KELEP dengan BURUNG SABARU

KELEP dengan BURUNG SABARU

Hung ije andau metuh langit magun mahahindang, tampalawei andau, tege ije burung sabaru, maja marusik kelep. “En kabar hanjewu tuh, Lep..?” kuan sabaru dengan kelep. “Bahalap ih.!” tumbah kelep. “Aku tuh handak mancuba umba ikau tarawang, en tau ikau magah aku tarawang, kilau kuan oloh nah bertamasya.” kuan kelep. “Haw... tau tutu, narai kasalae.” tumbah sabaru. “Ayu lumpat hunjun likutku tuh.!” kuan sabaru. Ye kelep kau lumpat hunjun likut burung sabaru. “Dehe-dehen batahanan, lep!!” kuan sabaru dengan kelep. “Yoh, dehen tuh nah!”

Balalu tararawang ewen ndue. Te ewen ndue mangaliling kare pulau, dimpah tasik, mahalau kare dukuh, kaleka, lewu kurik-hai, sampai akan kota Palangka Raya. Manampayah human Gubernur, wali kota, kare kantor hai te, mahalau Jambatan Kahayan je gantung. Sasar gantung sabaru mimbit kelep tarawang. Bitak bure ih kelep kau hung hunjun likut sabaru.

Sasar gantung, andau sasar balasut. “Muhun jadi, muhun.!!” kuan kelep, dia tahu-tahu ih sabaru, mahin ie mimbit sasar gantung, andau kea sasar balasut tutu. “sabaru dungi-dungil ih. Kelep dia tahan mangkeme kalasut andau, palus ie malabuh arepe  akan ngiwa (puna dia puji malabuh akan ngambu). Tapi kelep sala eka malabuh, ie manjatu eka ruwut uwei, palus sangkawit kelep kau awi duhin uwei, kua-kuak ih ie.

Kelep sangkawit pas tukep kare kawan bakei. Sana gitan kelep are kawan bakei, balalu manandak kelep kau nah, sambil maayun arep kilau melai tuyang: “Mangat tuyang.....bara pisang..... Mangat tuyang.....bara pisang.....” Kuak kaping kelep ayu-ayun sambil hamauh, ..... “mangat  tuyang.... bara pisang.” Haw...!! narai kuan kelep kau nah..???” kuan bakei. “Narai je mangat tuyang bara pisang.... nah lep??” “Yoh, aku tuh manunggu tuyang amangku maharaja.!” kuan kelep. “Haw.. keleh ikei ih manunggu tuyang kau,”! Mangat ampim baayu-ayun," kuan kawan bakei. 

Balalu engkak kawan bakei, duhin uwei je manyangkawit kelep nah. Te kawan bakei tinai manyangkawit arep ewen intu lenge-pai, lepah kare upak kawan bakei nyangkawit hapan duhin uwei te. “aduh....aduh... aduh..!! kombak kawan bakei, kirih-karah auh kawan bakei kau sambil kua-kuak sangkawit duhin uwei. (nyangka bakei mangat batuyang hapan duhin uwei te, hehe.....). "aduh...... aduh....aduh...!!! narai arae tuyang je kilau tuh angat, lepah bakarah upak itah...!!" Kareh keme kelep kau..!" kuan kawan bakei.

“Te angate.... kana tanjaru kuh ketun..!!” kuan kelep. Tarima kasih jari mengkak aku, maaf aku paramisi buli helu. “Da-dah”!!!!! kuan kelep, palus buhau malihi kawan bakei je kuak kaping sangkawit duhin uwei.

Lalau kea kelep marapus kawan bakei......

(Kesah tuh bara mama Willy Untung. Trms).

Peteh Penyang :

1. Amun handak manguan jalanan, tanjung tetei, keleh balakudoa helu, babuah, tuntang barendeng.

2. Ela marapus arep, ela marapus, mangampehe oloh beken.

3. Keleh batarima kasih dengan oloh je jari mandohop itah.