Tege ije kungan palanduk, tanjung-tunja melai bahu oloh, handak manggau tantimun-bajawa oloh tempun bahu. Haranan palanduk te laya, salenga tambohos pai silae, palus ie babaring akan “tambuwung” (rombak je nampa oloh uka kare, bawui, bajang tame). Asi-asi palanduk kau, dia ulih lumpat akan ngambu.
Salenga mahalau ih ije kungan bawui, tara gitae palanduk melai hung tambuwung. “Haw, narai gawim hung ngiwa kau nah palanduk?" kuan bawui, “eh, lagi rahat kuman atei petak!” Boh, kilen auh kesahe, je kuman atei petak? Pisek bawui tinai. Dia kuharatie mangesah akam ih, kuan palanduk. Mangat tute nah, pisek bawui. Boh, dia kunguwae amun je dia mangat. Kilen katahi ikau kuman atei petak kau? kuan bawui. Jadi tahi, gitam je handalem jadi aku tuh nah, bulae, nyelue tuh aku kuman atei petak, kuan palanduk. Amun kilau te aku umba lah, kuan bawui, taka-takan kuan, palanduk, eweh ngahana ikau.
Ye, palus bawui kau sewu akan tambuwung. Sana hung rumbak tambuwung, bawui manggau je atei petak kuan palanduk nah, jatun. Kueh iye je atei petak kuam nah palanduk? Ihatku ih mananjaru ikau, akan indu kawalku melai penda tuh, awi aku dia tau lumpat. Ye sangit bawui dengan palanduk. Handak rapitan bawui palanduk kau. Ela, kuan palanduk. Pateimu aku mahin jatun gunae, keleh kue mamikir, kanampie balua bara tambuwung oloh tuh. Tutu kea, kuan bawui. Balang bawui mampatei palanduk.
Bo salenga mahalau ih bajang. Haw, narai gawin ketun ndue hung penda kau?, kuan bajang dengan bawui ewen ndue palanduk. “Ela habut! “ikei lagi rahat kuman atei petak” kuan bawui ndue palanduk. Boh, kilen auh kesah, je kuman atei petak. En, mangatlah? Kuan bajang misek. “boh, dia ikei nguwae amun dia mangat, haw tau aku umbalah, kuan bajang, ela, kuan bawui ndue palanduk. Narai je ela, sama dia tempue atei petak je kuam kau, kuan bajang, palus ie malabuh arepe akan tambuwung. "Te, ye!! Je ela kuang ku dengam endau nah. Kanampin itah tau balua bara hetuh, kuan bawui. Mandam bajang manampayah ngambu, tambuwung gantung dia tapa tangkajuk.
Tenang, kuan palanduk, tege akal. “ketun ndue manggatang aku akan ngambu, kareh aku mangau tali akan itah, hapa menunda ketun ndue. Keleh aku ih kuan bawui, aku ih kuan bajang, boh, kuan palanduk dia ulihku manggatang ketun. Keleh aku je kurik tuh, mangat ketun manggatang aku. Bujur kea kuan bajang ndue bawui. Ye, palus bajang-bawui mangatang palanduk kau, tepa sampai kea hung hunjun biring tambuwung, Cipp!!! palus nangkajuk palanduk te. Salamat aku, kuan palanduk. Oiii!! Dohop nggau tali lah kuan bajang ndue bawui dengan palanduk, hapa menarik ikei kue.! “Maaf lah aku are urusan, palus buhaw palanduk kau. Pasi kea bawui ndue bajang buah pikir awi palanduk. Ewen ndue dia tau balua bara tambuwung. Palanduk dia tahu-tahu, dia katawan batarima kasih dengan bawui-bajang.
Lepah kesah.
RIMAE :
1. Ela itah mamikir, manipu, mananjaru oloh.
2. Ela kilau palanduk je dia katawan batarima kasih dengan oloh je mandohop ie.
3. Itah harus barendeng, ela purah percaya narai auh uluh, auh bahalap, tapi tau manyasat.
Mazmur 120:2 "Ya TUHAN, lepaskanlah aku dari pada bibir dusta, dari pada lidah penipu.";
Amsal 15:4 “Lidah lembut adalah pohon kehidupan, tetapi lidah curang melukai hati.”
Amsal 21:23 “Siapa memelihara mulut dan lidahnya, memelihara diri dari pada kesukaran.”
Matius 10 : 16 “……..sebab itu hendaklah kamu cerdik seperti ular dan tulus seperti merpati.”
Tidak ada komentar:
Posting Komentar