BAKEI dengan HAMBATAR
Manumun kesah oloh bakas huran, tege ije kungan bakei metuh ie tanju-tanjung, salenga dinun ije kakiwak saramin.... “Haw narai je tuh ..? “kuan itung bakei te. Pas ie, nampayah saramin te, tagitae baun bakei, “Haw!! eweh te?” takejet ie. nyewute tege bakei beken manangkilik. Kilik tinai, tege, “Oo.... tuh nah je saramain kuan olon kalunen”. kuan bakei. “hapa nampayah arep. Hanjak atei bakei te, palus imbit bakei kiwak saramin nah, mandai akan hunjun kayu.
Intu hunjun kayu, bakei te, baayu-ayun hung edan kayu, kiu-kius angat riwut, mangat tutu, sampai handak tantiruh bakei te hunjun kayu. Tara ingat ah saramin enah. Te, ie manduan saramin, manangkilik arepe, lungak-linguk ampin kuluk bakei, umbet nampayah, umbet, kumi tawe ie, naharep saramin, umbet ngi-ngi-ngi kasingae.... basaramin. Hanjak ngat atei bakei, palus ie hamauh :
“Cer Kenar irr Akur Turr..... “ (ceh bakenah ih aku tuh)
“Bulur Kur Bahalar..... Jambur Kur Bular Balir (Bulu Kuh Bahalap.... Jambul Kuh Bulak-Balik)..... Cer.. Diar Kanararr Ampir Kur Tur.... Punar.... Bakenarrrrrr.........” (ceh.... dia kanarai amping ku tuh... puna bakenaaa......)
“Puuuuuutttt...!!!!” auh ketut mahiau bara parak ruwut intu penda.
Haw....! takejet bakei, “eweh je mangetut te?” kuan bakei hung atei.
Haluli tinai bakei te manyaramin arepe, lingak-linguk, sambil tatawe kabuat manampayah saramin, hanjak ateie, awi puna bakena kua arepe. Hamauh tinai ie :
“Cer..... Kenar irr... Akur Tur....... Bulur Kur Bahalar.... Jambur Kur Bular-Balir...... Cer...Cer.... Bakenarrrrr ...Akur Turrr.....”
Puuuuutttt....!!!! auh ketut mahiau bara parak ruwut intu penda.
Haw... haw!!!! Ewer Ter Jer Carar Ngacipur...Ngacipurr Akur Turr....??”
Karer Akar Kemer ... ier Ter....!! Akur Muper Akar Tusurr....Akur Nyiur Akar Baur.......!!” kuan bakei dengan taluh je mahiau hung penda.
Haluli tinai bakei te manyaramin arepe... lingak-linguk, manara kakena arepe.... sambil kumi rium ie manaharep saramin.
“.......Cer.... Punar Bakenarrr.... Kear Akur Turrrrr.... Bakenarrrrrr...!!!!”
“Puuuuuuuttttt.........!!!! Puuuuuutttttttttt!!! auh ketut tinai bara ruwut penda kayu eka bakei.
Haw... Haww!!! Karer Akar Kemer ier Ter..... Akur Muhur Barar Kayur Tur.... Kur Gaur Ier Ter....Sampar Dinur..... ier Bakar...Bakar... Dengar Kurrrrr!!!”
Ye, bakei te muhun bara taruk kayu hayak dengan kasangite, lepah nantawuse kare ruwut, mangakas manggau metu je mahiau endau. Lepah kare sahep, dawen kayu uras ngakas bakei te. Tepa kea dinun metu je mahiau pit-put endau, sakalinya uret “HAMBATAR”.
“Tuh ye!!! ulue je cara mangetut endau.... ikau tuh “hambatar”!! (kuan bakei dengan hanbatar). “Ikau tuh je cara mangetut, haba-baka aku. Aku manjera belaimu!!”
Haranan kasangit bakei dengan hambatar, palus nduan bakei uret hambatar te, balalu ajuke huang rombak urunge.
Narai taluh ati, jajuan tame ih uret hambatar te kahuang urung bakei, sasar handalem palus tame akan huang kuluk bakei. (Lalau kamameh puna arae je bakei). Putt...putt, hambatar te mahiau huang kuluk bakei, te bakei mangkariak, pehe kuluke, “ Hambatarrrr..... ayu balua ikauuu....!!! Pehe kulukku tuh....!!! Ampun....ampun....hambatarr.........balua..... baluaaaa...... hambatarrrrrr....!!!!
Hambatar dia hakun balua bara kuluk bakei. Haranan kapehen kuluk bakei, te ie mahampas-mahampas kuluke intu upun kayu. top...top!! yamah hatuguh upun kayu te. Awi karancak tuntang kanyangit bakei mahampas kuluke intu upun kayu, kajaria matei kea bakei te.
LEPAH KESAH.
Peteh Bara Sarita tuh :
1. Balecak isut tau ih, tapi ela lalau namparuau. Ela lalau ‘manara’ arep kabuat (ela lalau tahi manaharep saramin) hehehe.....tau dia katawan arep. Haranan kalecak, balalu dia masi arep, dia bingat kasusah uluh bakas, belum manyi-manyi.
2. Amun puna bakena, bahalap, yoh keleh bersyukur batarima kasih dengan Hatalla, je jari manenga kahalap akan itah, labi-labih amun bahalap atei tuntang taluh gawi.
3. Itah tuh harus siap manarima kritik tuntang saran oloh beken. Ela balalu sangit amun uluh mangkritik, haba-baka itah. Keleh mariksa arep (koreksi diri). Uka tau ingambuah mampahalape.
Tidak ada komentar:
Posting Komentar