( PUTIR BUSU dengan BAWI SANDAH ) Versi I
Hung sinde katika Putir Busu tanju-tanjung saran tana, palus ie kanuahan hasundau dengan tatun bajang. “Oiii esu” kuan tatu bajang dengan Putir Busu, nara gawim? “Jatun ih, tutu bajang, kuan Putir Busu. Ihat ku ih, tanjung-tunja. Yoh! Kuan tatu bajang kau. En ikau handak umba aku mananjung? (kuan tatu bajang te). “Aku handak manenga akam panatau kalunen.” Tapi ikau kea, harus tau manumbah leleiku (kuan tatu bajang dengan Putir Busu).
“Barangai ih tatu,” kuan Putir Busu.
Ye, palus tatu bajang kau mimbit Putir Busu mananjung tame himba, dimpah sungai, manyuru ruwut bajikut…… tarus ih Putir Busu menuntut tatu bajang te. Sambil kea tatu bajang malelei akan Putir Busu, kuae :
“Narai je Leta-letap dandau esu….. (kuan tatu bajang) “sapatu raja dandau tatu” (tumbah Putir Busu)
Sambil kea ewen mananjung manyuru kareh duhi, karus-karamak mawi baju-pakaian Putir Busu, rabit-rabita sinde, tapi Putir Busu benyem ih awi pupus bulu dia badirit, dia bahimang, baya sangkawit bajue ih. Sambil menuntut bajang hayak tumbah lelei tatu bajang te.
“Narai je Lini-lining dandau esu…. (kuan tatu bajang) “patining layang dandau tatu” (kuan Putir Busu)..... kumi rium tatu bajang hanjak mahining tumbah Putir Busu.
Sambil kea ewen manyuru kare sarangan palinget tuntang naning. Benyem ih Putir Busu sambil menuntut tatu bajang hayak tumbah lelei.
“Narai je Ruyang-rayuh dandau esu…. “peteng timpung dandau tatu”
“Narai je Kitu-kitui dandau esu….. “tapatung raja dandau tatu.”
Sasar kejau tanjung ewen ndue…. Putir Busu tarus manyak tatu bajang.
“Narai je Rangga-ranggau nah dandau esu…. “dereh garing dandau tatu”.
“Narai je Kitang-kitui dandau esu….. “ewah punggun dandau tatu.”
“Narai je Meha-mehas dandau esu….. “riwut tarung dandau tatu”
“Narai je Kipak-kipak dandau esu…. “rempang tarung dandau tatu.”
Uras pas ih tumbah Putir Busu, manumbah lelei tatu bajang te, palus ewen sampai ije eka, hete are kare panatau kalunen. Kare galang-tisin amas, rantai hintan, lilis lamiang, garantung gandang, halamang balanga….. sukup simpan. “Takan esu ikau ih madue, imbit kare panatau kalunen te, mangat ikau tatau sanang, awi ikau bahalap atei, tuntang tau tumbah leleiku, mampahanjak ateiku” (kuan tatu bajang).
Ye, Putir Busu manduan, mimbit sapire je ka ulihe ie mimbit buli. Sana sampai lewu humae, Putir Busu busu batarung sarita, ie jadi uluh je tatau sanang.
Tara hining bawi Sandah, Putir Busu jadi oloh tatau sanang, ye ie maja Putir Busu. “Narai bukue sabab ikau tau tatau sanang nah Putir Busu?” Kuan bawi Sandah. Oh… kuan Putir Busu…. aku kanuahan, hasundau dengan tatu bajang… palus ie mimbit aku akan himba… sambil malelei, aku tumbah lelei ah te.” kuan Putir Busu.
Amun kilau te, hung kueh ikau sundae tatu bajang te? (pisek bawi Sandah) Ye, saran tana kanih kuan Putir Busu.
Palus segra ih… bawi Sandah kau tulak akan saran bahu…..(maklum punae mipen ramu panatau ayun Putir Busu).
Sundau kea bawi Sandah dengan tatu bajang te. “Oiii, tatu..!! kuan bawi Sandah, “imbit aku akan himba, mangat ikau manenga akangku panatau kalunen kilau ayun Putir Busu. “Oh tau tutu, kuan tatu bajang…. nuntut ih likutku,, ikau manumbah leleiku kea (kuan tatu bajang).
Ye, ewen ndue palus mananjung, tame himba, dimpah sungai, manyuru kare ruwut bajikut. Sambil kea tatu bajang malelei :
“Leta-letap dandau esu….. (kuan tatu bajang) “Puna tunjikmu kau pijak kihik mawi deruh aku menuntut ikau” (tumbah bawi Sandah)
Sambil kea ewen mananjung manyuru kareh duhi, karus-karamak mawi baju bawi Sandah. “Boh leha-lehan je kalutuh ampi jalan itah nah tatu bajang..?? kuan bawi Sandah. “Lepah rabit bingkas baju pakaianku tuh awim mimbit aku jalan je bajikut are duhi tuh.!!
Benyem ih, tatu bajang, Palus ie malelei tinai :
“Lini-lining dandau esu…. (kuan tatu bajang) “Punae matam kau!! tatu bajang je rajin manampayah kare kabun pambulan oloh.!” (kuan bawi Sandah)
“Ruyang-rayuh dandau esu…. “Ikuh mu kau je mawi aku saseken!!”
“Kitu-kitui dandau esu….. “puna ampim je tatu bajang.”
Sasar kejau tanjung ewen ndue…. bawi Sandah, sambil kea ewen manyuru kare sarangan palinget tuntang naning. Sasar hamuk bawi Sandah basing dengan tatu bajang.
“Renja-rejau dandau esu…. “Yee… paim kau je mimbit aku kanih kate manyuru jalan dia bara batek tuh”.
“Kitang-kitui dandau esu….. “Kanaim kau !!! cara besuh kuman kabun pambulan oloh!!”
“Meha-mehas dandau esu….. “Yee…. tukiu mu kau, mawi oloh are tarewen”
Puna tumbah dia bara batek kea bawi Sandau te.
Dia lepah lelei tatu bajang, metuh ewen manyuru sarangan naning….. lepah kawan naning kau murep mamepet bawi Sandah…… lepah kembang muau ih baue-matan bawi Sandah….
Ela je panatau je dinun…… Punae dinun kapehe ih bawi Sandah te….. Palus haban paham bawi Sandah te…. asi-asi ampie…. handak manggau panatau tapi hadat…tuntang kutak pander dia bara mana. lalau kakuhu… mipen ramun panatau oloh tapi…. dia hakun menyuruh jalan je bahali.
KESAH PUTIR BUSU – BAWI SANDAH tuh sampai nampa oloh akan Karungut “Sansana Bajang”, je kilau tuh auh :
Leta-letap dandau esu….. sepatu raja dandau tatu
Lini-lining dandau esu…. patining laut dandau tatu
Sansana bajang dandau tatu, sansana bajang dandau tatu
Ruyang-rayuh dandau esu…. peteng timpung dandau tatu
Kitu-kitui dandau esu….. tapatung raja dandau tatu
Sansana bajang dandau tatu, sansana bajang dandau tatu
Renja-rejau dandau esu…. dereh garing dandau tatu
Kitang-kitui dandau esu….. ewah punggun dandau tatu
Sansana bajang dandau tatu, sansana bajang dandau tatu
Meha-mehas dandau esu….. riwut tarung dandau tatu
Kipak-kipak dandau esu…. rempang tarung dandau tatu.
Sansana bajang dandau tatu, sansana bajang dandau tatu.
Rimae :
1. Keleh itah kilau Putir Busu je randah atei….. handak manyuru jalan je simit tuntang baduhi, tapi dia manyarah, dia sambil kutum karamuhu. Oloh je asi-asi ampie tau batuah marajaki manjadi oloh tatau sanang andau harian.
2. Keleh kilau Putir Busu je tau manyanang atei oloh beken, mahapan kutak je bahalap.
3. Ela kilau bawi Sandah, je balungkir tuntang kutum karamuhu, dia handak manyuru jalan bahali.
4. Ela kilau bawi Sandah je bakuhu (serakah) mipen ramun panatau oloh tapi handak mandinu dengan cara je gampang. Kutak pander dia bahalap…. dia hurmat… kejau bara rajaki… malah rugi.
KELEH KESAH TUH TAU BAGUNA
Tidak ada komentar:
Posting Komentar