Tuan Putri Tame Buwu

KESAH IJIN KAMBE HAI.... KAWIN DENGAN PUTRI

Tege ije tuan Putri, ije bahalap tutu, ie genep andau rajin mandui intu sungei. Sinde katika ijin kambe hai manampayah tuan putri te metuh rahat mandui, basinja-sinjang. “Aka-akai kahalap tuan putri tuh, pupus bulue lamus malisen, baputi lentah.” kuan ijin kambe hai. “ 

Helu akae aku menawan putri tuh, akan indu sawangku.” kuan atei ijin kambe hai. Palus ijin kambe hai mananjung intu bentuk sungei, handak menawan tuan putri, “dam .... kacapuk....... dam........kacapuk...!!” auh pai ijin kambe hai. Hining awi tuan putri. “auh tanjung ijin te..!” balalu hadari tuan putri, buli ka istana. Kute hante-hante, ijin kambe hai dia ulih menawan tuan putri, awi helu hining tuan putri auh pain ijin kambe hai.

“Narai akalku tuh, hapa ku menawan tuan putri te.?” kuan itung ijin kambe hai. Kajariae ijin kambe hai manampa ije buwu hai. Sana jadi, te ijin kambe hai manenan buwu te intu sungei eka tuan putri rancak mandui nah, buwu te inenga umpan bua pisang.

Ije andau tinai, tuan putri mandui intu sungei kilau bahut, tara gitae tege bua pisang rombak buwu. Tuan putri puna mipen dengan bua pisang je masak te, balalu ie tame kan huang buwu, handak manduan bua pisang te. Intu huang buwu hai te tuan putri kuman bua pisang, tapi pas ie handak balua bara buwu, ie dia ulih balua. Tuan putri tangkeng huang buwu, menangis masi arepe.

Ijin kambe hai handak manyengok buwu je nenae nah, ie mananjung bentuk sungei, auh pain ijin kambe hai : “dam......kacapuk......dam....kacapuk.....putri ingganang.....putri tatekap.....!’     “Dam......kacapuk.......dam.....kacapuk.....putri ingganang.....putri tatekap..!!” auh ijin kambe hai te.

Pea hureh, gitan ijin kambe hai, buwu je nenae nah, dinun tuan putri je eka huange. Palus ijin kambe hai manamput tuan putri akan lewun ijin kambe hai. Ijin kambe hai kawin dengan tuan putri te, awi tuan putri dia ulih buli akan lewu humae, ie palus belum hung lewun ijin kambe hai te.

Peteh Penyang :

1. Amun itah mandui babuah ampie, nampayah eka situasi dan kondisi, ela lalau basinja-sinjang, mikeh sala itung pikiran oloh je manampayah.

2. Bapakaian bujur buah, ela lalau sexy atau you ken see. Tege pakaian akan pesta, tege busana panganten, tege busana manari, tege busana santai, tege busana bagawi, tege busana akan gereja, masjid, balai, pura dll.

3. Ela balalu mipen amun tege je ampie mangat, mikeh jete tingkes atawa jabak. Tau manyasat itah kabuat.