Kesah Bajai Penyet Batang

(Bajai - Bajang  - Palanduk)

Sinde katika bajai intu saran sungei lagi rahat ngodon (benyem, tiru-tiruh lague). Salenga balihang ije batang kayu hai palus menyet bajai je lagi ngodon te. “Aduh......aduh.....aduh.... matei aku.... matei aku...!!   dohop.....dohop.....!!!!” kombak bajai te. Tara hining awi bajang kombak kikui bajai balaku dohop. Cip! tangkajuk bajang manguang auh oloh balaku dohop te.

Sana sampai hete, gitan bajang bajai melai sungei, penyet batang kayu hai. “Haw, narai mawi ikau nah bajai.?” kuan bajang. “Ayu dohop aku, kuan bajai, “matei aku kareh, dia ulihku manangkaruan arepku, batang je menyet aku tuh lalau kabehate, ayu gulung handak matei ndai aku tuh.” kuan bajai.

Dia mentai kareh jewu, bajang gulung mandohop, mangatang batang te, mangawit hapan tanduke, palus nyanggahe hapan likute. “Ayu gulung, jijit arepmu kau bajai.!” kuan bajang. Ye, bajai manjijit arepe bara penda batang te, palus salamat ie.

Sana salamat bajai, te ie handak manyambar sapak bajang. “Haw....haw...!!!” kuan bajang.  “lehae ikau handak manyambar aku...?” limbah, ih, aku mandohop ikau!”

“Eh, ah, dia aku peduli te.!” kuan bajai. “aku balau kanai, haranan manyarenan ehat batang endau.” “Silan sapakmu kau barangai.!” kuan bajai.

“Ikau tuh puna satua je dia tau batarima kasih.!” kuan bajang dengan bajai.

Rami bajang dengan bajai hasual-jawab. Awi karidu ewen ndue te, tara hining awi palanduk. Dari-dari palanduk mangguang auh je ridu te.

“Heiii.... narai mawi ketun ndue rami ridu kau..?!!” kuan pisek palanduk.

“Ye bajai kau, dia katawan batarima kasih, aku jari mandohop ie, bo handak sukape sapakku.” kuan bajang. “Tanjaraue, kau!” kuan bajai tumbah. “Narai kare tanjaru.” kuan bajang. “Ikau te je sala.” kuan bajai. Boh, kilen je aku je sala.” kuan bajang. Rami tutu ewen ndue hasual jawab. jatun kajaria kea, tuh kuan atei palanduk.

“Kutuh ih,” kuan palanduk. “aku dia tau memutus eweh je sala, eweh je bujur., keleh itah akan TKP (tempat kejadian perkara), kanampie ampin asal-mula-sulak-pertama, je mawi ketun ndue tuh ridu.!” kuan palanduk.

“Kutuh sulake,” kuan bajai. “aku rahat mangodon intu saran sungei tuh. balalu tege batang balihang, menyet aku.” kuan bajai. “Ayu bajang, kueh batang endau, kanampie ampin bajai te pas ie penyet. andak batang te endau, menyet ie, mangat aku manampayah katutue.” kuan palanduk.

Ye bajang metun batang endau, palus mandak intu likut bajai, kilau metuh ie penyet endau. “En, pas kilau kau.?” kuan palanduk. “yoh, pas, aduh.....aduh.....aduh..... matei aku... dohop.... dohop aku, dia ulihku nangkaruan arepku, babehat tutu batang je tuh.” kuan kombak bajai. “ayu dohop aku, , kilau endau.” kuan bajai dengan bajang.

“Ela, ela, mandohop ie,” kuan palanduk. “Patuh ie kau, satua je dia katawan batarima kasih, dengan oloh je jari mandohop ie. “ nauh ie penyet hekau, jatun oloh je mandohop ie.

Palus palanduk dengan bajang buhau, malihi bajai kabuat mangombak balaku dohop, dia hakun oloh mandohop ndai, awi hadat dia bahalap.

PETEH PENYANG :

1. Ela itah manjadi uluh je tulas, tuntang dia katawan batarima kasih dengan oloh je jari mandodop itah.

2. Amun itah mandohop oloh, ela bareken tuntang manyasal.

3. Punae tau kinjap itah mandohop oloh, ie dia batarima kasih, malah handak mangapehe itah. Nauh ih, keleh sabar, Hatalla je tempun kuasa je tau manenga hukum 

( Roma 12:19-21 : “Pahari handiai! Ela samasinde mambaleh kasingin atei, nauhe Hatalla ih je mahukum. Basa huang Surat Barasih aton tarasurat, "Aku toh je mambaleh. Aku toh je mahukum, koan Tuhan."  -- Amon musoh keton balau', keleh manenga akae panginan; tuntang amon ie teah belaie, tenga akae danum ihop. Basa awi gawin keton kalote, keton tau mawi ie paham mahamen. -- Ela manalua arep keton impakalah awi taloh papa, tapi keleh pahari mampakalah kapapa mahapan kahalap.” )