Hung sinde andau kelep dengan bakei mandui hung sungei, tabarung tege batang pisang bahantung (batang pisang te ampie barukat dengan uhate dan metuh rahat mamua). Ye bakei dengan kelep kau manambang batang pisang te.
Kuan kelep, “kue habagi ih nger, ayum puntung ayungku puntung.” Yoh kuan bakei puna jete je kaharapku, ayungku hila lawie ih kuan bakei, takan ayum hila upue (bakei mintih hila lawie awi tege buae) “barangai kea kuan kelep ayau tau belum amun aku mimbul”.
Ye ewen ndue mamuntung batang pisang te, bakei manduan hila lawi palus mantejek saran ‘panggitang’, ayun kelep imbule hung upun hejan.
Narai taluh ati, awi batang pisang ayun bakei kau nah dengan buae ije katundun, balalu tejeke hung saran panggitang, dia pire masak balayu… awi lasut apui nah. Laju ih bakei kau kuman bua pisang ayue dia ati katahi lepah ndai pisang kau. Pire-pire bulan jadi halau, terai kuan bakei keleh aku maja sangerku kelep kanih, nampie batang pisang ayu te tau kah belum.
Dia sala kea, kelep je dinun hila upun batang pisang je imbul upun hejan, belum manak mangkar, palus mamua.
Sana sampai bakei hung human kelep, “Ooo nger… narai kabar….??” “Kabar bahalap…” kuan kelep. “nampie batang pisang je imbulmu bihin nah, belum?” “Haw belum...” kuan kelep, te kau ie, jadi mamua, lenda-lendang sinde, tapi namping ku dengae aku dia tau mandaie...” kuan kelep….. “Oh, tenang nger, kuan bakei kareh aku mandai akam …” “haw... tau te nger ....” kuan kelep.
Ye palus bakei kau mandai batang pisang te. “Helu aku kemer en masar hindarr” (helu aku keme en masak hindai) kuan bakei, sambil mutik ije palus kuman bua pisang te. En nger (kuan kelep nampie nah) “helu aku kemer” Boh ! lehae je kemer, baka kemer? Kuan kelep. “Mana aku ih kuan bakei.” Sampai handak lepah ndai bua pisang kau kinan bakei, cara hamauh kemer, baka kemer. Laku akangku kuan kelep masi arepe, “Tiwas ikau dia tau mandai kuan bakei. Upak ngin barangai, kuan kelep, “Ehrr… uparr girr mangarrr” (kuan bakei), leha katula-tulas bakei kau sampai upak gin dia manenga akan kelep je tempun pisang.
Ye, kelep kau masi arepe, menangis, lungu-lungui : nguii….nguii….nguii….
Salenga tarahining “ingkir” tangis tatum kelep kau. Dumah ingkir kau mingguang kelep…. “Narai mawi ikau nah nger kelep (kuan ingkir), “ye bakei kau kuman bua pisangku, sampai upak gin dia ie manengae akangku.” “O tenang nger kuan ingkir, kareh aku manarewen ie, ikau masang biding bangkongmu je banyihi kau, kareh aku manarewen bakei kau.” Ye, kelep malingkir mamasang biding hung upun pisang… Te ingkir palus manarewen bakei “heewww!!!!! Bakei tarewen palus manjatu akan upun pisang takana biding kelep, palus matei bakei kau.
Limbah te kelep kau manguan suling bara tulang bakei je matei nah.
Ngut….ngut…ngut…. (auh suling kau) suling ringut-ringut, bakei matei ahang tarok pisang, nangkejet mama ingkir.... hapabiding mama elep, .... ngut...ngut...nguttt.......” (auh suling te)... suling ringut-ringut, bakei matei ahang tarok pisang, nangkejet mama ingkir ....... hapabiding mama elep, .... ngut....ngut...ngutttt......” (auh suling te)
Tara hining awi ‘beruk’ suling kelep nah. “haw.... lehan kahalap auh suling te?” kuan beruk, “helu aku manakau bara kelep kau.” Ye beruk manakau suling kelep palus nampute akan taruk lentang. Hung hunjun lentang beruk manyuling suling bara tulang bakei nah. ngut...ngut...nguttt.......” (auh suling te)... suling ringut-ringut, bakei matei ahang tarok pisang, nangkejet mama ingkir ....... hapabiding mama elep, .... ngut....ngut...ngutttt......” (auh suling te). Hanjak beruk mahining auh suling je bahalap te.
“ngut...ngut...nguttt.......” suling ringut-ringut, bakei matei ahang tarok pisang, nangkejet mama ingkir .......hapabiding mama elep, .... ngut....ngut...ngutttt......” Boh! Lehan sulingku tege auhe taruk lentang kanih? (kuan kelep). Sana nampayah je manyuling kau beruk. Ye palus nambawai menangis kelep kau…. lehan beruk manakau sulingku kau… nguiii....nguiiii.... tangis tatum kelep.
Tara hining katam batu tangis kelep kau…. “Narai mawi ikau nah kelep,” kuan katam batu. “Ye sulingku nakau awi beruk nampute akan taruk lentang kanih, ie manyuling. Tenang kuan katam batu kareh aku manjera belaie…” “Ikau nutup aku hapan dawen balayu kareh aku rangka-rangkah mandai…” Ye, katam kau inutup hapan dawen balayu… palus ie mandai… sampai taruk lentang… pas beruk rahat asik manyuling… daka-daka intu edan kayu je paka-paka...… “KEP!! Ngatip katam bawak beruk kau! Narai taluh ati…. Nangkunjung beruk kau tarewen kapehean, palus manjatu “dum” akan ngiwa takana baner kayu … palus matei beruk kau. “Akam keme kuan kelep je manakau sulingku.”
Ye kelep dengan katam mamapui tulang beruk palus nampa manjadi ‘ketuk’. Te katam bajual ketuk akan anak esun beruk… rami kawan anak esun beruk kau manyipa hapan ketuk dia ewen katawae je bara tulang tatu ewen beruk. Ye kelep kau mambaka anak esun beruk : “Lehan kapasi-pasi anak esun beruk kuman ketuk bara isin tulang tatu hiange” Hining anak-esun beruk kau metuh rahat manyimpa : palus tarewen sabanen ewen… leha itah kuman isin tulang tatu itah “uek….uek…uek… uras muta kawan anak esun beruk kau uek…uek…uek… muta sampai uras matei kawan anak esun beruk kau…. awi muta tarewen sabanen kuman ketuk bara isin tulang tatu hiang ewen.
Limbah te, te kawan bakei, beruk, je beken, hapumpung manahiu taluh gawin kelep kau je manampa tulang bakei akan suling, manampa “ketuk” (kapur) bara tulang beruk tatu ewen.
Magun are ketuk kapur kelep nah, te ie kea bajaja bajual, kuan auh kelep : “kapur......kapura ....kapur ...kapura.....” “En bahandang kapur....”?? kuan bakei beruk kau, “bahandang” kuan kelep, Balalu nduan suluh rangas. “Tutu kuwae .....” “rami ih ewen bakei beruk kau mamili ketok kapur kelep, lepah kapur kau je njual kelep nah.
Awi kelep hanjak lepah kapur kau nah balalu hamauh ie bapantun. “Kapur.... kapura.... kuman tulang kula.....” kute hante-hante auh kelep bapantun. “Haw......haw..... tulang oloh bakas itah kuan bakei beruk, “ayu itah nekap kelep kau, ye muhon kawan bakei beruk manekap kelep. Te ewen manyidang kelep kau nah.
“Natal akae....!!” kuan bakei beruk kau nah derep-derep. Tumbah ih kelep kau nah, “narai je natal mukul keton aku, cukup aku buah tatal, nepe, mukul oloh likut ku kau nah, gitan ketun usukku je maruak, je rata, en dia aku maharit kapehean?! Kuan kelep. “Mapui ih kuan je beken”, “Mahi je mapui, gitam likutku toh je babilem, metuh aku kurik mapui indangku sampai aku sale, dia aku keme.” Ooo ... amun kalute... derep-derep kawan bakei beruk hamauh, “jakah ie akan bentuk danum kau..!!”
Naraie.... manangis rundu-rundu ih kelep hasur hasur danum matae, “Ela ...ela...ela...ela...... pasi...akuuuu,” Ye sana mahining auh kelep je asi-asi, “Ela masie...” kuan kawan bakei nah. “Bom!!
ih njakah ewen akae kelep te, narai taluh ati, palus leteng kelep te hung danum. “Te iye....Kemee angate,” kuan kawan bakei beruk kau nah hanjak hanjak,” Dia pire lampang ih kelep je leteng endau, palus kuluke jengu-jenguk hunjun bilun danum, palus ie hakutak. “Tarima kasih ketun jadi jakah aku kan danum..... terima kasih ih......kelep buli lewu ........kelep buli lewuuuu.......!!!!”
Kelep te salamat..... kawan bakei beruk munduk nure munggum tunjuke, mandam....?!
Sampai hetuh helu kesah….murah harian inuntung............. muda-mudahan ela sampai mambaleh bunu...kalahi hai.......!! hehehe......
(kesah tuh hindai tinduh tutu, tau manamean kritik, saran tuntang mandahang akan kahalap. Tarima kasih akan Ilok L.Hanyi, Willy Untung, Mastuasi Saha je jari mandahang kesah tuh).
AJAR BARA KESAH TUH :
- Ela culas dengan kawal
- Ela manjadi oloh je dia katawan batarima kasih.
- Gawi je sala te pasti kajaria akan katawan dan pasti tege baleh ah.
- Ela manampayah oloh kurik dia badaya, mana kuan itah, tege kareh oloh beken je mambaleh.
Ayub 4:8 : “Yang telah kulihat ialah bahwa orang yang membajak kejahatan dan menabur kesusahan, ia menuainya juga.” Amsal 22:8 : “Orang yang menabur kecurangan akan menuai bencana, dan tongkat amarahnya akan habis binasa.”
Tidak ada komentar:
Posting Komentar