DARUNG BAWAN

KESAH DARUNG BAWAN & KAMELUH BUANG PENYANG

Zaman huran, tege oloh bagare arae “Tayung” esun Peren Tacim Bahu ie tulak halisang malihi Lewu “Dahian Undang”, awi lewu te kinjap kalahi habunu tuntang are taluh gawi je papa, dia bara batek hung lewu te. Balalu Tayung dengan kawan paharie (Kutat dengan Burut Ules), ewen mandirik maneweng, mampendeng lewu taheta je inggare “Talian Kereng.” awi melai tukep petak gantung je inggare Kereng Tehang.

Andau, bulan, nyelu halau, Tayung belum melai hung Talian Kereng sasar dehen kare huma seruke. Hung sinde andau ie taingat esue bawi je nule melai hung lewu Dahian Undang bihin.  Tayung mandinun dahiang  papa (firasat buruk) mikeh esue te naripi kajake tuntang bahaya. Ye Tayung, hung andau hamalem te kea  ie tulak manalih esue, palus mimbit esue melai umba ie hung Talian Kereng.

Nampara te Tayung  belum ewen ndue esue bawi te je inggare area “Kameluh Buang Penyang”. Awi Kameluh Buang Penyang anak nule, te bue Tayung puna tutu tau dengae. Asi-sinta bue dengan esue je nule te kilau asi-sinta bapa tuntang anak. Labi-labih awi Kameluh Buang Penyang puna ihaga bue Tayung bara kakurike.

Kameluh Buang Penyang sasar hai, manjadi uluh bawi bujang je bahalap. Haranan kahalap Kameluh Buang Penyang ie batarung sarita hapus batang danum Katingan, sampai kan tantan “Bukit Raya” intu hulu  batang danum, eka “Darung Bawan” melai.

Darung Bawan ije biti oloh hatue panjang hai, uju gawang kalumbah usuke, ie puna oloh pangaji kilau pangkalima, puna  jatun tandingan wayah te. Sana ie mahining tarung sarita Kameluh Buang Penyang, Darung Bawan palus muhun bara tantan Bukit manggau Kameluh.  Sana sampai akan  petak gantung Kereng Tehang, hung lewu Talian Kereng  nah. te Darung Bawan mangumbang lewu te manggau Kameluh. Puna bahali mangau Kameluh te awi ie in dinding  / imagar awi buee Tayung dengan salatutup.  Oloh je handak ba atei papa dia tau manampayah Kameluh je bahalap te, tikas oloh je ba atei bahalap ih je tau mamampayah Kameluh.

Sana sampai baun pasah Tayung.  te Darung Bawan mangahau / mantehau : “Oyyy!!  Tege olohkah hung hetuh?”  Palus tara hining bara puduk-pasah auh oloh bawi tumbah. Oyy! tege ih!!” Nah, pasti auh Kameluh Buang Penyang” kuan itung atei Darung Bawan. Awi hung hetuh jatun oloh bawi beken, baya Kameluh kabuat ih.

“Palus, akan pasah tuh”! kuan auh oloh bawi te.  Tapi Darung Bawan tara ingate basa ie oloh panjang hai dan oloh je abas balinga. Ela-ela amun aku lumpat pasah tuh tau baderep kareh, kuae.  Puna niat hajat dia undur, Darung Bawan palus lumpat kea akan pasah te. Tarewen heran atei Darung Bawan, lehae pasah kurik tuh salenga saluh manjadi huma hai je segah tuntang bahalap, kuan atei Darung Bawan.

Ye bue Kameluh, Tayung nah balua manyundau Darung Bawan. Ewen ndue basasurah narai ampin niat hajat, itung pikiran. Pandehan te Kameluh manatap ampin panginan taluh ihup akan oloh ije maja te. Ye Tayung misek ampin jalanan Darung Bawan, Narai tunggu entai, Darung Bawan mansanan ampin maksud atei handak manduan Kameluh Buang Penyang akan indu sawae.

“Kuan Tayung, “aku dia tau tumbah, keleh ikau misek esungku kau, awi puna tege bitie.” “Nampie kuam andi? Pisek Darung Bawan dengan Kameluh.

Kameluh palus mananture, Darung Bawan, bara matae-baue, bereng, bara kuluk palus akan pai, puna oloh hatue bakena balinga, panjang hai, uju gawang kalumbah usuke.

 Manumun kesah oloh bakas huran Darung Bawan oloh panjang hai / raksasa, rombak sipet Darung Bawan kau ulih anak oloh /tabela busik bangang, sahukan. Hung sinde andau tege anak tabela tame rombak sipet Darung Bawan, metuh Darung Bawan manekap sipet handak tulak mengan ie manangkilik sipet ah patep, kuae : “lahae sipet ku patep awi rutik?” Palus ie mahimun sipet te, je ndawae rutik nah, “Pettt!!! Palus balua anak tabela bara rombak sipet te, tapanting kejau, anak tabela te matei. Ye oloh lewu sangit dengan Darung Bawan, mambuhau ie bara lewu te. Awi te Darung Bawan haguet akan hulu batang danum, palus melai hung tantan Bukit Raya, ie belum kabuat hung kanih.

Haluli tinai akan kesah Kameluh je mananture Darung Bawan nah.
Kuan atei Kameluh aku tuh kurik bitingku, Darung Bawan kau panjang hai, dia bakae rasuk aku hinje ie. Tapi amun aku dia tumbah dia mangat kea, amun aku maiyoh, saraba sala kea. Ye Kameluh mandinun akal. Kameluh maiyoh pisek Darung Bawan, tapi harus tege “syarat” kuan Kameluh. Bue Tayung, mamander dengan Darung Bawan, “Ikau kabuat jari mahining, narai kuan esungku Kameluh”, ie hakun dengan ije syarat.!

Manumbah kea Darung Bawan : “Narai ampin Syarat-syarat nah andi?”
Kutuh syarate, kuan Kameluh :
“Ikau harus manampa “riam batu” hung bentuk batang danum Katingan, tandipah Talian Kereng tuh. Uka kareh hung hete aku tau mandui mangat, jatun tau uluh mangaraen. Tuntang riam te harus jadi hamalem tuh kea, sahelu bara manuk manandu.” Kuan Kameluh.

Itung pikir Darung Bawan syarat te sutil ih, palus tumbah ih ie :
Oke!!! Kuan Darung Bawan.
Alem tuh kea aku manampa akam riam hai hung bentuk batang danum Katingan. Awi te aku paramisi helu, kareh aku manyundau tinai amun riam te jari aku manampae.  Ye Darung Bawan murik haluli akan tantan Bukit Raya.

Situ-sini Darung Bawan kau bunda kare batu hai bara Bukit Raya, palus ie menumpuk batu te intu tiwing Talian Kereng. Sana kira-kira jari sukup kare batu, te Darung Bawan palus mambaris batu te, mije-mije, manampa riam kilau kanahuang Kameluh, riam je bahalap tuntang mangat eka mandui.
Alem sasar ambu, riam hindai kea tuntung. Biti bereng Darung Bawan angat ramuk- rakai, kea, awi bunda batu bara eka kejau. Kuan itung pikiran Darung Bawan : “aku handak membujur kahang hanjulu, awi alem magun tege, sampet ih aku manuntung gawi tuh.”
Darung Bawan palus tapatiruh…… hung saran tiwing Talian Kereng……….


Arae gin tapatiruh, awi kahekaan, Darung Bawan puna batiruh bakalis-malis, dia ie katawan taluh ije-ije ndai. Tepa Darung Bawan kau takisik andau jari sawah, manuk jari manandu.
Hengga kanyasal Darung Bawan, awi taluh gawi manampa riam hindai tuntung,  sapuna ulih ie manuntung tapi haranan tapatiruh, palus jake andau sawah.

Aluh Darung Bawan dia ulih malalus syarat bara Kameluh te, ie tatap  “Gentleman”, mangaku tulus dia ulih manuntung gawi, ie manyundau Kameluh dengan buee Tayung.

“Aku tuh dia ulih malalus syarat je nenga andiku Kameluh, basa te aku dia tau manduan Kameluh akan sawangku. Ampie lague dia jodoh ayungku, awi te jatun beken, puna aku akan belum kabuat melai tantan Bukit Raya kanih  (ngasi kea ampin Darung Bawan).

Baya ije ih petehku dengan andiku Kameluh, yete : “Kameluh dia tau kawin dengan oloh hatue beken amun ie dia labien bara kaji patua tuntang kaganjangku.” (istilah oloh wayah tuh nah amun dia labih sakti bara Darung Bawan).

Tuh, atun impelaiku “ije balanga bulau” (amas) akan andiku Kameluh Buang Penyang akan panataue belum . Tuntang kea hapae jajaga, tuh impelaiku “tirok” (kilau lunju, bulat batajim). “Amun andiku tuntang bue Tayung jake sasat, balaku awat, balaku dohop, tau mantehau aku, dengan menawur behas bahandang-bahenda palus mantehau arangku hantelu kali, aku pasti dumah.”
Limbah bapeteh kilau te, Darung Bawan palus paramisi buli, malihi Kameluh Buang Penyang dengan buee Tayung melai Kereng Tehang, ie haluli akan tantan Bukit Raya.

Puna limbah te, jatun ije biti oloh hatue beken je labih hebat balinga bara Darung Bawan, Kameluh dia kea kawin, ie belum manjadi oloh bawi bujang salia sampai kabakase. Kameluh tuh puna basewut kahalap baue matae, pupus bulue, sampai akan indu tanding tampengan oloh wayah tuh Bawi Dayak puna Bahalap kilau Kameluh, batarung sarita sampai hapus petak danum ulun kalunen.

Mahaga arep manjadi bujang salia, Kameluh puna dia manyasal, awi pangkeme Kameluh Darung Bawan puna eka tanduhan ateie kea (Kameluh jatuh cinta ke dengan Darung Bawan). Handau hamalem ie mangganang Darung Bawan je bakena balinga. Apa boleh buat, talanjur syarat dia talalus, mambalang kare hajat niat.

“Sapunae” Darung Bawan tapatiruh nah awi, awi gawin buee Tayung, sama tamam kaji-patua buee Tayung, handak maningkes kaji-patua darung Bawan. Hete ampin olon kalunen, sagantu-gantung ilmu magun tege tinai je labih gantung. Sahebat-hebat kalunen tege tinai je labih hebat. Kulen puna tege kea eka kalemue. Awi te itah, keleh randah atei, ela, takabur, ela manganggap taluh handai kurik tuntang sutil, tau itah dia ulih malaluse.
Keleh sarita tuh akan tanding tampengan, kilau ije ajar akan itah mangat tau barendeng, tuntang randah atei.

“LEPAH”
(amun kesah tuh tege versi beken, tege je dia pas, aku balaku maaf, awi jetuh kesah oloh bakas huran inutur secara lisan, hapan pangingat ih. Dohop kritik dan saran akan itah, uka tau ingambuah tinai je bahalap. Amun tege sama aran jete ije katabarungan. TRMS. Tuhan mamberkat) Tabe Salamat bara je manulis tuh : “Sergius Buyut Tigoi”