PAPUYU dengan BALAWAU

KESAH PAPUYU dengan BALAWAU

Laok Papuyu basanger dengan Balawau, ewen ndue te kinjap handep hapakat malan manana. Hung ije andau, Papuyu marawei Balawau mahandep ie malan hung tanae. Rami ewen ndue hung tana, asik mambawau. Andau jari ambu, Papuyu hamauh dengan Balawau. “Lihiku hanjulu ikau nger, aku handak barapi manjuhu akan kue.” “Yoh, nger takan ih.” kuan Balawau.

Intu pasah Papuyu balalu barapi. Kilik-kilik hung pasah jatun ati je tau imbalut. Tapi Papuyu dia kurang akal. “Ceh, narai kare pehe manggau akan balut, kareh aku mananteluh hung ketel tuh ih.” Ye, papuyu manyuang danum akan ketel. Sana sadang kakare danum, palus.... cip! nangkajuk Papuyu akan huang ketel balalu mananteluh hete. Sana jari mananteluh, Papuyu balua bara ketel, te palus ie mananggaran ketel te hung hunjun tungku, manenga kare bawang henda uyah balasan akan rarampah. Juhu jari masak, te Papuyu mantehau Balawau akan pasah, mimbit kuman.

“Ayu nger, bari balut jari masak, has itah kuman ndai.” kuan Papuyu. “Haw ayu kea.” kuan Balawau. “Ceh, ceh, ceh, kamanga-mangat balutmu tuh nger.!!” kuan Balawau. “Balut narai tuh nah?” “Oh.... balut tanteluhku, endau aku nangkajee mananteluh intu huang ketel kau.” Kuan Papuyu tumbah. “Badai ih arae, tawangku puna mangat je tanteluh laok.” kuan Balawau. Lepah kesah Balawau mahandep Papuyu.

Hung ije katika tinai, gilir Balawau mimbit Papuyu handep hung tanan Balawau. “Ayu, nger dohop aku, mambawau tanaku kanih.” kuan Balawau. Ye tulak kea ewen ndue akan tanan Balawau. Pas sadang kagantung andau, kuan Balawau dengan Papuyu, “helu nger, aku kapasah handak barapi manjuhu akan kue”. “Yoh nger” kuan Papuyu.

Sana sampai pasah Balawau barapi, “Aku harus manampa balut je mangat kilau balut angerku Papuyu male.” kuan atei Balawau. “Narai balut kue tuh.?” Oh..... aku manumun kilau gawin angerku Papuyu nah ih, manapuk arep hung huang ketel kau.” kuan Balawau. Ye balau palus mananggar danum, sampai koro-korok manara. harue ie lumpat akan ketel te je metuh kalasute, balalu ie tapuk kan huang ketel. “Akai..... akai... akai..... balasut....!!!” kombak Balawau. Ie handak mawat arepe, dia ulih lumpat awi ketel malisen, handak manangkajuk dia tau. Ye, Balawau palus matei masak huang ketel te. 

Tahi tutu Papuyu mentai angere Balawau. “Kueh angerku Balawau palus dia mantehau aku kuman tuh, angat puna sadang kalau kanai.” kuan atei Papuyu. Ye Papuyu tulak akan pasah mangguang Balawau. Sana tame pasah, “Kueh ikau nger?” Jatun ati Balawau tumbah. Papuyu dia manampayah Balawau. Pas kili-balingau, sakalinya, Balawau matei masak huang ketel. “Aduh..... sanger kilen mawi ikau tuh. Pasti ikau handak manumun gawingku male je malabuh arep huang ketel nah kau.” kuan Papuyu.

(sala ampie gawin Balawau te, ie manunggu danum te manara haru malabuh arepe, amun ayun papuyu nah, ie mananteluh helu harue mananggar danum).

PETEH PENYANG :

1. Ela manumun gawin oloh, amun itah jatun kataun. Ela manumun gayan oloh, mikeh sala ampie. Genep biti tege talenta ayue kabuat, jete karunia je inenga Hatalla. Keleh manjadi arep kabuat, manumun bagin arep kea.

2.. Amun manaharep taluh gawi, keleh mikir / barima bujur buah helu, mikeh kareh sala je inggawi, tuntang tau mangapehe arep kabuat.

3. Amun oloh mansanan auh tuntang ajar keleh bujur-bujur mahining, sampai itah haratie. Auh je kurang batarang tau manyasat itah kabuat, kareh tau kilau je inyewut oloh nah diskomunikasi.

4. Niat hajat puna bahalap, tapi amun itah dia ulih malalus keleh mayarah akan oloh je puna ahli hung bidang te. Ela cuba-cuba mungkar masin motor awi tau labih atawa tapas kareh baut tuntang mor...... hehehe.....