SANGUMANG dengan Indu KALAKAI

Aton hung ije katika, Sangumang salenga dumah tiroke handak tulak mamandup. Maklum ih kulam, tahi dia kuman balut mangat.  Anta museh tanteluh atawa manyambalih sarden ih, gkgkgk. Andau jadi sawah,ye Sangumang kau manatap arepe,  palus tulak mamandup akan himba.
Sampai himba, puna tunis benyem ih ampin metu. Ije magin jatun je dinun Sangumang sampai andau handak kaput. Haranan awi halau kakejau jadi bara lewu, Sangumang barima handak bamalem huang himba.

Rahat ie handak mantukan apui, senga kamea  ih ewau panginan je impakasak. Awi Sangumang toh tipe kalunen je harajur handak mangatawan taloh handiai, ye ie kau manuntut ewau je hiu-hiut kau.
Dia lalau tahi Sangumang mananjung, nampayah senga tege huma melai bentuk himba mangabuat. Palus ih Sangumang mangatok batunggang "En tege oloh melai huma tuh?" kuan Sangumang. "Tege ih" tumbah oloh bawi bara rumbak huma.
Ye palus imbuka batunggang kau, tuntang mamalus Sangumang tame akan huang huma.

Ternyata je melai huang huma te nah oloh bawi je jadi paham kea kabakase. "Eweh aram tuntang narai jalanam ikau nah aken" kua dengan Sangumang. "Arangku Sangumang, jalananku mandup mina, awi halau hamalem dia kupahias buli akan lewu" tumbah Sangumang.
"Aku tuh inggare awi oloh Indu Kalakai. Yu aken, kue kuman helu narai je tege melai dapur kanih" kuan Indu Kalakai. Are ampi bari balut Indu Kalakai,puna sukup simpan ih. Bara juhu kedondong bawui, panggang bawui,sampai rica-rica kanai magin tege (gaul kea ampie Indu Kalakai tuh, hihi). Narai ati kulam, awi je puna balau meher haranan baya kuman bari dengan uyah handau endau (maklum ih awi khayalan Sangumang tuh tame tingkat tinggi, ingira tau mandup palus dinu talimpai, je manampa ie baya bahata bari dengan uyah, hehe).

Sukap saup ih Sangumang kau kuman, sampai besuh bangai ie kuman. "Nah aken takan ikau tiruh, ela dia bingat manggantung jangkut  awi nyamuk melai hetuh kilau politikus kea kelakuae, pepete pehe, bahali inekap,kinjap manjera bara likut, tuntang rajin hakarubut”. “Tuntang ije petehku akam, amun bentuk alem kareh ikau tege manyeneh auh je ane-aneh benyem ih ikau" kuan Indu Kalakai. Ye tiruh Sangumang,narai ati je gau ndai amun kanai jadi besuh, barima mamatur paniruh ih. Pas bentuk alem, tapisik Sangumang haranan mamahining auh je aneh melai panggitang balikat huma, COEEEWW COEEWWW COEEWW  auh taluh te. Tunis benyem ih Sangumang, dia hamauh sama sinde.

Dia tahi limbah te, palus rami auh kanyinyik kanyanyak bawui melai balikat huma. "Misik aken" kuan Indu Kalakai rangka-rangkah habisik. "Duan lunjum, takan ikau mamintih bawui je ingahandakmuh akan bahatam buli" kuan Indu Kalakai. Ye Sangumang kau rangka-rangkah balua bara huma,mangguang panggitang. Pea hureh ,mias kakare bawui melai penda panggitang te, ije kakawanan. Ampi te auh je coew coew endau nah auh kahit Indu Kalakai awi puna ewau ranteng panggitang te, hehe. Kawan bawui kau dumah nah haranan mamahining auh kahit kau, palus ewen manyumet awan kahit te (maaf jorok isut lah, hehe).
Ye Sangumang kau manintu je tatu talimpaie, kira2 labih ije pikul satengah ehat bawui te. Sempak ih lunju Sangumang kau melai balikat bawui te, tembus ka jantung (babuhan penyodokan kea ternyata Sangumang tuh, hihi).

Andau jadi sawah, bawui te jadi rasih tuntang lepah raga Sangumang. Ye Sangumang kau, balaku arepe dengan Indu Kalakai handak buli kalewu tuntang batarima kasih akan katau Indu Kalakai dengae. Sampai lewu, rami ih Sangumang mantehau uluh lewu uka umba kuman bawui te, hayak ie mansanan amun bawui te panengan Indu Kalakai. Isin bawui je tege batisa inyehei awi Sangumang.

Dia tahi bara te, sampai kea akan pinding Maharaja kesah amun Sangumang dinun tatu talimpai bara Indu Kalakai. Ye maja ih Maharaja kau kahuma Sangumang, manggau ampi rimae.En aken kilen auh kesah ikau dinun bawui nah? En toto inenga Indu Kalakai? En tau ikau sanan akangku ekae? Sana dumah palus ngalabacap ih je Maharaja.
"Toto ih te nah ma, tapi ela ih ikau ka kanih, tau ikau heka awi sadang kakejaue" kuan Sangumang. "Leha ikau dia bagi sehei aingku te ih" kuan Sangumang hindai (puna kilau penulis ih je Sangumang tuh, baik hati dan rajin menabung, gkgkgk).
Kuan Maharaja “ Terai dia belaikuh, dia level mamam tuh je balaku dengan uluh, mahi-mahi je susah kilau ikau tuh” (ceh ah, hasep lecak Maharaja).
“Boh amun je kilau te kanandak aim nah ma, takan ih ikau manggau kabuat”. “Ikau tulak mandup metuh andau sawah, ela tende sampai andau kaput melai himba te. Limbah te ikau mantukan apui, nah amun tege ewau je hiu-hiut, ancap ih ikau manalihe, manuntut arah ewau te ma, sundaumu ih eka Indu Kalakai” kuan Sangumang.

Pandak kesah, tulak ih Maharaja manumun je kilau sanan awi Sangumang nah. Metoh andau jadi kaput, ie mantukan apui. Dia tahi bara te, palus kamea ewau je hiu-hiut, ancap Maharaja kau manuntut arah ewau te. Sampai kea ie melai huma Indu Kalakai. Imalus Indu Kalakai ie akan huma palus imbite kuman dengae. Limbah kuman, Maharaja handak batiruh, ye Indu Kalakai bapeteh dengae “amun tege auh je ane-aneh bentuk alem kareh, ela habut, benyem ih”. Jatun tumbah Maharaja, haranan nyarenan kabesuhe, bute-bute ih.

Andau sasar hamalem, puna mias kakalis Maharaja tiruh haranan kaheka nanjung janda-jandau huang himba. Maka mangeruk ongko jekau tuntang puna paham hai aue, KROOK KROOK aue. Bentuk alem, nampara ndai Indu Kalakai mamahit uka mantehau kawan bawui, COEEWW COEEWW COEEWW aue. Dia tahi dumah ih kawan bawui rinting rihit mangguang auh te. Hindai sampai tukep huma kawan bawui te palus pir hadari uras, ternyata mikeh mahining auh keruk Maharaja je hagaruntung KROOK KROOK. Ye Indu Kalakai kau mamahit hindai mantehau kawan bawui je beken. Sinde tuh sambil inambah tarikan gas kahit te uka tau mangalah kahain auh keruk Maharaja, hehehe. COOOEEEWWWW COOOOEEEWWW COOOOEEEEWWWW aue (kira2  80 desibel (dB), perbandingan: ambang batas kerusakan pendengaran = 85 dB, erupsi gunung Krakatau nyelu 1883 = 310 dB) puna paham hai kea aue te. Dumah sinde hindai kawan bawui kau, tapi hindai sampet tukep huma pir hadari hindai ewen, haranan mahining auh Maharaja je sapa-sapae.Ternyata Maharaja tapisik awi kahain auh kahit Indu Kalakai, “narai arae liau taloh kau je coew coew bentuk alem, rahat itah huang nupi kampa!” kua komba-kombak.

Ye sampai handak sawah ndai andau, kilau te madu kilau te ih ampie, juju juan kea je sapa Maharaja kau. Ngombak ndai Indu Kalakai haranan karise dengan Maharaja, “Ela habut! Auh te nah auh kahitku tuh akan mantehau kawan bawui! Coba ikau benyem kilau je petehku nah!” Ye Indu Kalakai kau mamamahit hindai. Puna heka ndai Indu Kalakai mamamahit, coew…coew..coew.. ndai aue (berbisik lirih, hihihi).  Magun tege ih ampi bawui je dumah, tapi baya ije ih tisae. Anak bawui kulam, kueh jadi kurik hayak paringkong, mananjung magin ruyung rayang haranan karingkonge. “Duan lunjum kau ndai Maharaja, munu bawui tuh akan bahatam buli” bisik Indu Kalakai. Narai ati, dinun anak bawui je kurik hayak paringkong te ih Maharaja aka bahatae buli ka lewu. Kira-kira magun are kalabien isin sehei je inawar Sangumang akae amun imbanding dengan isin anak bawui je dinu te.
Lepah kesah.
Ajaran moral:

1. Hendaknya dalam hidup itu kita bisa lebih menghargai orang lain, apapun status dan tingkatan hidupnya di masyarakat.
2. Belajarlah menerima apapun hal baik yang ditawarkan pada kita dengan rasa bersyukur. Tidak perlu mengidamkan atau mengambil resiko untuk hal lain yang lebih besar apabila kita tidak punya kompetensi yang memadai untuk memperolehnya.
3. Hendak lah kita selalu berterima kasih kepada orang yang telah berbuat baik kepada kita dan jangan remehkan nasehat/peteh dari orang yang lebih tua.
4. Kesabaran adalah kunci utama untuk sukses dalam hidup.

Cerita ini tidak persis seperti versi aslinya. Karena ada beberapa hal yang ditambahkan penulis agar enak untuk dibaca dan ada pula yang kurang karena ingatan penulis yang agak kabur mengenai cerita ini, hehe. Mohon maaf kalau masih banyak kekurangan dalam penulisan dan pengemasannya. Kritik dan saran sangat dihargai. Terima kasih.
Terima kasih akan Alm. Tambiku Indu Tumbung je harajur bakesah akan ikei handi metoh ikei kurik rahat  ikei handak batiruh. Keleh Tuhan harajur pahayak itah handiai.

( ditulis oleh Jeefry Wiraswastama Garang)