju, pesta te tende, uluh are ampie uras heka tapatiruh, ije kalewu te. Helu bara te Damang Bahandang Balau jari mameteh betaue Nyai Mating uka ela balua bara huma, sampai hapus pali. Tapi hung alem te Nyai Mating dia tau batiruh, awi lasut riwut puna dia kalaluen. Nyai Mating dia tapa sarenan kea, ie malanggar peteh kakae Damang Bahandang Balau, ie balua bara huma dengan ije jipen bawi, manggau angat riwut.

Metuh Nyai Mating mananjung ie manampayah sungei je teneng tuntang danum je mangat akan manyadingen arep. Metuh te alem jari ambu pas bentuk alem. Balalu kilau intehau angat atei, Nyai Mating palus muhun akan danum handak mandui.

Sana sampai bentuk danum, kilau tege taluh manjijit ie bara penda danum Nyai Mating palus leteng. Ie mangkariak balaku dohop, dia sampet. Manampayah taluh kilau te jipen bawi te hadari buli akan huma, manyarita akan oloh huma tuntang akan Damang Bahandang Balau.

Balalu Damang Bahandang Balau hingkat, palus mantajuk karis, ie hamauh : “Ketun melai hetuh ih, kareh aku manyak manggau betauku Nyai Mating. Amon hung andau je katelo aku dia buli, rimae aku matei.” kuan Damang Bahandang Balau. “Yoh..!” kuan oloh are.

Damang Bahandang Balau palus manangkajuk akan bentuk sungei. Oloh are mandam tuntang dia manampayah tinai Damang Bahandang Balau.

Sakalinya Damang Bahandang Balau hung bentuk lunas sungei kilau mananjung melai karatak rami. Ie manampayah lewu rami hung penda danum kanih. Are oloh melai hete kilau kalunen, tapi takuluk kilau Bajai.

“Oo.. lewun rajan bajai tuh” kuan atei Damang Bahandang Balau. Tege ije biti oloh hung lewu penda danum te hasundau dengan Damang Bahandang Balau, palus Damang Bahandang Balau misek narai mawi oloh lewu te rami. Kuan oloh te “rajan ikei handak manampa pesta kawin dengan bawin kalunen, bawi te betau Damang Bahandang Balau. “ Oh.. ye kah?! kuan Damang Bahandang Balau. Ampi lagu oloh te dia kasene dengan Damang Bahandang Balau.

Damang Bahandang Balau dia ulih manyarenan kasangite, hembente kea ie manyilak karis sakti ayue, Sambil malahap ie mampatei kare oloh hung lewu penda danum te. Oloh are karas kea malawan handak mampakalah Damang Bahandang Balau. Puna oloh hatue je mamut menteng jatun tanding kaji patua, tuntang kesaktian karis panengan oloh gaib nah. Uras dip-dap balihang matei amun kana karis Damang Bahandang Balau.

Baratus biti tuh jari matei. Kajaria rajan Bajai balua, palus manyundau Damang Bahandang Balau palus ie hamauh “Sukup!! Ampun..! Ampun ikei, Damang Bahandang Balau”! Jari ih ikau mampatei kare rakyat ayungku!” Aku are balaku ampun maaf, dengam. Ikei dia katawan basa bawi te betaum Nyai Mating.” kuan rajan bajai. Ye, Damang Bahandang Balau palus tende mampatei oloh hung hete.

Haluli tinai rajan bajai hamauh dengan Damang Bahandang Balau. “Ikei puna tutu sala, awi te ikei balaku ampun maaf dengam. Dan kilau tanda ikei balaku ampun, ikei Malian Nyai Mating te akam. Sapuna taluh tuh dia manjadi amun dia tagal sapa rajan kalunen dengan rajan bajai huran.” Kuan rajan Bajai. “Haw! narai auh sapa rajan kalunen dengan rajan bajai huran?” pisek Damang Bahandang Balau.

Ye, rajan bajai mansanan auh sapa te huran, kuae : “Akan kalunen, ie dia tau mandui metuh matan andau tandipah hunjun kulok guete, awi jatun kangkalinge; Tinai oloh je harue kawin dia tau mandui hung sungei atau manampa jalanan manyuru sungei, awi ewaue mangat tutu. Ije tinai sapa te, olon kalunen dia tau barangai mampatei mangapehe bajai amon jatun kasalae.” Kute kea akan utus ikei bajai tuh, dia tau mangekei arep ikei melai jalan ije inyuru kalunen. Tuntang dia tau ikei mampatei kalunen amon jatun parasat. Tinai ikei dia tau tame kare hempeng, renge, lunta hapan olon kalunen mangau laok, tuntang dia tau kuman umpan pisi ije akan laok, baya ikei tau manyambar pisi amun umpan upih.” Kuan rajan bajai manarang akan Damang Bahandang Balau.

Limbah te Damang Bahandang Balau dengan rajan Bajai manampai ije acara manetek bunu, kilau badamai tuntang rajan bajai manjadi sahabat dengan Damang Bahandang Balau. Peteh rajan bajai, uka hantun bajai je impatei Damang Bahandang Balau, ingubur hung ije eka, kute auh kapakat ewen.

Limbah te, Damang Bahandang Balau mimbit betaue Nyai Mating buli akan lewu Dadahup, jatun ije kahantis danum mambisa ewen ndue, awi tamam kajin Damang Bahandang Balau.

Oloh lewu manambang ewen dengan kahanjak, kute kea banan Nyai Mating je paham pehe ateie. Limbah te lewu sanai, oloh are uras buli akan lewu humae.

Hung andau jewu tinai Damang Bahandang Balau manalih sungei hayak andau magun kaput balawa, palus manampayah hantun bajai laput-laputa intu bentuk sungei. Ye, Damang Bahandang Balau manduan hantun bajai te, palus mimbit murik akan ngaju lewu, manampa ije tambak (rombak je hai), palus mangubur kawan hantun bajai te. Oloh dia tau manampayah hantun bajai te, baya Damang Bahandang Balau tuntang betaue Nyai Mating ih je tau manampayah hantun bajai te. Kaleka mangubur hantun bajai te inggare oloh “Tambak Bajai”.

Hung pire-pire nyelu limbah te, atun oloh mampendeng huma melai hete, ye oloh manggare aran lewu awan eka Damang Bahandang Balau mangubur hantun bajai te lewu “Tambak Bajai” (sampai wayah tuh aran lewu te).

Sarita tuh puna kesah Nyata, tege bukti sejarah. Hung lewu Tambak Bajai tege ije kandarah, intu huange tege 7 kalambar balau Damang Bahandang Balau tuntang balau Nyai Mating. Metuh oloh Maniwah tulang Damang Bahandang Balau oloh dia manyundau tulang Damang Bahandang Balau, baya balaue uju kalambar warna bahandang ih je tege hung tabala. Tuntang karis Damang Bahandang Balau je inggare oloh “Gajah Lalu Kumpai Layu”.

Lewu Tambak Bajai, hila ngaju bara lewu Dadahup melai sungei Mangkatip, Kecamatan Kapuas Murung Kabupaten Kapuas, Kalimantan Tengah, sapunae tau akan situs sejarah tuntang obyek wisata, tapi are oloh mangalapean sejarah kamamut Damang Bahandang Balau, baya oloh manduan arae akan aran jalan ih awi ie puji jadi Damang je inggare “Damang Bahandang Balau”.

Peteh Penyang :
1. Itah patut mahurmat kare adat istiadat, budaya tuntang tradisi je bahalap. Kilau itah oloh Dayak puna belum bahadat.
2. Ela mandui bentuk alem awi je te dia bahalap, paling dia akan kesehatan, tau kana reumatik.
3. Gawi je sala akan gitan. Oloh je bujur akan manang.
4. Ela itah manalingau peteh penyang oloh bakas huran. Penyang hinje simpei manggatang tarung sewut saritan oloh bakas huran.

Bakei Mureh Kelep Je Menteng

"Sansana Magah Tiruh"

Ampie lague, bakei puna rajin mureh hababaka dengan kelep. Genep bakei hasundau dengan kelep te bakei mureh mambaka kelep, puna dia ulihe amon dia manderoh oloh.

Hung sinde andau, metuh kelep mananjung manggayar, mahalau upun kayu eka bakei hantarap. Tara gitan bakei kelep melai penda metuh mananjung manggayar rangkah.

Balalu bakei mantuhus arepe akan penda, palus manukep kelep. Te bakei kunjang-kanjuk mangalinda kelep. Kanatek nangkajuk akan hunjun likut kelep. Palus malea mambaka kelep, parak auhe je krih-kroh sinde. Amon bakei manukep, kelep manyahukan kuloke. Amon bakei benyem, te kelep mansuluh mampalua kuloke. Kute hante-hante bakei mureh kelep, kuju-kuhut kea je kulok kelep te.

Tepa rise peda kea bakei palus ie tende mureh bakei, ie misek kelep, kuae : “Narai je kuju-kuhut balua bara bitim, en uti atawa kulok?” “Kulok!” kuan tumbah kelep. Misek tinai bakei, “Amon kulok buhen dia habulu?” tumbah kea kelep, “punae ih kulok oloh menteng!”

“Oo…. Kute kulok oloh menteng puna dia habulu lah?” “Yoh”! kuan kelep. “Amon puna ikau menteng, buhen dia tulak mangayau?” pisek bakei tinai. “kandue ku…. Sama areh ih”! kuan kelep. “Oo… awi sama arep?”

Tepa peda kea bakei mureh, tuntang misek kelep awi, tamam auh tumbah kelep. Hanyak bakei takikeh mahining kelep oloh je menteng. Puna dia ulih bakei malawae kea je kelep te ampie. Bakei palus buhau, malihi kelep je magun mananjung manggayar.
Sambil ie hamauh : “Keleh juhu kelep bara juhu baluh, keleh sama arep bara dengan oloh.” Hahahaa........

Peteh Penyang :
1. Ela lalau rajin mureh mambaka oloh beken, amon itah dia rajin oloh mambaka arep itah kabuat.
2. Ela manawah oloh beken je ampie kurik tuntang balemu. Mikeh kareh ie labih mamut tuntang labih pintar tuntang harati bara arep.
3. Keleh itah marega tuntang mahurmat oloh, sinta oloh beken kilau itah sinta arep kabuat.

Anak Luting

ANAK LUTING MAMPATEI KAMBE HAI

Tege anak hatue je inggare oloh “Anak Luting” awi biti berenge pandak tutu hanyak kurik ampie. Aluh umure jadi sadang kabujang tapi biti bereng kilau anak kurik tabela. Kinjap oloh sapantar dengae hababaka manawah ie awi kakurik bitie te.

Tege tinai anak hatue je inggare oloh “Tunggal Bakas, Tunggal Tabela tuntang Tunggal Busu” ewen telo hampahari. Ewen telo te hakula dengan Anak Luting. Hung sinde katika Anak Luting handak umba ewen telo te basatiar-bausaha akan parak kayu, handak manggau narai bewei hung parak kayu je tau akan injual, ihapan ewen, kilau kare gemur, garu, gitan nyatu tuntang nyating.

Metuh Anak Luting mander arepe handak umba basatiar akan himba, Tunggal Tabela tuntang Tunggal Busu handak dia nahuang mimbit ie, awi biti berenge je kurik. Kuan itung ewen mawi mampaderuh ih. “Kilen ampie ie ulih metun kare puat bahata, kare behas uyah, imbit arepe mahin baya-baya ih. Kanampie tinai amun kare dimpah sungei, tau mawi itah uyuh metun mumah ie ih” kuan ewen ndue.

Auh ewen ndue te tara hining Tunggal Bakas, palus ie hamauh dengan ewen ndue : “Ela itah manawah oloh, ela hamauh kilau te. Olon kalunen tege kalabihe tege katapase. Eweh katawa Anak Luting tuh tau mimbit rajaki akan itah. Nauh ih ie umba itah basatiar.” Ye, ewen ndue te benyem tuntang hakun mimbit Anak Luting umba basatiar akan parak kayu.

Hanyak tampalawei andau ewen epat biti te tulak manampa jalanae akan parak kayu. Tanjung janda-jandau akan bentuk himba kanih. Metuh andau lius kaput ewen epat sampai kea eka je kaharap tuntang kahimat ewen. Balalu ewen mampendeng ije puduk umbet akan ewen epat ih.

Pire-pire andau ewen mangumbang eka te manampayah eka kare nyatu, tuntang kare nyating je are melai hete.
Amon ewen sundau nyating te ewen palus mimbit akan puduk ewen, tuntang mangutat kare kayu hete akan tanda, uka jewu tinai ewen manangkaluli manduae.

Hung sinde katika ewen epat te pakat uka basatiar mangumbang himba te kabuat-kabuat. Anak Luting misik bagulung palus ie tulak hayak andau hanjewu magun buta-butat ih. Hung benteng jalan Anak Luting tarewen sabanen awi pasuru ije kungan bawui himba ‘talimpai” je hai tutu, metuh bawui te mandui ngalabangan. Bawui te buhau kea, tuntang Anak Luting buli akan puduk ewen epat. Ie dia manyarita panyundau akan ewen telu hampahari nah.

Hayak janjewu tinai Anak Luting harikas palus manekap sipet ayue ije imbite bara lewu. Sipte te pandak tutu baya ije tipeng penang ih, tuntang rombak sipet te kurik , ali-alis lawas talali ih, baya inguan bara tabalien batue. Damek jari sadia je puna baipu ulih mampatei bajang bawui.

Pas Anak Luting jari sampai eka kalabangan bawui male, ie palus manyelek rangka-rangkah. Pea kahureh puna bawui je male metuh mangalabangan. Narai tunggu entai kuan atei Anak Luting. Palus ie manyipet bawui talimpai te. “Pet!!” Takinyot paran bawui, awi damek te kurik haliai. Sama angat pepet piket ih. Bawui te dia tahu-tahu magun ngalabangan. Pit-pet auh sipet Anak Luting, sampai lepah isin damek, bawui magun dia gitan ampin kapehee. Tepa rise rahas ndai Anak Luting, ie harikas mendeng hayak mangkariak “kiiuuuyyyy!!!!” Bawui tarewen sabanen, palus balihang matei.

Hemben te kea Anak Luting manangkajuk manalih bawui talimpai je balihang te. Puna jari matei bawui te, balalu Anak Luting manyayat kadue pinding bawui te. Pinding bawui inyuang huang keba, palus ie buli akan puduk ewen.

Sana sampai puduk, Anak Luting palus mampeter arepe, awi haranan kagugup tuntang kahekae. Tunggal Bakas ewen hampahari Hengan manampayah ampin Anak Luting te. Te ewen telu misek narai buku sabab ie je kilau te. Tumbah ih Anak Luting “cuba ketun manampayah huang keba kau narai ampie hete”! kuan Anak Luting. Gulung kea Tunggal Busu manangkilik keba ayun Anak Luting. Ie tarewen, palus hamauh “Haw.. kilen tege kare pinding bawui melei keba tuh?” kuae. “Dinungku endau.” Kuan Anak Luting.

“Haw..! Matei belum bawuie?” Boh kanampie aku ulih manyayat pinding bawui amun belum.” Kuan Anak Luting “Boh, hung kueh hantun bawui te, has itah manalihe.!!” Pisek ewen telu.

“Ayu... itah manduae.” Kuan Anak Luting, ie harikas awi berenge jari baringas.

Ye ewen epat sana sampai eka hantun bawui te, ewen metun hantun bawui je puna hai tutu, hanyak puna menyak.
Sana uras lepah taetun ragan bawui te, ewen balalu manampa pasah eka manyehei isin bawui te. Rajaki hai puna mampamangat belai ewen epat kuman isin enyak bawui je mangat tutu.

Tagal sehei isin enyak bawui je puna hiu-hiut tutu. Hakabuah riwut sampai urung “Kambe Hai barombak likute” Sampai hanti-hantis sinde iweh kambe hai barombak likut te. Narai taluh ati, kambe hai te hadari mangguang ewau je mangat tutuh nah. Metuh te Tunggal Bakas ewen telo pahari jari tulak basatiar tinai.

Sana sampai puduk ewen Anak Luting, Kambe Hai palus hamauh. “Oii… Anak Luting !! Lalehan kamangat papui enyak bawui tuh??!! Kuae. “Punae mangat tutu je arae sehei bawui menyak, puna hiu-hiut sinde. Bawui tuh dinin ikei male” Kuan Anak Luting tumbah.

Dia paramisi tuntang misek kakai je kambe hai te, ie palus lip-lap kuman sehei bawui te. Sana kambe hai te jari besuh, ie hamauh tinai dengan Anak Luting.

“Oii… Anak Luting ayu ikau muat akangku kare sehei tuh, namean huang likut ku, akan imbitku buli.!!” Kuan Kambe hai je barombak likute.

Ye, Anak Luting muhun bara puduk ewen, ie manukep kambe hai. Hung hete are kare tuyuk nyating je jari dinun ewen epat nah. Anak Luting manamean kare butub nyating akan rombak likut kambe hai. Kembe te dia manampayah gawin Anak Luting awi ie suntup hayak magun menta isin-enyak bawui. Sadang kakare butub nyating tame rumbak likut kambe hai te. Palus kambe hai hamauh. “Sukup..sukup!! sadang kare puat tuh, sadang ehate!!” Kuae. “Haw.. ela helu!” Kuan Anak Luting, “isut tinai”! Hayak kea Anak Luting maninjek apui, manutung nyating je melai likut kambe hai te.

Sana jari belum apui te, Anak Luting hamauh dengan Kambe Hai. “Has jari ndai!” Tulak ndai ikau!” Kuan Anak Luting.

Lasu-laut angat likut kambe hai te. Ie mandawa puna lasut sehei bawui nah. Sambil kumi marium ie hanjak buli akan ekae. Metuh hung jalan buli salenga dumah riwut kiba-kibar, mahimun baran nyating hung likute. Narai taluh ati palus habandam sinde apui hung likut kambe hai te. Ie tarewen : “Akuiii… dia je lasut sehei jetuh!! Puna gawin Anak Luting je marapus aku tuh!!’ Kuae parak hadari. Ie puna dia tau mampelep apui intu likute. Kambe Hai te hadari birip-barap, manantarang kare kayu-dereh, rink-rak, dim - dam sinde uras balihang.

Baya-baya nukep baun ekae melai, kambe hai te palus balihang matei, awi kalasut apui hung likute.

Metuh Tunggal Bakas ewen telo hampahari dumah bara bentuk himba, ewen tarewen manampayah kare sehei batisa isut ih. “Boh..! Kilen sehei bawui itah tuh je tisa isut, kueh kare nah, Anak Luting??” kuan ewen misek. “Endau dumah Kambe Hai barombak likut kuman sehei bawui tuh. Kuan tumbah Anak Luting.

“Buhen ikau dia mangahana ie.!?” kuan ewen sangit. “Nauh ih. Kanduen keton kea!! Ie mahin matei !” Kuan Anak Luting. “Haw.. matei kilen nah?” pisek ewen. ”Matei ie, awi tukan ku apui intu likute”! Has itah manyak kambe hai te.!” Kuan Anak Luting.

Ye, ewen epat manyak awan kambe hai je hadari nah. Mangat tutu manggau awi are kareh pelek kayu je nantarang kambe hai. Dia pire-pire kakejau palus sundau ewen hantun kambe hai te, tanga-tangai melai baun ije guha eka melai.

Ewen epat manangkilik rombak goha te, sakalinya are tutu olon kalunen je inawan masung awi kambe hai. Uras olon te ringkong-rihu awi katahin ewen inawan, ewen dia puji kuman. Ampie lague oloh je inawan te akan panginan kambe hai, amon ie balau, palus ie kuman olon kalunen je nawae te ije mije.

Oloh are je buah tawan imasung awi kambe hai te, nambawai balaku dohop dengan Anak Luting. Palus kea ewen epat mampalua oloh are te, parak mendeng-lungkang-lihang awi tahi dia kuman, ewen impalua bara ekae inawan.

Anak Luting ewen epat mimbit oloh are te bawi hatue je buah tawan, buli akan lewu. Pire-pire andau oloh je buah tawan kambe hai te, harue barigas kea limbah sukup kare panginan ewen impakan oloh lewu.

Limbah jari barigas tengah biti buli akan lewu humae, awang je mangun bingat. Awang je jari kalapean atawa dia kawan lewu humae ewen belum melai lewu te ih.

Oloh are manyewut tarima kasih dengan Anak Luting dengan Tunggal Bakas ewen telu hampahari. Kuan Tunggal Bakas dengan oloh are, “je patut mandinu sewut tarima kasih” iye te Anak Luting basa ia je mampatei Kambe Hai.”

Peteh Penyang :
1. Ela itah manampayah-manilai oloh awi potongan / penampilan luar bewei.
2. Ela itah manawah oloh beken. Basa kalunen tuh tege katapase, tege kalabiene.
3. Tuah Rajaki uras awi asin Hatalla.
4. Itah patut mandohop eweh bewei, aluh dia tundah-kulan itah.
5. Itah patut kea batarima kasih dengan oloh je jari mandohop tuntang manyalamat itah aluh ie te kurik atawa tabela bara itah.

Sangumang Namuei Manggau Apange

SANGUMANG NAMUEI MANGAU APANGE

Wayah getem jari hapus, Sangumang ewen ndue indue dinun malan kea kilau oloh are. Hung sinde katika metuh Sangumang dengan indue, munduk malayan intu puduk ewen. Balalu tara itung ih Sangumang kau, “lehae oloh beken tege apange, aku tuh jatun ati”? En aku tuh puna jatun apangku?” Kuan atei Sangumang.

Balalu Sangumang misek dengan indue, “O.. indang! Amon aku manantuani oloh beken, oloh tege indang – apange. Sampai katika toh dia puji aku katawan, en aku toh tege apangku atawa jatun?!” Sampet mandam kea indu Sangumang marima auh pisek anake te.

“Anu… anakku… aku dia ulih manyarita akam, tahiu apangm te.” Amon aku mansanan tege apangm, mahin dia puji ikau manampayahe.!” Amon aku mansanan, jaton apangm, kilen ikau tege inakan hung kalunen toh.!” Kuan indu Sangumang.”

“Yoh… indang! Aku are balaku ampun maaf, amon aku mangapehe atei indang, tagal pisekku te.” Kuan Sangumang.

“Dia en ih anak….. puna patut ikau misek tahiu apangm te, baya aku hindai ulih manyarita akam metuh toh. Tege kareh wayah aku manyarita akam, Sabar ih ikau helo. Kuan indu Sangumang. “Aku patut manatap kare bahatam helu pire-pire andau tuh, amun jari sukup aku masanan akam, hung kueh apangmu melai, tuntang ikau musti manyundaue apangm te”. Kuan indu Sangumang.

“Tarima kasih, indang”. Mudahan narai je kanahuangku te keleh uras tau tulus manjadi.” Kuan Sangumang dengan indue.

Ampie lague indu Sangumang jari sukup manatap akan bahata Sangumang, balalu ie mantehau Sangumang kuae : “Oi anaku Sangumang, kantuh helu ikau.!” “Handau tuh kea aku manyarita akam tahiu apangm, tuntang ikau patut manamuei manggau apangm te.!” “Narai bewei taluh ije gitam tara sundaum, taluh je ihiningm, patut ikau marimae. Ingguna kapintar kaharatim, manantuani taluh handiai je basilim. Kare tiruk itung, pikir akal tuntang angat ateimu, jete kilau sumbu atawa palita pambelumm.” Tagal te babuah ikau huang tamueim. Tuh atun impahataku uju kabawak katupat tuntang uju tanteloh manuk. Amon ikau jari sundau taluh je inggaum nah, harue ikau tau mampalepah panginamm te.” Kuan indu Sangumang.

Hayak tampalawei andau, Sangumang palus batulak manampara tanjung jalanae, aluh ie dia katawan jalan je kueh je musti inyuru tuntang ihimate.

Tanjung dia katawan akan kueh tujuan, manintu angat atei mimbit kaharape ih. Amun auh sagiling “nguuttttt…nguutttt …” hamauh, andau nampara kaput, palus tende tanjung Sanguang. Amun andau jari balawa tinai, palus Sangumang manuntung jalanae.

Hung andau je ka ujue, Sangumang sampai ije janah, je lumbah, lamat-lamatan kahai. Intu bentuk jalan te tege ije batang kayu hai mangamparang jalan. Kayu je mangamparang jalan te halau mendeng tuh kahai. Tuntang kambu batang te diakalaluen. “Saumur ku belom, hindai puji aku nampayah kambu kahai batang je kilau tuh”, kuan atei Sangumang. “Handak manangkajuk lalau kagantung batang tuh, keleh aku maliut ih, manalatai saran batang tuh.” Kuan atei Sangumang.

Sana sampai hung lawin batang te, Sangumang manampayah batang te harumbak upue lawie. Andau jari biru-biruh handak kaput. “Terai, keleh aku batiruh hung rombak batang tuh ih,” kuan atei Sangumang. Palus kea Sangumang mampater arepe, awi puna biti bereng jari heka mananjung.

Alem te metuh alem pandang bulan, hapus janah uras balawa tuntang gitan batantu. Salenga hung bentuk alem, tara hining Sangumang auh kilau talauh je babehat manjatu. “dum”!! Sangumang tarewen palus manangkilik bara rumbak kayu. “Narai auh te”, kuan ateie. Sangumang palus tarewen. Sakalinya auh je halebum nah due biti ijin je mampeter arepe hung bentuk janah te. Ampie ijen te batiruh, palus tara hining auh keruk ijin hatue bawi te.

“Kayu ekoh, kayu eot!”
“Kalute, sua-sue!”
“Kayu ekoh, kayu eot! (auh kerok ijin hatue)
“Kalute, sua-sue!” (auh kerok ijin bawi)

Auh te hatatubah hante-hante.

Sangumang dia ulih marima auh riman kerok ijin te. Kajariae Sangumang manggayar manukep ijin bawi hatue te je bakalis tiruh kantuke. Sana tukep, Sangumang palus manggayap rangka-rangkah hapus biti bereng ijin bawi- hatue te. Ijin te dia katawan awi lalau kerok kantuke.

Palus tarewen sabanen Sangumang, ie hamauh hung ateie : “hakayah… indang…. Tutu je kuan indangku, ewen ndue apangku te tege hung hetuh.!” Puna dia sala kea indangku,…. Apangku puna tege.” Te auh Sangumang hung ateie.

Limbah te Sangumang haluli akan rombak batang nah, kanatek manangkilik narai kajariae ijin bawi hatue te. Dia pire-pire katika tinai, tege auh :

“Hayu…..misik ndai..!! Andau jari buta-butat handak balawa.” Jalanan kue tuh magun kejau” Kuan ijin hatue te.

“ouhhhz….. Akai magun heka angat ku tuntang uhat tulangku puna uyuh tutu.” Kuan ijin je bawi parak rampa-rampa. Kueh kanaingku puna balau tutu.” Auhe tinai. Palus misek ijin hatue, “narai je nahuang ikau kumae?” Tumbah ih ijin bawi te : “Aku mipen kuman karipang langit, handak mihup kangur hawun.” Kuan ijin bawi te.

“Yoh, munduk helu ikau”, kuan ijin hatue te.
Palus ijin hatue te manduan due salepang bara sansila kahange tuntang mampalua sulep. Tinai ie mahadai amak pasar baun ijin bawi te. Bara due sulep je impaluae te, salenga hadai kea kare panginan 40 macam kakaree panginan intu hunjun amak pasar te. Palus ijin bawi hatue te munduk hapamuntung manaharep panginan, balalu ewen ndue kuman.

Ewen ndue puna kuman lip-lap sinde, manampa kipen belai Sangumang je manangkilik benye-benyem.

Salenga ijin hatue te, hamauh : “Hayu…!!! Gulung!!! Andau handak sawah..!! Palus harikas ijin hatue bawi te, hadari, bo… tapalihi kare amak pasar tuntang panginan je magun batisa isut kea. Sangumang dia mangatawan kakueh pandari ijin ewen ndue te awi puna kajeng kisu sinde.

Balalu Sangumang manukep eka ijin je kuman endau. Ampie lague haranan kajeng-kisu ijin te hadari buhau, tapalihi ewen amak pasar tuntang due kalawas sulep. Narai taluh ati palus Sangumang manekap due sulep te, balalu manyalepang intu kahange.

Limbah te Sangumang manduan amak pasar awan ijin munduk nah, palus maukure kahain awan punduk ijin bawi-hatue te. Kahain awan punduk ijin te, uju kahasa kambue, rimae uju kahasa kea kahain kahang ijin te. Ie mambalun amak pasar te, tuntang manyuang akan butahe.

Sana andau jari sanai, Sangumang palus marima handak mules buli akan lewu humae. Hanyak andau pure-pure Sangumang mingat jalan je inyurue nah.

Dia sapire tanjung Sangumang, Salenga palus tara gitan Sangumang, pasah ewen ndue hindu. Sangumang tarewen. Boh!!! Kilen salenga aku sampai pasah indangku. Balalu Sangumang manduan sulep je imbite bara tamueie nah., hanyak mabukae palus hamauh :

“Amun Hatalla masi tuntang manenga kuasa, panatau je inenga apangku tuh, aku balaku pasah indangku saluh jari istana!!”

Salenga kea mancugut ije istana je hai hayak bahalap tutu ampie. Kilau istana maharaja je sukup simpan kare panau huange.

Indu Sangumang tarewen salenga atun istana, palus ie manangkilik akan ruar, ie manampayah Sangumang jari atun. Te indu Sangumang mantehau anake. “Ooii… anakku Sangumang ikau kah je jari buli tuh. “Yoh indang, aku Sangumang anakm, jari buli bara tamueiku.” Kuan Sangumang tumbah.

Indue haluli misek : “ Kilen anak, en jari sundaum apangm nah atawa hindai?”

“Ampun indang….. jari sukup tamueiku. Aku jari sundau apangku.” Auh tumbah Sangumang. Palus indue tatawe mahining auh anake Sangumang.

Limbah te Sangumang ewen ndue indue melai istana te, tuntang belum tatau sanang sampai hapus batang danum neteie intu kalunen tuh.

Peteh Penyang :
1. Hajat niat je bahalap akan ipahayak awi asin sintan Hatalla.
2. Hadat bahalap tuntang gawi mahurmat oloh bakas imberkat Hatalla.
3. Rajaki tuah uras awi asi. Awi te halajur ba-syukur akan Hatalla je tempon kuasa.
4. Amon belum tatau sanang ela mangalapean indang-apang, pahari, tundah kula samandiai.

Legenda Danau Malawen

ASAL-MULA DANAU MALAWEN (LEGENDA)

Tege ije kabali-baluh (suami-istri) melai into saran himba, awi pambelum ewen ndue baya mahasil kare je atun melai himba te, yete malaok, mengan tuntang malan-manana. Kabali baluh tuh tahi jari mangabali arepe (berumah tangga), tapi ewen ndue palus hindai ati mandinun anak.

Handau hamalem ewen balaku asi dengan Hatalla ngambu uka inenga keturunan. Hung ije alem sawae te manupi inyundau ije biti oloh bakas ongko, palus hamauh huang nupie. “Oo..esu, amun keton handak mandinun anak, keleh ketun mangguang parak himba kanih.” Limbah hamauh kilau te bue je hakutak te palus lilap. Sawae te palus takisik bara tiruh nupie, palus ie manyarita akan kabalie, basa ie inyundau oloh bakas.

Ewen due palus marima nupi te, kuan banae amun kilau te itah musti “balampah” (bertapa) intu himba kanih. Balalu ewen baniat handak tulak akan himba manatap kare ramu bahatae.
Hung hanjewu andau tinai ewen ndue tulak akan himba, mampendeng puduk eka balampah. Ewen ndue nampara balampah, handau hamalem, jatun kuman, jatun mihop. Andau baganti andau, minggu, bulan baganti kea, hindai kea atun taluh masi. Pas anda je kasaratus, ewen ndue puna sadang kalau kanai, tuntang teah belai. Kajariae dumah kea ije biti oloh bakas ongko manggapi palus hakutak : “Ketun puna tutu-tutu balampah, ketun akan mandinu anak, manumun kaharap ketun. Has keleh ketun buli ndai.!” Oloh bakas te palus lilap.

Ewen ndue palus harikas buli akan human ewen hung saran himba. Andau-andau limbah te, sawae mangkeme angat biti bereng dia mangat, umbet muta-muta buang. “Nah kuan banae, mimbit arep ikau tuh andi” Pea kahureh, sawae te puna tutu batihi, mimbit arepe.

Sana sampai sukup bulan, sawae te palus maluas anak awau hatue bakena. Banae te palus manggare aran anake te “Kumbang Bernaung”.

Singkat kesah Kumbang Bernaung bejewung manjadi oloh hatue Bakena Balinga. Bara katabelae bapae majar malatih Kumbang Bernaung mandop – mengan mangau metu satua melai himba, hapan kare sipet tuntang lunju. Hung sinde katika Kumbang Bernaung mimbit bapae tulak mengan akan himba. “Ayu apang, itah mengan akan himba.” Kuan Kumbang Bernaung. Dia ulihku anak, aku dia barigas biti bereng. Ikau ih tulak kabuatm manggau metu satua akan itah. Tuh tege piring pusaka ayungku, inengaku akam, piring tuh inggare “piring malawen”, imbit piring pusaka tuh amun ikau sasat tau ikau manggunae, uka tau mandohop ikau.” Kuan bapae.

Limbah te Kumbang Bernaung haguet tulak akan himba, handak mangau metu satua. Ampie lagu Kumbang Bernaung hayang bara jalan je inyuru. Iye hayang dia katawan tintue. Balalu ie lacit akan lewun oloh je inggare lewu “Sanggu”. Metuh oloh lewu Sanggu manampa pesta hai, rami-rami.
Kumbang Bernaung balalu manukep oloh je rami rahat kare bawi hatue manari. Salenga tara gitan Kumbang Bernaung tege ije biti oloh bawi bahalap melai bentuk oloh are te. Bawi bahalap te inggare “Intan” ie anak Tambakas Lewu (Kepala Desa). Puna Kumbang Bernaung dia habirep manampayah kahalap bawi te. Palus iye buli akan humae manyuru jalan je sulake jalanan mengan nah.

Sampai huma, indu-bapa Kumbang Bernaung misek ie kilen katahie jalanan mengan, tuntang jatun dinun metu satua. Kumbang Bernaung manyarita basa ie hayang akan bentuk himba kanih, tapi dia ie manyarita basa ie sampai lewu Sanggu.
Kumbang Bernaung halajur mangganang “Intan” handau hamalem sampai dia tau sanunuh batiruh. Palus ie mananjaru indu-bapae, kuae handak tulak mengan, sakalinya ie mangguang Lewu Sanggu, handak manyundau Intan.

Kumbang Bernaung palus mangasene arep dengan Intan. Ampie Intan puna handak kea dengan Kumbang Bernaung, awi ie ije biti hatue bakena balinga. Kilau te ewen ndue kinjap hasundau benye-benyem. Kajariae, katawan bapa Intan hubungan anake dengan Kumbang Bernaung. Awi bapa Intan oloh basewut, tambakas lewu te, iye palus madu anake dengan oloh hatue je tatau kea bara lewu kejau. Tapi oloh hatue te jari bakas tuntang tege anak sawae. Intan dia nahuang dengan oloh hatue jete. Tapi ie dia bahanyi malawan auh bapae.

Mahining kilau te Kumbang Bernaung balalu musuk indu-bapae uka “Maja Misek” (melamar) Intan. Indu bapa Kumbang Bernaung palus hamauh : “Ela anak, itah tuh oloh pehe belom, dia itah bahanyi maja-misek oloh je tatau tuntang basewut.” “Dia, dia!! Kuan Kumbang Bernaung, jua-juan. “Aku musti kawin dengan Intan, narai bewei carae.!” “Ela, anak!” kuan indue.
Ampi lague Kumbang Bernaung dia tapa kahana, iye tulak akan Lewu Sanggu, benye-benyem, palus manalih Intan, ewen ndue hapakat handak “hatamput” (kawin lari). Ewen ndue balalu hadari bara lewu te. Metuh ewen ndue hadari tege oloh lewu manampayah ewen ndue. “Ayu… itah manekap Kumbang Bernaung, iye manamput Intan anak tambakas lewu.”!! Ye oloh are manguang Kumbang Bernaung ewen ndue Intan je hadari nah.

Sana sampai saran sungei, ewen ndue handak dimpah, buhau oloh are, jatun ati jukung kapal je tau mampadimpah ewen. Tara ingat Kumbang Bernaung “piring malawen” je inenga bapae nah. Palus ie manduan piring malawen te, balalu malabuhe akan sungei, Piring malawen te salenga hubah manjadi piring je hai tutu, palus Kumbang Bernaung dengan Intan mandai piring te handak dimpah akan silan sungei kanih.

Metuh ewen ndue into bentuk danum, langit hubah manjadi kaput pijem, nyahu kilat leta-letar sinde, riwut barat, parak ujan papak panggar, palus manambalik Kumbang Bernaung dengan Intan hung hunjun piring malawen te. Andau puna saluh. Piring malawen saluh manjadi danau, Kumbang Bernaung dengan Intan saluh manjadi “Bajai Baputi”.

Piring Malawen je saluh manjadi danau te, inggare oloh wayah tuh “Danau Malawen”. Huran bajai baputi due kungan te, kinjap lampang. Bajai baputi te je saluh bara Kumbang Bernaung dengan Intan.

Danau Malawen te ije danau je hai tutu, melai tukep lewu Sanggu, Kabupaten Barito Selatan, Propinsi Kalimantan Tengah. Danau te bahalap tutu patut akan obyek wisata.

Tikas tuh kesah Danau Malawen. Amon tege katapase tau pahari mandahang tuntang mangambuahe.

Peteh Penyang :
1. Hajat niat je bahalap lalus tutu-tutu tuntang sambil balakudoa.

2. Ela mahapan katekang atei, amun tege kanahuang, awi tau manyasat arep kabuat.

3. Oloh bakas ela mamadu anak jariae malabien awi handak manggau manantu je tatau.

4. Anak harus hormat dengan oloh bakas, ela malawan kare peteh, nasihat oloh bakas. Ela mananjaru.

5. Oloh je mawi taluh gawi je sala, tau buah hukuman Hatalla.